Ndaciarĩirũo taũni-inĩ ya Ciudad Obregón mwena wa rũgongo wa Mexico, ndĩ wa gatano harĩ ciana kenda. Twaikaraga nja ya taũni ĩyo, kũrĩa baba aarĩ na kamũgũnda kanini. Kwarĩ kũndũ kwega gwa gũikara, na famĩlĩ itũ yarĩ na ũrũmwe na gĩkeno. Ũndũ wa kĩeha nĩ atĩ, ndĩ na mĩaka ĩtano tu mũgũnda witũ nĩ wathũkirio nĩ kĩhuhũkanio na tũgĩthamĩra taũni ĩngĩ.

 Baba nĩ aambĩrĩirie kũgaacĩra kĩĩmbeca. No ihinda-inĩ o rĩu, akĩambĩrĩria kũnyua njohi gũkĩria gĩthimi. Ũndũ ũcio nĩ wathũkirie kĩhiko gĩake na ũgĩtũhutia mũno ithuĩ ciana. Tũkĩambĩrĩria kũnyua thigara iria twaiyaga kuuma harĩ baba. Ndĩ na mĩaka ĩtandatũ tu, nĩrĩo rĩarĩ riita rĩa mbere kũnyua njohi nginya ngĩrĩĩo. Kahinda kanini thutha ũcio, aciari akwa makĩeheranĩra na mĩtugo yakwa ĩgĩthũka o na makĩria.

 Mami aatuoire, tũgĩthiĩ gũikaraga nake kwa mũthuri ũngĩ. Mũthuri ũcio ndaamũheaga mbeca, na mbeca iria mami oonaga itiatũiganaga. Kwoguo twĩ na ciana icio ingĩ tũkĩambĩrĩria kũruta wĩra ũrĩa tũngĩahotire, no tũtiahotaga kũhingia mabataro ma o mũhaka. Ndahũũragĩra andũ iratũ rangi, ngendia mĩgate, ngathĩti, thwiti, na indo ingĩ. Ningĩ nĩ ndorũraga kũu taũni-inĩ ngĩcaria irio mborera-inĩ cia andũ arĩa atongu.

 Ndĩ na mĩaka ikũmi, mũndũ ũmwe nĩ aanjũririe kana no tũrutage wĩra nake mborera-inĩ ĩrĩa yateagwo gĩko gĩa taũni ĩyo. Nĩ ndetĩkĩrire, ngĩtiga cukuru, o na ngĩehera mũciĩ. Aaheaga mbeca itakinyĩte dola ĩmwe harĩ mũthenya na akahe irio ciumĩte mborera-inĩ ĩyo. Ndaikaraga gathũnũ-inĩ ndathondekete na indo cia kũrogota. Andũ arĩa ndatindanagia nao maahũthagĩra ciugo cia ũũra-thoni na maarĩ aganu. Aingĩ ao maahũthagĩra ndawa cia kũrebia na makanyua njohi gũkĩria gĩthimi. Rĩu nĩrĩo rĩarĩ ihinda iritũ makĩria ũtũũro-inĩ wakwa, na ndarĩraga o ũtukũ ngĩinainaga nĩ ũndũ wa guoya. Nĩ ũndũ wa gũkorũo ndĩ mũthĩni na kwaga gĩthomo, ndaiguaga njonokete. Ndaikarire mborera-inĩ ĩyo ta mĩaka ĩtatũ, nginya rĩrĩa ndathamĩire taũni ĩngĩ ya Mexico. Ndĩ kũu, ndarutaga wĩra mĩgũnda-inĩ, ngatua mahũa na mbamba, ngacokanĩrĩria igwa, na ngagetha waru.

 Thutha wa mĩaka ĩna, ngĩcoka Ciudad Obregón. Tata witũ ũmwe warĩ mũragũri nĩ aaheire rumu ya gũikara gwake mũciĩ. Ndambĩrĩirie kũgĩa iroto njũru na ũndũ ũcio ũgĩtũma ndangĩke mũno nginya ngĩambĩrĩria gwĩciria kwĩyũraga. Ũtukũ ũmwe nĩ ndahoire Ngai ngĩmwĩra: “Mwathani, angĩkorũo nĩ ũkoragwo kuo, no nyende gũkũmenya, na nĩ ngũgũtungatĩra tene na tene. Angĩkorũo nĩ kũrĩ ndini ya ma, no nyende kũmĩmenya.”

 Nĩ ndatũũrĩte ngenetio nĩ maũndũ ma Ngai. O na ndĩ mwana, nĩ ndathiaga kanitha nyingĩ no gũtirĩ o na ĩmwe yangenagia. Gũtirĩ o na ĩmwe yarutanaga maũndũ maingĩ ma Bibilia kana ĩkandeithia kũmenya Ngai makĩria. Imwe ciekĩrĩire mũno ũhoro wa mbeca, nacio ingĩ ciarĩ na andũ aganu.

 Rĩrĩa ndarĩ na mĩaka 19, mũthuri wa mwarĩ wa maitũ ũmwe nĩ aanjĩrire atĩ Aira a Jehova nĩ maamuonetie ũrĩa Bibilia yugaga igũrũ rĩgiĩ kũhũthĩra mĩhianano ũthathaiya-inĩ. Aathomeire Thama 20:4, 5. Yugaga atĩ tũtiagĩrĩirũo gũthondeka mĩhianano ya gwacũhio. Mũhari wa 5 uugaga ũũ: “Ndũkanacinamĩrĩre kana ũgucĩrĩrio gũcitungatĩra, nĩ gũkorũo niĩ Jehova Ngai waku, ndĩ Ngai wendaga wĩrutĩri wa ngoro yothe.” Agĩcoka akĩnjũria atĩrĩ, “Angĩkorũo Ngai nĩ ahũthagĩra mĩhianano kũringa ciama kana angĩkorũo nĩ endaga tũmĩhũthĩre ũthathaiya-inĩ-rĩ, nĩ kĩĩ kĩratũma oige ti mĩega?” Kĩũria kĩu nĩ gĩatũmire ndĩcirie. Thutha ũcio, nĩ twaarĩrĩirie maũndũ megiĩ Bibilia maita maigana ũna. Nĩ ndakenagĩra ndeereti icio mũno ũũ atĩ ndonaga ihinda rĩgĩthiĩ na ihenya mũno.

 Thutha-inĩ, nĩ aandwarire mũcemanio-inĩ wa Aira a Jehova. Nĩ ndakenirio mũno nĩ maũndũ marĩa ndonire na ngĩigua kuo. O na andũ ethĩ nĩ maanyitaga itemi mũcemanio-inĩ ũcio, makaria na njĩra ĩrathĩrĩrĩka wega marĩ harĩa mbere! Ndeĩrire atĩrĩ, ‘Kaĩ andũ nĩ mathomithagio wega gũkũ-ĩ!’ O na gũtuĩka ndarĩ na njuĩrĩ ndaihu na ndiehumbĩte wega, Aira a Jehova nĩ maanyitire ũgeni marĩ na wendo. O na nĩ harĩ famĩlĩ ĩmwe yanyitire ũgeni tũkarĩanĩre hamwe nao thutha wa mũcemanio.

 Nĩ ũndũ wa kwĩruta Bibilia hamwe na Aira a Jehova, nĩ ndamenyire atĩ Jehova Ngai nĩ Ithe witũ ũrĩ wendo na nĩ atũrũmbũyagia gũtekũmakania ũhoti witũ wa kĩĩmbeca, ũrĩa andũ matuonaga, rũrĩrĩ rwitũ, kana gĩthomo kĩrĩa tũrĩ nakĩo. Ndarĩ mũthutũkanio o na hanini. (Atũmwo 10:34, 35) Rĩu nĩ ndambĩrĩirie kũmenya Ngai wega. Ndiaiguaga ta harĩ kĩndũ kĩa bata ndagaga ũtũũro-inĩ.

 Ũtũũro wakwa wothe nĩ waambĩrĩirie kwagĩra na njĩra nene! Ngĩtiga kũnyua thigara, kũhũthĩra njohi ũũru, na kũhũthĩra ciugo cia ũũra-thoni. Marakara marĩa ndarĩ namo kuuma ndĩ mwana makĩambĩrĩria gũthira, na ngĩtiga kũgĩa na iroto njũru. O na nĩ ndatigire kwĩyona itagĩrĩire, ũndũ ũrĩa woimanĩte na mĩtangĩko ĩrĩa ndarĩ nayo ndĩ mũnini na kwaga gĩthomo.

 Ndĩ na mũtumia mwega mũno wendete Jehova na nĩ andeithagia mũno. Rĩu ndungataga ndĩ mũrori wa mũthiũrũrũko gatagatĩ-inĩ ka Aira a Jehova, ngaceerera ciũngano thĩinĩ wa famĩlĩ itũ ya kĩĩroho ya aarĩ na ariũ a Ithe witũ nĩguo ndĩmekĩre ngoro na ndĩmarute. Nĩ ũndũ wa gũteithio nĩ Bibilia na ũrutani mwega ũrĩa Ngai atũheaga, rĩu ndiiguaga njonokete.