“Nakakitaak iti baro a langit ken baro a daga; ta naglabasen ti immuna a langit ken ti immuna a daga, ken awanen ti baybay.”—Apocalipsis 21:1, Baro a Lubong a Patarus.

 “Kalpasanna, nakitak ti baro a langit ken ti baro a daga. Awanen ti immuna a langit ken immuna a daga. Awan metten ti taaw.”—Paltiing (wenno Apocalipsis) 21:1, Ti Baro a Naimbag a Damag Biblia.

 Nagusar daytoy a bersikulo iti piguratibo a sasao tapno maipakaammo a ti nailangitan a Pagarian ti Dios suktannanto ti amin a gobierno ti tao. Ikkatento ti Pagarian ti amin a managdakdakes ken iturayanna ti baro a kagimongan ti tattao a situtulok nga agpasakup iti autoridadna.

 Ti libro nga Apocalipsis ket naglaon kadagiti mangirepresentar a “ladawan,” wenno simbolo. (Apocalipsis 1:1) Isu a nainkalintegan a panunotentayo a ti langit ken daga a nadakamat iti daytoy a bersikulo ket saan a literal no di ket simboliko. Kasta met, nadakamat ti simboliko a “baro a langit” ken “baro a daga” iti dadduma pay a bersikulo ti Biblia. (Isaias 65:17; 66:22; 2 Pedro 3:13) Ti panangsukimat kadagitoy ken iti dadduma pay a salaysay iti Biblia tulongannatayo a mangtarus iti kaipapananda.

 “Baro a langit.” No dadduma, usaren ti Biblia ti sao a “langit” a tumukoy iti panagturay wenno gobierno. (Isaias 14:12-14; Daniel 4:25, 26) Isu nga imbaga ti maysa a reperensia a kadagiti naimpadtuan a sirmata, “ti langit isimbolona ti agturturay a pannakabalin wenno gobierno.” a Iti Apocalipsis 21:1, ti “baro a langit” ket nalawag a tumukoy iti Pagarian ti Dios. Daytoy a nailangitan a gobierno, a maawagan no dadduma iti “Pagarian ti langit,” ket nadakamat iti intero nga Apocalipsis ken iti dadduma pay a libro ti Biblia. (Mateo 4:17; Aramid 19:8; 2 Timoteo 4:18; Apocalipsis 1:9; 5:10; 11:15; 12:10) Ti Pagarian ti Dios, a ni Jesus ti Ari, suktannanto ti “immuna a langit,” kayatna a sawen, ti amin nga imperpekto a gobierno nga inaramid ti tao.—Daniel 2:44; Lucas 1:31-33; Apocalipsis 19:11-18.

 “Baro a daga.” Ibaga ti Biblia a ti literal a daga ket saanto a pulos madadael wenno masuktan. (Salmo 104:5; Eclesiastes 1:4) Ania ngarud ti simboliko a daga? Masansan nga usaren ti Biblia ti sao a “daga” a tumukoy iti tattao. (Genesis 11:1; 1 Cronicas 16:31; Salmo 66:4; 96:1) Ti ngarud “baro a daga” ket tumukoy iti baro a kagimongan ti tattao a situtulok nga agpasakup iti nailangitan a gobierno ti Dios. Aglabasto ti “immuna a daga,” wenno kagimongan ti tattao a bumusbusor iti Pagarian ti Dios.

 “Awanen ti baybay.” Maitunos iti dadduma a paset ti Apocalipsis 21:1, simboliko met ti “baybay.” Gapu ta nalaka a makibur ken masansan a nadawel ti baybay, irepresentarna dagiti nagulo a tattao a naisina iti Dios. (Isaias 17:12, 13; 57:20; Apocalipsis 17:1, 15) Mapukawto met dagitoy a tattao. Kuna ti Salmo 37:10: “Iti saanen a mabayag, awanton dagiti managdakdakes; kitaemto ti dati nga ayanda, ket awandanton.”

 Ipakpakauna ti libro nga Apocalipsis ti mapasamak bayat ti “aldaw ti Apo.” (Apocalipsis 1:10) Sigun iti padto ti Biblia, nangrugi dayta nga aldaw idi 1914 idi nangrugi nga agturay ni Jesus kas Ari ti Pagarian ti Dios. b Ngem saan a dagus a naan-anay a kontroladona ti daga. Kinapudnona, ibaga ti dadduma pay a padto a dumakes a dumakes dagiti kasasaad ti lubong bayat ti umuna a paset ti “aldaw ti Apo.” Dayta nga umuna a paset ket maawagan iti “maudi nga al-aldaw.” (2 Timoteo 3:1-5, 13; Mateo 24:3, 7; Apocalipsis 6:1-8; 12:12) Inton agpatingga dagitoy a delikado ken napnuan-problema nga al-aldaw, ikkatento ti Pagarian ti Dios ti daan a simboliko a langit ken daga sa iyegna ti baro a panawen ti talna ken panagtutunos. Dagiti iturayan ti Pagarian—ti “baro a daga”—tagiragsakendanton ti nakasaysayaat a kasasaad ken perpekto a salun-at.—Apocalipsis 21:3, 4.

 Buyaem daytoy ababa a video tapno makitam ti pakabuklan ti libro nga Apocalipsis.