“Impakita ti Dios ti ayatna kadatayo iti kastoy a pamay-an: natay ni Kristo maipaay kadatayo bayat a managbasoltayo pay laeng.”—Roma 5:8, Baro a Lubong a Patarus.

 “Impakita ti Dios ti ayatna kadatayo: Idi managbasoltayo pay laeng, natay ni Cristo gapu kadatayo!”—Roma 5:8, Ti Baro a Naimbag a Damag Biblia.

 Impakita ni Jehova a a Dios ti nagdakkel nga ayatna idi impalubosna a matay ti Anakna a ni Jesu-Kristo para kadagiti managbasol a tattao. (Juan 3:16) Kas managbasol a tattao, adda tendensiatayo nga agpanunot ken agaramid iti maikontra kadagiti nalinteg a bilbilin ti Dios. (Colosas 1:21, 22) Ngem pinagbalin ti Dios a posible a maikappiatayo kenkuana “babaen ti ipapatay ti Anakna.” (Roma 5:10) Isu nga addan tsansatayo ita a maaddaan iti nasayaat a relasion iti Dios ken namnama nga agbiag nga agnanayon.—Roma 5:11; 1 Juan 4:9, 10.

 Insurat ni apostol Pablo dagita a sasao kadagiti Kristiano idiay Roma. Mabasa daytan iti kapitulo 5 iti suratna kadagiti taga-Roma. Inlawlawag ni Pablo no apay a naragsak dagiti Kristiano ken nalawag latta ti namnamada. (Roma 5:1, 2) “Saannatayo a paayen” dayta a namnama gapu ta naibatay iti nagdakkel nga ayat ti Dios babaen ti panangitedna iti Anakna a ni Jesus tapno matay para kadatayo. (Roma 5:5, 6) Kanayon a nagtulnog ni Jesus iti Dios, banag a saan a naaramidan ti umuna a tao a ni Adan. (Roma 5:19) Gapu iti panagsukir ni Adan, nagbasol ken matay ti amin a tattao. (Roma 5:12) Ngem gapu iti naan-anay a panagtulnog ni Jesus ken ipapatayna, addan namnama dagiti natulnog a tattao nga agbiag nga agnanayon.—Roma 5:21.