No twasye kana Yesũ nĩwatangĩĩie andũ ala aĩkĩĩku yĩla waumisye thayũ wake wĩthĩwe nthembo ya wovosyo. (Mathayo 20:28) Kĩu nĩkyo kĩtumi Mbivilia ĩmwĩtĩte Yesũ “mũtangĩĩi wa nthĩ.” (1 Yoana 4:14) Ĩsyokete ĩkasya atĩĩ: “Kũi ũtangĩĩo kwĩsĩla ũngĩ o na wĩva, nũndũ vai ĩsyĩtwa yĩngĩ yĩnengetwe andũ ĩtheo wa ĩtu yĩla no nginya tũtangĩĩwe kwĩsĩla kwayo.”​—Meko ma Atũmwa 4:12.

 Yesũ ‘nĩwasamie kĩkwʼũ kwondũ wa kĩla ũmwe’ ũmũĩkĩaa. (Aevelania 2:9; Yoana 3:16) Ĩtina wa vau, ‘Ngai nĩwamũthayũũkisye,’ na asyoka ĩtunĩ e kyũmbe kya veva. (Meko ma Atũmwa 3:15) E ĩtunĩ, Yesũ “nũtonya kũmatangĩĩa vyũ ala mamũthengeea Ngai kwĩsĩla kwake, nũndũ ĩvinda yonthe e thayũ na nĩwĩsũvanaa kwondũ woo.”​—Aevelania 7:25.

Nĩkĩ twendaa Yesũ esũvane kwondũ witũ?

 Ithyonthe twĩ ene naĩ. (Alomi 3:23) Naĩ ĩsu nĩtũvathanaa na Ngai, na noyo ĩetae kĩkwʼũ. (Alomi 6:23) Ĩndĩ Yesũ ethĩawa e mũtetheesya, kana “wokili” wa onthe ala methĩawa na mũĩkĩĩo nthĩnĩ wa nthembo yake ya wovosyo. (1 Yoana 2:1, maelesyo ma kwongeleela) Nĩwĩsũvanaa kwondũ woo, aimũkũlya Ngai ethukĩĩsye mboya syoo na aimaekea naĩ syoo kwa mũsingi wa kĩkwʼũ kyake. (Mathayo 1:21; Alomi 8:34) Ngai nũmwĩthukĩĩasya, na ayosa ĩtambya yĩla yaĩle nũndũ Yesũ amwĩsũvaa kwosana na kwenda Kwake. Ngai amũtũmie Yesũ ĩũlũ wa nthĩ nĩ “kana nthĩ ĩtangĩĩwe kwĩsĩla kwake.”​—Yoana 3:17.

Kũmũĩkĩĩa Yesũ nokwʼo kwĩ kwʼoka kũtonya kũtuma tũtangĩĩwa?

 Aiee. O na kau no nginya twĩthĩwe na mũĩkĩĩo nthĩnĩ wa Yesũ nĩ kana tũtangĩĩwe, ve maũndũ angĩ twaĩle kwĩka. (Meko ma Atũmwa 16:30, 31) Mbivilia ĩtwĩĩte atĩĩ: “O ũndũ mwĩĩ ũte na veva wĩthĩawa wĩ mũkwʼũ, nowʼo mũĩkĩĩo ũte meko wĩthĩawa wĩ mũkwʼũ.” (Yakovo 2:26) Kwoou nĩ kana tũtangĩĩwe, no nginya twĩke maũndũ aa maatĩĩe:

•   Twĩmanyĩsye ĩũlũ wa Yesũ na Ĩthe wake, Yeova.​—Yoana 17:3.

•   Twĩthĩwe na mũĩkĩĩo mũlũmu nthĩnĩ woo.​—Yoana 12:44; 14:1.

•   Twonanyʼe mũĩkĩĩo witũ kwa kwĩwʼa na kwĩka kwosana na mĩao ĩla matũnengete. (Luka 6:46; 1 Yoana 2:17) Yesũ aisye kana ti kĩla mũndũ ũmwĩtaa “Mwĩaĩi” ũkatangĩĩwa, ĩndĩ no ũla “wĩkaa kwenda kwa Asa [wake] ũla wĩ ĩtunĩ.”​—Mathayo 7:21.

•   Na ĩndĩ nĩtwaĩle kũendeea kwĩthĩwa na mũĩkĩĩo o na twakwatwa nĩ mathĩna. Yesũ nĩwaeleisye ũndũ ũsu nesa yĩla waisye atĩĩ: “Ũla ũkomĩĩsya kũvika mũthya, ũsu akatangĩĩwa.”​—Mathayo 24:13.