Kuna ti Biblia: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5; Salmo 146:4) Isu a no mataytayo, awantayon. Dagiti natay saanda a makapanunot, makagaraw, wenno makarikna.

“Iti tapok agsublikanto”

 Idi nakisao ti Dios iti immuna a tao a ni Adan, imbagana no ania ti mapasamak no mataytayo. Gapu ta nagsukir ni Adan, kinuna ti Dios kenkuana: “Ta tapokka ket iti tapok agsublikanto.” (Genesis 3:19) Sakbay a pinarsua ti Dios ni Adan ‘manipud tapok iti daga,’ awan pay idi ni Adan. Kasta met, idi natay ni Adan, nagsubli iti tapok ket awanen.

 Kasta met laeng ti mapasamak kadagiti matay ita. Kuna ti Biblia maipapan kadagiti tao ken animal: “Napaaddada amin manipud iti tapok, ket agsublida amin iti tapok.”—Eclesiastes 3:19, 20.

Ti ipapatay ket saan a pagpatinggaan ti amin a banag

 Masansan nga iyasping ti Biblia ti ipapatay iti pannaturog. (Salmo 13:3; Juan 11:11-14; Aramid 7:60) Saan nga ammo ti nakaturog ti mapaspasamak iti aglawlawna. Kasta met, saan nga ammo ti natay ti mapaspasamak. Ngem isursuro ti Biblia a kabaelan ti Dios a riingen dagiti natay a kas iti nakaturog ket biagenna manen ida. (Job 14:13-15) Para kadagiti pagungaren ti Dios, ti ipapatay ket saan a pagpatinggaan ti amin a banag.