Kayat ti Amin ti Nasayaat a Masakbayan
Ania ti kayatmo a masakbayam? Kas iti adu a tattao, kayatmo la ketdi a nasayaat ti masakbayam ken ti pamiliam—naragsak, nasalun-at, natalna, ken narang-ay a biag.
Adu a tattao ti saan a sigurado no maaddaanda met laeng iti masakbayan nga ar-arapaapenda. Ngamin, adu dagiti bigla a napasamak—kas iti COVID-19—a nangbalbaliw iti kasasaad dagiti tattao, nangparigat iti biagda, ken nakatayan pay ketdi ti adu. Kas resultana, madanaganda a baka saanto a nasayaat ti masakbayanda.
Gapu iti dayta, agporporsegi dagiti tattao nga agbirok iti makatulong kadakuada tapno nasayaat ti masakbayanda. Dadduma ti agtalek kadagiti di makita a puersa a kas iti gasat wenno suerte. Adu ti agdepende iti edukasion ken kinabaknang ta pampanunotenda a makatulong dagita tapno maalada ti kayatda. Mamati met ti dadduma a no agbalinda a naimbag a tao, nasayaatto ti biagda.
Adda kadi kadagita ti makatulong kenka a maaddaan iti nasayaat a masakbayan? Tapno maammuam ti sungbat, panunotem dagitoy a saludsod:
Iti ania a nakadepende ti masakbayam?
Garantia kadi ti edukasion ken kuarta para iti nasaysayaat a biag?
Sigurado kadin a nasayaat ti masakbayam no naimbagka a tao?
Pakasarakam kadagiti makatulong a prinsipio tapno nasayaat ti masakbayam?
Tulongannaka daytoy a ruar ti Pagwanawanan a mangbirok kadagiti sungbat.