Musa na Haruni nĩ maathire kwĩra Firauni ũhoro ũyũ meerĩtwo nĩ Ngai: ‘Akorũo ndũgwĩtĩkĩria andũ akwa mathiĩ, nĩ ngũtũma ngi ciũke ciiyũre bũrũri wothe.’ Gwokire ngi nyingĩ mũno nginya ikĩiyũra nyũmba cia Amisiri othe, arĩa maarĩ itonga o na athĩni. Bũrũri wothe waiyũire ngi. Ĩndĩ itũũra rĩa Gosheni kũrĩa Aisiraeli maaikaraga gũtiarĩ na ngi. Kwambĩrĩria na ihũra rĩrĩ rĩa kana, no Amisiri tu maahutagio nĩ mahũra. Firauni eerire Musa ũũ: ‘Thiĩ ũthaithe Jehova eherie ngi ici. Andũ anyu no mathiĩ rĩu.’ No rĩrĩa Jehova eeheririe ngi icio, Firauni nĩ eericũkirũo. Hihi kũrĩ hĩndĩ ĩngĩakinyire Firauni erute kaũndũ?

Jehova oigire ũũ: ‘Akorũo Firauni ndegwĩtĩkĩria andũ akwa mathiĩ, nyamũ cia Amisiri ikũrũara na ikue.’ Mũthenya ũrĩa warũmĩrĩire, nyamũ icio nĩ ciambĩrĩirie gũkua. No nyamũ cia Aisiraeli itiakuire. O na hĩndĩ ĩyo Firauni ndetĩkĩririe andũ mathiĩ.

Jehova eerire Musa acoke kũrĩ Firauni na aikie mũhu rĩera-inĩ. Mũhu ũcio watuĩkire rũkũngũ rũhinyu na rũgĩthiĩ kũrĩ Amisiri othe. Rũkũngũ rũu rwatũmire Amisiri othe o hamwe na nyamũ ciao marũare mahũha maarĩ na ruo mũno. O na kũrĩ ũguo, Firauni nĩ aaregire Aisiraeli mathiĩ.

Jehova nĩ aacokire agĩtũma Musa rĩngĩ athiĩ eere Firauni ũũ: ‘Nginya rĩu no ũrarega andũ akwa mathiĩ? Rũciũ nĩ ngaarehe mbura nene mũno ya  mbembe.’ Mũthenya ũrĩa warũmĩrĩire Jehova nĩ aarehire mbura ĩyo ya mbembe, marurumĩ, na mwaki. Gũtionekete mbura ta ĩyo rĩngĩ bũrũri-inĩ wa Misiri. Mĩtĩ na mĩmera yothe ya Amisiri nĩ yathũkangirio biũ, no ya Aisiraeli ndĩahutirio nĩ mbura ĩyo. Firauni eerire Musa ũũ: ‘Thaitha Jehova nĩguo atũme mbura ĩno ĩthire! Mũcoke mũthiĩ.’ No rĩrĩa mbura ĩyo ya mbembe yathirire, Firauni nĩ aaregire Aisiraeli mathiĩ.

Musa aacokire akĩmwĩra ũũ: ‘Rĩu ngigĩ igũka irĩe kamũmera karĩa gothe gatananiinwo nĩ mbura ya mbembe.’ Gwacokire gũgĩũka ngigĩ nyingĩ mũno na ikĩrĩa mĩmera yothe o hamwe na mĩtĩ. Firauni eerire Musa ũũ: ‘Thaitha Jehova nĩguo eherie ngigĩ ici.’ No o na thutha wa Jehova kweheria ngigĩ icio, Firauni no omĩtie ngoro.

Jehova eerire Musa ũũ: ‘Tambũrũkia guoko gwaku na igũrũ.’ O hĩndĩ ĩyo, gũkĩgĩa nduma ndumanu biũ. Amisiri maikarire thikũ ithatũ matekuona mũndũ kana kĩndũ o na kĩrĩkũ. Kũrĩa Aisiraeli maikaraga nokuo kwarĩ na ũtheri.

Firauni eerire Musa ũũ: ‘Oya andũ anyu mũthiĩ, no nyamũ cianyu mũtigũthiĩ nacio.’ Nake Musa akĩmwĩra: ‘No mũhaka tũthiĩ na nyamũ citũ nĩguo tũthiĩ tũgacirute igongona kũrĩ Ngai witũ.’ Firauni aigua ũguo nĩ aarakarire mũno nginya akĩgũthũkĩra Musa akĩmwĩra: ‘Njeherera! Na ũngĩgoka rĩngĩ kũrĩ niĩ, no ngakũũraga.’