Nĩ ũndũ wa ndũire kwĩyũria andũ makuaga nĩkĩ, makĩria rĩrĩa mũndũ twendete mũno akua. Bibilia yugaga ũũ: “Rũbora rũa gĩkuũ nĩruo wĩhia.”—1 Akorintho 15:56.

Andũ othe mehagia na magakua nĩkĩ?

 Andũ a mbere, Adamu na Hawa, moorirũo nĩ muoyo nĩ tondũ nĩ meehĩirie Ngai. (Kĩambĩrĩria 3:17-19) Moimĩrĩro marĩa mangĩamakorire no gĩkuũ nĩ ũndũ wa ũremi wao kwerekera Ngai, tondũ “itherũkĩro rĩa muoyo” nĩ harĩ we.—Thaburi 36:9; Kĩambĩrĩria 2:17.

 Adamu agĩkinyĩria njiarũa ciake ciothe wĩhia. Bibilia yugaga: “Kwĩhia kwa mũndũ ũmwe-rĩ, nĩkuo gwatũmire mehia matonye gũkũ thĩ, nakĩo gĩkuũ gĩgĩtonya nĩ ũndũ wa mehia; tondũ ũcio gĩkuũ gĩgĩkĩhunja kũrĩ andũ othe, nĩ gũkorũo nĩmaakĩĩhirie othe.” (Aroma 5:12) Andũ othe makuaga tondũ othe nĩ mehagia.​—Aroma 3:23.

Ũrĩa gĩkuũ gĩkeeherio

 Ngai nĩ eranĩire ihinda rĩrĩa, ‘akang’aria gĩkuũ na akĩniine biũ tene na tene.’ (Isaia 25:8) Nĩguo eherie gĩkuũ biũ, no mũhaka eherie nginya mehia, tondũ nĩmo marehage gĩkuũ. Ngai ageeka ũguo kũgerera Jesu Kristo, ũrĩa ‘weheragia mehia ma kĩrĩndĩ.’—Johana 1:29; 1 Johana 1:7.