Naibaga kadagiti adu a tattao a saantayo a masigurado no siasino ti nangisurat iti Biblia. Ngem masansan a nalawag a nailanad iti Biblia no siasino ti nangisurat iti linaonna. Adda dagiti paset a mangrugi iti sasao a kas iti “ti sasao ni Nehemias,” “ti sirmata ni Isaias,” ken “ti sao ni Jehova a dimteng ken Joel.”—Nehemias 1:1; Isaias 1:1; Joel 1:1.

 Bigbigen ti kaaduan a mannurat iti Biblia a nagsuratda iti nagan ni Jehova, ti maymaysa a pudno a Dios, ken isu ti mangiwanwanwan kadakuada. Dagiti mammadto a nangisurat iti Hebreo a Kasuratan inwaragawagda iti nasurok a 300 a daras: “Daytoy ti kinuna ni Jehova.” (Amos 1:3; Mikias 2:3; Nahum 1:12) Dagiti dadduma a mannurat inawatda ti mensahe ti Dios babaen kadagiti anghel.—Zacarias 1:7, 9.

 Agarup 40 a lallaki ti nangisurat iti Biblia iti unos ti 1,600 a tawen. Adda dagiti lallaki a saan la a maymaysa ti insuratda a libro iti Biblia. Kinapudnona, ti Biblia ket buklen ti 66 a libro. Ti Hebreo a Kasuratan ket buklen ti 39 a libro, nga aw-awagan ti adu kas ti Daan a Tulag. Ti met Kristiano a Griego a Kasuratan ket buklen ti 27 a libro, a masansan a maawagan iti Baro a Tulag.