Yolanda okwa ti: “Ohandi mono ovanafikola vomongudu yetu, ovo hava kala ashike omutumba vehe na omambo, ve na oumbako komatwi tava pwilikine keemusika pefimbo opo omuhongi ta hongo. Nondi udite ko kutya omolwashike hava dopele. Ashike ope na ovanhu vamwe ngaashi ame, ovo hatu kendabala okulesha noudiinini, ndele natango ohatu mono ashike oitwa i li pedu. Oshoshili kandi shii kutya omolwashike shi li ngaho. Ohashi nyemateke nge neenghono okudja mo noitwa i li pedu, ofimbo oshivike ashishe nda kala itandi kofa sha wana molwaashi handi lesha noudiinini.”

Mbela naave ou udite ngaashi Yolanda? Oushili oyoo kutya ohashi teya omukumo okumona oitwa i li pedu.

Ovanyasha vamwe, ovo hava dopa kofikola, oshi na oupu va efe po okuxwepopaleka oitwa yavo. Vamwe ohava efa po ofikola nokuli. Nonande eenghalo adishe odo odi li eshongo, ope na yo onghedi imwe omo to dulu okuungaunga noupyakadi oo. Tala keenghatu hamano odo to dulu okukatuka opo u mone oitwa i li xwepo.

•  Osho to dulu okuninga po

•  Osho oomakula voye tava ti

• Kala alushe ho kala meetundi. Onghedi ei otai monika ya fa yanafangwa, ashike ngeenge owa kala ho pitililwa po unene keetundi, oto ka mona oitwa yopedu.

  Matthew okwa ti: “Luhapu ovanyasha kofikola yetu, ovo vehe na ko nasha noitwa yavo, ovo unene hava faula keetundi, naasho ohashi va dopeke.”

  Efinamhango lOmbiibeli: “Keshe osho omunhu ta kunu osho ta ka teya.” — Ovagalati 6:7.

• Kendabala u mone ouwa meetundi adishe. Inashi wana ashike okukala meetundi, ndele ou na okuninga eenghendabala ngaashi to dulu opo u mone mo ouwa. Ninga omadidilikoshango. Kendabala okuuda ko eshi omuhongi ta popi. Ngeenge omuhongi okwa yandje omhito yokupula omapulo, pula apa uhe udite.

  Olivia okwa ti: “Ohandi pula omapulo mahapu pefimbo leetundi molwaashi onda mona kutya omuhongi oha yelifa oshikundafanwa nawa ngeenge okwa mono kutya omuhongwa ke udite ko.”

  Efinamhango lOmbiibeli: “Pwilikineni nawa osho handi mu lombwele.” — Lukas 8:18.

• Ino tapa. Kashi li mondjila okutapa. Ope na eenghedi dihapu dokutapa mofikola. Onghedi imwe okutapa puvakweni eshi tamu shange. Okuninga ngaho inaku puka ashike, ndele ohashi ku ningifa yo uha shiive sha.

  Jonathan okwa ti: “Ngeenge ku udite ko oshinima shonhumba, ino tapa omanyamukulo avamwe. Okutapa itashi ku kwafele sha. Ponhele yokulihonga okukandula po oupyakadi kwoove mwene, otashi ku ningifa ashike u kale we lineekela muvamwe.”

  Efinamhango lOmbiibeli: “Keshe umwe na konakone oilonga yaye mwene kutya oya tya ngahelipi opo e i litangele.” — Ovagalati 6:4.

• Kala wa pitifa komesho oifiilwalonga yoye. Ngeenge otashi shiiva, wanifa po oifiilwalonga yoye ofimbo ino ninga oinima imwe, ngaashi unene omalihafifo. * Ngeenge owe i wanifa po, oto ka dula okuhafela omalihafifo oye.

  Calvin okwa ti: “Onda pitifa komesho oifiilwalonga yange, naasho ohashi xwepopaleka oitwa yange. Shimha nda i keumbo, luhapu ohandi kala nda hala okufuwa po kashona ile ndi pwilikine komusika. Ashike ohandi kendabala ndi wanife po oifiilwalonga yange tete, opo nee handi fuwa po nawa.”

  Efinamhango lOmbiibeli: ‘Shiiveni oinima oyo ya fimanenena.’ — Ovafilippi 1:10.

• Pula ekwafo. Ino kala wa fya ohoni okukwafelwa kuvamwe. Pula omayele kovadali voye. Pula omuhongi woye opo e ku kwafele u mone oitwa i li xwepo. Oto dulu yo okukonga ekwafo kwaavo hava hongo eetundi da wedwa po.

  David okwa ti: “Inda komuhongi odikilila. Mu pula ekwafo opo u dule okuuda ko oshikundafanwa nouxwepopaleke oitwa yoye. Omuhongi otashi ke mu kumwifa okumona kutya owa halelela okupita notashi ke mu linyengifa e ku kwafele.”

  Efinamhango lOmbiibeli: ‘Apa pe na ovapukululi vahapu eemhangela tadi wanifwa.’ — Omayeletumbulo 15:22.

• Longifa omhito keshe to mono. Moilongo imwe, eetsutsa (eetesti) ohadi kwafele ovahongwa va mone oitwa iwa. Oto dulu yo okukufa ombinga moinyangadalwa imwe oyo tai dulu oku ku pefa oitwa. Ngeenge owa dopa otsutsa oto dulu okupula opo u i shangulule.

  Mackenzie okwa ti: “Ngeenge onda hala okuxwepopaleka oitwa yange moshilongwa shonhumba, aame handi katuka tete onghatu. Ohandi pula ovahongi ngeenge ope na oinyangadalwa imwe oyo handi dulu okukufa ombinga muyo ile okushangulula opo ndi xwepopaleke oitwa yange.”

  Efinamhango lOmbiibeli: “Oilonga aishe idjuu otai likolifa.” — Omayeletumbulo 14:23.