Біз басқа діндерден бөлініп шыққан ағым емеспіз, біз — халықаралық ұйымбыз. Бас басқармамыз Құрама Штаттарда орналасқанмен, Ехоба куәгерлерінің басым көпшілігі басқа елдерде тұрады. Шамамен сегіз миллионнан тұратын біздер 230-дан астам елде адамдарға Киелі кітаптан тәлім береміз *. Өйткені Иса пайғамбардың мына сөздеріне құлақ асамыз: “[Құдай Патшалығы] жайлы осы ізгі хабар барлық халықтар есту үшін бүкіл жер бетінде уағыздалады” (Матай 24:14).

Қай елде тұрсақ та, біз адалдықпен мемлекет заңын орындаймыз. Әйтсе де саяси мәселелерге келгенде, бейтараптық сақтаймыз. Себебі Иса пайғамбардың ізбасарларына “осы дүниелік болмаңдар” деген бұйрығына мойынсұнамыз. Біз саяси мәселелерге және соғысты қолдайтын іс-шараларға қатыспаймыз (Жохан 15:19; 17:16). Мәселен, Екінші дүниежүзілік соғыс кезінде Ехоба куәгерлері бейтараптықтан таймағандары үшін түрмеге қамалып, азапталып, тіпті өлімге де кесілді. Бұрын Германияда епископ болған бір кісі Ехоба куәгерлері жайлы былай деп жазды: “Үшінші Рейх [нацистік Германия] кезінде діни көзқарасына байланысты соғысқа қатысудан бас тартқандар негізінен солар еді”.

Алайда біз басқалардан бөлектеніп өмір сүрмейміз. Иса пайғамбар өз ізбасарлары үшін Құдайға дұға еткенде, “оларды осы дүниеден алып кет” деп сұрамаған (Жохан 17:15). Сондықтан біз де ел қатарлы жұмыс істейміз, дүкен аралаймыз және оқу орындарында білім аламыз.