Aca, tũtiagĩrĩirũo. Rĩgĩtaarĩria mawatho mamwe marĩa Ngai aheete Aisiraeli, ibuku rĩtagwo New Catholic Encyclopedia riugaga ũũ: “Kũringana na maũndũ matiganĩte marĩa mataarĩirio Bibilia-inĩ gũtiahũthagĩrũo mĩhianano ũthathaiya-inĩ wa ma wa Ngai.” Ta rora ũrĩa mĩhari ĩno ya Bibilia yugaga:

•   “Ndũkanethondekere mũhianano mwacũhie, kana mũhianĩre wa kĩndũ o gĩothe gĩĩ kũrĩa igũrũ, kana wa kĩndũ gĩĩ gũkũ thĩ, kana wa kĩndũ kĩĩ maĩ-inĩ marĩa me mũhuro wa thĩ; ndũkanaciinamĩrĩre kana ũcitungatĩre; nĩ gũkorũo niĩ Jehova Ngai waku ndĩ Ngai wĩ ũiru.” (Thama 20:4, 5) Tondũ Jehova nĩ “Ngai wĩ ũiru,” endaga ũthathaiya wa ngoro yothe, na ndakenaga rĩrĩa twagoca kana twathathaiya mĩhianano, mbica, andũ marĩ igweta kana kĩndũ kĩngĩ o gĩothe.

•   ‘Ndingĩtĩkĩra mĩhianano ya gwacũhio ĩheo rũgooco rũakwa.’ (Isaia 42:8) Ngai nĩ aregaga ũthathaiya wa mĩhianano. Hĩndĩ ĩrĩa Aisiraeli amwe maathathayirie Ngai makĩhũthĩra mũhianano wa njau, Ngai aamonire marĩ andũ “aremi mũno.”​—Thama 32:​7-9.

•   “Tũtiagĩrĩirũo nĩ gwĩciria atĩ Ũngai wake ũhaanaine na indo cia thahabu, kana cia betha, o na kana cia ihiga, iria ithondeketwo nĩ andũ na ũũgĩ wao o na kana mũhianĩre o ũrĩa andũ megeragĩria ihaana taguo.” (Atũmwo 17:29) Mũgarũ na ũthathaiya wa kĩpagani ũrĩa kaingĩ ũhũthagĩra mĩhianano ĩrĩa ĩkoragwo “ithondeketwo nĩ andũ na ũũgĩ wao,” Bibilia yugaga atĩ Akristiano magĩrĩirũo ‘gũthiaga na ũhoro wa gwĩtĩkia, ti wa kuona na maitho.’​—2 Akorintho 5:7.

•   “Wĩmenyagĩrĩrei mĩhianano.” (1 Johana 5:​21) Watho ũrĩa waheetwo Aisiraeli na Akristiano nĩ wonanagia wega atĩ, Bibilia hatirĩ handũ ĩnyitaga mbaru ũrutani wa atĩ Ngai nĩ etĩkĩraga mĩhianano ũthathaiya-inĩ.