Itũũra-inĩ rĩa Filipi, nĩ kwarĩ na mũirĩtu ũmwe warĩ ndungata na aarĩ na ndaimono. Ndaimono ĩyo yamũhũthagĩra kũratha mohoro, na nĩ ũndũ ũcio akahota gũthũkũmĩra arĩa maamwathaga mbeca nyingĩ. Rĩrĩa Paulo na Sila maathiire Filipi, mũirĩtu ũcio nĩ aamoimire thutha thikũ nyingĩ. Ndaimono ĩyo yatũmaga aanĩrĩre ũũ: “Athuri aya nĩ ndungata cia Ngai Ũrĩa ũrĩ Igũrũ Mũno.” Paulo aacokire akĩra ndaimono ĩyo ũũ: ‘Thĩinĩ wa rĩĩtwa rĩa Jesu ndakwĩra uume thĩinĩ wake!’ Ndaimono ĩyo nĩ yoimire thĩinĩ wa mũirĩtu ũcio o hĩndĩ ĩyo.

Rĩrĩa arĩa maathaga mũirĩtu ũcio monire atĩ ndangĩamateithirie kũgĩa na mbeca rĩngĩ, nĩ maarakarire mũno. Maakururirie Paulo na Sila makĩmatwara kũrĩ acirithania na makiuga ũũ: ‘Athuri aya nĩ maroina watho na mararehe ngũĩ itũũra-inĩ rĩothe!’ Acirithania acio maathanire Paulo na Sila mahũũrũo iboko na maikio njera. Mũrangĩri wa njera aamaikirie njera ya thĩinĩ biũ na akĩmoherera ndungu magũrũ.

Paulo na Sila maagoocaga Jehova na nyĩmbo, nao andũ arĩa mohetwo hamwe nao nĩ maamathikagĩrĩria. No ũtukũ gatagatĩ, nĩ kwagĩire na gĩthingithia kĩnene o rĩmwe, na gĩkĩinainia njera ĩyo yothe. Mĩrango ya njera ĩyo nĩ yahingũkire, mĩnyororo ya arĩa mohetwo ĩkĩohoka, nacio ndungu ikĩregera. Mũrangĩri wa njera nĩ aateng’erire njera ya thĩinĩ na akĩona mĩrango ĩhingũkĩte. Eeciririe atĩ ohwo othe nĩ morĩte, na nĩ ũndũ ũcio akĩoya rũhiũ eyũrage.

Paulo amwĩrire ũũ o hĩndĩ ĩyo: ‘Ndũkegere ngero tondũ tũrĩ haha ithuothe!’ Mũrangĩri ũcio aaguthũkire thĩinĩ na akĩgwa mbere ya Paulo na Sila. Aamoririe ũũ: “Njagĩrĩirũo gwĩka atĩa nĩguo honoke?” Maamwĩrire ũũ: ‘Ũrabatara gwĩtĩkia Jesu mũrĩ hamwe na andũ a nyũmba yaku.’ Paulo na Sila maacokire makĩmaruta ũhoro wa Jehova, na mũrangĩri ũcio hamwe na andũ othe a nyũmba yake makĩbatithio.