No liklikantayo dagiti tattao kadagiti grupo a saantayo a kayat, mabalin a kumaro ti panangidumdumatayo. Ket no dagiti laeng kapadatayo ti gagayyemtayo, mabalin a panunotentayo a ti laeng umiso ket ti panagpampanunot, rikrikna, ken panagtigtignaytayo.

“Luktanyo a naimbag dagiti pusoyo.”​—2 CORINTO 6:13.

Ania ti kaipapananna? Ti ‘pusotayo’ ket tumukoy kadagiti emosion ken rikriknatayo. No dagiti laeng kapadatayo ti gagayyemtayo, arigna nakaserra ti pusotayo. Tapno maliklikantayo dayta, masapul a sisasaganatayo a makigayyem kadagiti naiduma kadatayo.

No maam-ammotayo a naimbag dagiti sabsabali, maawatantayo no apay a naidumada. Bayat a sumingsingedtayo kadakuada, ibilangtayo idan a paset ti grupotayo. Ad-adda nga ipategtayo ida, ken kabaelantayon ti makipagragsak ken makipagladingit kadakuada.

Usigem ti kapadasan ni Nazaré. Idaddadumana idi dagiti imigrante. Imbagana ti nakatulong kenkuana: “Nakikadua ken nakipagtrabahoak kadakuada. Negatibo ti ibagbaga dagiti tattao kadakuada ngem napaneknekak a saan a pudno dayta. No makigayyemka kadagiti sabali ti kulturana, maammuam a saanda  nga agpapada amin ket masursurom nga ayaten ken apresiaren ida kas indibidual.”

Mangbirokka kadagiti gundaway a makisarita kadagiti tattao a sabali ti pagilian, puli, wenno lengguaheda. Mabalinmo nga aramiden dagitoy

• Pagestoriaem ida maipapan iti bagida.

• Awisem ida iti pannangan.

• Denggem dagiti kapadasanda, ken ammuem no ania ti napateg kadakuada.

No ikagumaam a tarusan dagiti kapadasanda, maawatam no apay a kasta ti personalidadda. Makatulong daytoy tapno ad-adda a magustuam ida ken ti dadduma pay iti grupoda.