Magusgustuanmi a Saksi ni Jehova ti makisarita maipapan iti Dios kadagiti tattao a sabali ti relihionna. Ngem saankami a makiramraman iti interfaith, wenno ti panagkakadua dagiti tattao nga agduduma ti relihionna tapno agdaydayaw. Kuna ti Biblia nga agtutunos ken agkaykaysa dagiti pudno a Kristiano. Ti kangrunaan a pakakitaan iti dayta ket ti panagpapada ti patpatienda. (Efeso 4:16; 1 Corinto 1:10; Filipos 2:2) Saan laeng a ti panagtutunos iti kinapateg ti ayat, asi, ken panangpakawan ti karaman iti dayta. Naibatay dagiti patpatienmi kadagiti umiso a pannakaammo iti Biblia, ta no saan, awan serserbi ti pammatimi.—Roma 10:2, 3.

 Ti panagdaydayaw a kadua ti dadduma a tattao a sabali ti patpatienna ket impada ti Biblia iti di umiso a pannakisangol, ta mabalin a pakapuyen dayta ti pammati ti maysa a Kristiano. (2 Corinto 6:14-17) Dayta ti makagapu a saan nga impalubos ni Jesus a makiraman dagiti adalanna iti panagdaydayaw a kadua ti dadduma a relihion. (Mateo 12:30; Juan 14:6) Babaen iti Linteg nga inted ti Dios ken Moises, naiparit kadagiti nagkauna nga Israelita ti pannakikadua kadagiti kaarrubada tapno agdaydayaw. (Exodo 34:11-14) Idi agangay, saan nga inawat dagiti matalek nga Israelita dagiti tulong a mabalin nga agresulta iti pannakikaduada kadagiti sabali ti patpatienna tapno agdaydayaw.—Esdras 4:1-3.

 Wen. Kas ken apostol Pablo, kayatmi a maawatan ti kapanunotan ken patpatien ti “kaaduan a tattao.” (1 Corinto 9:19-22) No makisarsaritakami kadagiti tattao, ikagkagumaanmi a suroten ti balakad ti Biblia nga ipakitami ti “nauneg a panagraem” kadakuada.—1 Pedro 3:15.