ចូរធ្វើតាមការព្រមានដើម្បីអាចរួចរស់ជីវិត!
នៅថ្ងៃទី២៦ ខែធ្នូ ឆ្នាំ២០០៤ មានរញ្ជួយដីដ៏ខ្លាំងមួយដែលមានកម្រិត៩,១រិចទ័រ បានធ្វើឲ្យញ័រកក្រើកកោះស៊ីមឺលូដែលនៅខាងជើងឆៀងខាងលិចកោះស៊ូម៉ាត្រាប្រទេសឥណ្ឌូណេស៊ី។ មនុស្សទាំងអស់ដែលនៅលើឆ្នេរកោះនោះបានមើលទៅសមុទ្រ ហើយឃើញថាទឹកសមុទ្រនាចទៅវិញខុសពីធម្មតា។ ស្រាប់តែភ្លាមៗនោះ ពួកគេទាំងអស់គ្នាក៏ប្រញាប់ប្រញាល់រត់យ៉ាងលឿនទៅទីខ្ពស់ ហើយស្រែកឡើងថា៖ «ស្មូង! ស្មូង!» ជាភាសាតំបន់នោះដែលមានន័យថាស៊ូណាមី។ ក្នុងរយៈពេលតែ៣០នាទីប៉ុណ្ណោះ កម្លាំងរលកដ៏ខ្លាំងបានបោកផ្ទប់មកលើឆ្នេរ ហើយបំផ្លាញផ្ទះនិងភូមិស្ទើរតែទាំងអស់។
កោះស៊ីមឺលូជាកន្លែងដំបូងគេដែលទទួលរងការបំផ្លិចបំផ្លាញដោយរលកយក្សស៊ូណាមី។ ក៏ប៉ុន្តែ ក្នុងចំណោមប្រជាជន៧៨.០០០នាក់ មានតែ៧នាក់ប៉ុណ្ណោះដែលបានបាត់បង់ជីវិត។ ហេតុអ្វីមនុស្សតិចម្ល៉េះបានស្លាប់? a ពីព្រោះមានសុភាសិតមួយរបស់អ្នកកោះនោះថា៖ ‹បើឃើញដីរញ្ជួយ ហើយទឹកសមុទ្រនាចទៅវិញ ចូររត់ទៅកន្លែងខ្ពស់ ព្រោះមិនយូរទេទឹកនោះនឹងបោកផ្ទប់មកលើឆ្នេរជាមិនខាន›។ តាមរយៈបទពិសោធន៍ពីអតីតកាល មនុស្សដែលរស់នៅកោះស៊ីមឺលូបានរៀនដឹងថាពេលដែលនីវ៉ូទឹកសមុទ្រមានការផ្លាស់ប្ដូរភ្លាម នោះជាសញ្ញាប្រាប់ថាស៊ូណាមីជិតមកដល់ហើយ។ ដូច្នេះ ពេលពួកគេធ្វើតាមការព្រមានទុកជាមុន ពួកគេពិតជាបានរួចរស់ជីវិតមែន។
ក្នុងគម្ពីរបរិសុទ្ធបាននិយាយអំពីមហន្តរាយឬទុក្ខវេទនាមួយដែលកំពុងជិតមកដល់ ដោយប្រាប់ថា៖ «នឹងមានទុក្ខវេទនាជាខ្លាំង ដែលមិនធ្លាប់មានតាំងពីកំណើតពិភពលោករហូតដល់ឥឡូវនេះ ហើយក៏នឹងមិនមានដូច្នោះទៀតឡើយ»។ (ម៉ាថាយ ២៤:២១) ប៉ុន្តែ មហន្តរាយនេះមិនមែនជាការបំផ្លាញចោលផែនដីដោយសារស្នាដៃរបស់មនុស្ស ឬដោយសារមហន្តរាយធម្មជាតិណាមួយឡើយ ពីព្រោះព្រះមានគោលបំណងឲ្យផែនដីនៅស្ថិតស្ថេរជារៀងរហូត។ (សាស្ដា ១:៤) ផ្ទុយទៅវិញ ទុក្ខវេទនាជាខ្លាំងដែលជិតមកដល់នោះ គឺជាទង្វើរបស់ព្រះដើម្បី«បំផ្លាញពួកអ្នកដែលកំពុងបង្ខូចផែនដី»។ ព្រះនឹងបំផ្លាញចោលមនុស្សអាក្រក់ហើយបំបាត់ការឈឺចាប់ទាំងអស់។ (ការបើកបង្ហាញ ១១:១៨; សុភាសិត ២:២២) ពេលនោះពិតជាពេលដ៏អស្ចារ្យមែន!
បន្ថែមទៀត ការបំផ្លាញចោលដែលជិតមកដល់នេះខុសគ្នាពីស៊ូណាមី ការរញ្ជួយដី ឬការផ្ទុះភ្នំភ្លើង ពីព្រោះការបំផ្លាញនេះនឹងមិននាំឲ្យមនុស្សស្លូតត្រង់ស្លាប់ឡើយ។ គម្ពីរចែងថា៖ «ព្រះគឺជាសេចក្ដីស្រឡាញ់» ហើយនាមរបស់ព្រះគឺយេហូវ៉ា។ លោកបានសន្យាថា៖ «ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះជានិច្ច»។ (យ៉ូហានទី១ ៤:៨; ទំនុកតម្កើង ៣៧:២៩) ក៏ប៉ុន្តែ តើតាមរបៀបណាយើងអាចរួចរស់ជីវិតពីគ្រាទុក្ខវេទនាជាខ្លាំង ហើយទទួលពរតាមសេចក្ដីសន្យារបស់ព្រះ? កត្ដាសំខាន់គឺ: ចូរធ្វើតាមការព្រមានដែលបានត្រូវប្រាប់ទុកជាមុន!
ចូរត្រៀមខ្លួនសម្រាប់ការផ្លាស់ប្ដូរដ៏ធំ!
យើងមិនអាចដឹងអំពីពេលកំណត់នៃទីបញ្ចប់របស់មនុស្សអាក្រក់និងទុក្ខវេទនាបានទេ។ ហេតុអ្វី? ពីព្រោះលោកយេស៊ូមានប្រសាសន៍ថា៖ «គ្មានអ្នកណាដឹងថ្ងៃនិងម៉ោងនោះឡើយ។ សូម្បីតែបណ្ដាទេវតានៅស្ថានសួគ៌ និងបុត្ររបស់ព្រះក៏មិនជ្រាបដែរ។ មានតែបិតាដែលស្ថិតនៅស្ថានសួគ៌ប៉ុណ្ណោះដែលជ្រាប»។ យ៉ាងណាក៏ដោយ លោកយេស៊ូបានលើកទឹកចិត្តយើងថា៖ «ចូរចាំយាម»។ (ម៉ាថាយ ២៤:៣៦; ២៥:១៣) តើយើងចាំយាមអំពីអ្វី? គម្ពីរប្រាប់យើងអំពីព្រឹត្ដិការណ៍ឬស្ថានភាពផ្សេងៗដែលនឹងកើតឡើងក្នុងពិភពលោក មុនដែលព្រះនាំឲ្យមានទីបញ្ចប់។ ដូចទឹកសមុទ្រនាចខុសពីធម្មតា បានធ្វើឲ្យពួកអ្នកកោះស៊ីមឺលូដឹងថាស៊ូណាមីជិតមកដល់ហើយ នោះព្រឹត្ដិការណ៍ផ្សេងៗដែលនឹងនាំឲ្យពិភពលោកផ្លាស់ប្ដូរយ៉ាងខ្លាំង ក៏ជាសញ្ញាប្រាប់យើងឲ្យដឹងដែរថាទីបញ្ចប់ជិតមកដល់ហើយ។ ប្រអប់ក្នុងអត្ថបទនេះប្រាប់យើងអំពីព្រឹត្ដិការណ៍ខ្លះដែលនាំឲ្យមានការផ្លាស់ប្ដូរដ៏ធំនោះ។
ពិតមែនតែធ្លាប់មានព្រឹត្ដិការណ៍ខ្លះក្នុងប្រអប់នេះបានកើតឡើងដោយឡែកពីគ្នា តែលោកយេស៊ូបានមានប្រសាសន៍ថាពេលដែល«ការទាំងអស់នេះ»កើតឡើង នោះយើងនឹងដឹងថាទីបញ្ចប់កាន់តែជិតមកដល់ហើយ។ (ម៉ាថាយ ២៤:៣៣) ដូច្នេះ សូមសួរខ្លួនអ្នកថា ‹តើនៅពេលណាក្នុងប្រវត្ដិសាស្ត្រដែលការទាំងអស់នេះក្នុងគម្ពីរបាន (១) កើតឡើងនៅទូទាំងពិភពលោក (២) កើតឡើងនៅពេលដំណាលគ្នា និង(៣) កើតឡើងកាន់តែអាក្រក់យ៉ាងខ្លាំង?›។ ពិតណាស់ នៅសព្វថ្ងៃនេះ យើងពិតជាកំពុងរស់នៅគ្រាចុងបញ្ចប់មែន។
នេះជាការបង្ហាញពីសេចក្ដីស្រឡាញ់របស់ព្រះ
អតីតប្រធានាធិបតីសហរដ្ឋអាម៉េរិកម្នាក់និយាយថា៖ «ការព្រមានទុកជាមុន . . . ប្រាកដជាសង្គ្រោះជីវិតមនុស្ស»។ ក្រោយពីមានរលកយក្សស៊ូណាមីក្នុងឆ្នាំ២០០៤ នោះប្រព័ន្ធប្រកាសអាសន្នមួយបានត្រូវរៀបចំឡើង ដើម្បីព្រមានប្រជាជននៅតំបន់ទាំងនោះទុកជាមុន។ ជាលទ្ធផល មនុស្សអាចជៀសវាងពីការបាត់បង់ជីវិតដូចមុនទៀត។ ស្រដៀងគ្នាដែរ ព្រះបានរៀបចំឲ្យមានការព្រមានទុកជាមុនដើម្បីសង្គ្រោះជីវិតយើង មុនដែលទីបញ្ចប់មកដល់។ ជាឧទាហរណ៍ គម្ពីរបានប្រាប់ទុកជាមុនថា៖ «ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។—ម៉ាថាយ ២៤:១៤
គ្រាន់តែឆ្នាំមុននេះ សាក្សីព្រះយេហូវ៉ាបានចំណាយពេលជាង១,៩ពាន់លានម៉ោងក្នុងការផ្សព្វផ្សាយដំណឹងល្អនៅ២៤០ប្រទេស និងជាង៧០០ភាសា។ នៅសព្វថ្ងៃនេះ ការជឿនទៅមុខយ៉ាងខ្លាំងខាងកិច្ចផ្សព្វផ្សាយជាភ័ស្តុតាងរឹងមាំដែលបញ្ជាក់កាន់តែច្បាស់ថាទីបញ្ចប់គឺជិតមកដល់ហើយ។ ដោយសារសាក្សីព្រះយេហូវ៉ាស្រឡាញ់អ្នកជិតខាង ពួកគេខំព្យាយាមព្រមានមនុស្សឯទៀតអំពីថ្ងៃវិនិច្ឆ័យរបស់ព្រះដែលមកកាន់តែកៀកណាស់ហើយ។ (ម៉ាថាយ ២២:៣៩) តាមពិតការព្រមាននេះអាចជួយសង្គ្រោះជីវិតអ្នក ហើយនេះក៏ជាភ័ស្តុតាងដែលបង្ហាញថាព្រះយេហូវ៉ាស្រឡាញ់អ្នក។ សូមចាំថា«[ព្រះ]មិនចង់ឲ្យអ្នកណាត្រូវបំផ្លាញចោលឡើយ តែចង់ឲ្យមនុស្សទាំងអស់មានឱកាសប្រែចិត្ត»។ (ពេត្រុសទី២ ៣:៩) តើអ្នកនឹងស្រឡាញ់ព្រះវិញហើយធ្វើតាមការព្រមានដែលលោកបានប្រាប់ទុកជាមុនឬទេ?
ចូររត់ទៅកន្លែងដែលមានសុវត្ថិភាព!
សូមចាំថា ពេលដែលពួកអ្នករស់នៅតាមឆ្នេរកោះស៊ីមឺលូបានឃើញទឹកសមុទ្រនាចទៅវិញខុសពីធម្មតា នោះពួកគេបានរត់ទៅរកកន្លែងខ្ពស់ដើម្បីមានសុវត្ថិភាព ពួកគេមិនបានរង់ចាំទាល់តែទឹកសមុទ្រជោរមកវិញទេ។ ដោយសារពួកគេបានចាត់វិធានការភ្លាមៗនោះបានសង្គ្រោះជីវិតពួកគេ។ ដើម្បីអ្នកអាចរួចរស់ជីវិតពីគ្រាទុក្ខវេទនាជាខ្លាំង អ្នកត្រូវតែរត់ទៅកន្លែងដែលខ្ពស់ក្នុងន័យធៀប មុនដែលហួសពេល។ តើតាមរបៀបណា? ព្រះបានដឹកនាំអ្នកប្រកាសទំនាយអេសាយឲ្យកត់ទុកនូវសេចក្ដីអញ្ជើញដ៏គួរឲ្យជំរុញចិត្តក្នុងអំឡុងថ្ងៃ«ជាន់ក្រោយបង្អស់» ជាគ្រាដែលយើងកំពុងរស់នៅសព្វថ្ងៃនេះ។ គាត់សរសេរថា៖ «ចូរយើងឡើងទៅឯភ្នំនៃព្រះយេហូវ៉ា . . . ទ្រង់នឹងបង្រៀនយើងពីផ្លូវរបស់ទ្រង់ នោះយើងនឹងដើរតាមផ្លូវទាំងនោះ»។—អេសាយ ២:២, ៣
ជាធម្មតា ការឡើងទៅលើភ្នំអាចជួយយើងឲ្យមានសុវត្ថិភាព និងអាចមើលឃើញអ្វីៗដែលកើតឡើងនៅខាងក្រោម។ ស្រដៀងគ្នាដែរ តាមរយៈគម្ពីរ មនុស្សរាប់លាននាក់នៅទូទាំងពិភពលោកកំពុងរៀនឲ្យស្គាល់ផ្លូវរបស់ព្រះ ហើយទទួលប្រយោជន៍ដោយកែប្រែរបៀបរស់នៅរបស់ពួកគេឲ្យប្រសើរឡើង។ (ធីម៉ូថេទី២ ៣:១៦, ១៧) ដោយធ្វើដូច្នេះ ពួកគេចាប់ផ្ដើម‹ដើរតាមផ្លូវរបស់ព្រះ› ហើយទទួលការពេញចិត្តនិងការការពារពីលោក។
តើអ្នកចង់ទទួលយកសេចក្ដីអញ្ជើញនោះ ហើយឲ្យព្រះដែលប្រកបដោយសេចក្ដីស្រឡាញ់ការពារអ្នកនៅគ្រាលំបាកនេះឬទេ? យើងសូមលើកទឹកចិត្តអ្នកឲ្យពិនិត្យមើលភ័ស្តុតាងច្បាស់លាស់ពីគម្ពីរអំពី«គ្រាចុងក្រោយបង្អស់»ដែលមានក្នុងប្រអប់អត្ថបទនេះ។ សាក្សីព្រះយេហូវ៉ាក្នុងតំបន់របស់អ្នក សប្បាយចិត្តជួយអ្នកឲ្យយល់ថែមទៀតអំពីបទគម្ពីរ និងរបៀបអនុវត្តផងដែរ។ ម្យ៉ាងទៀត អ្នកអាចរកចម្លើយចំពោះសំណួរផ្សេងៗ ដោយចូលគេហទំព័រwww.mt711.com/km រួចចុច«អំពីយើង» ▸ «សំណួរដែលមនុស្សជាច្រើនសួរ»។
a នៅឆ្នាំ២០០៤ រលកយក្សស៊ូណាមីបានឆក់យកជីវិតមនុស្សជាង២២០.០០០នាក់។ នេះគឺជាវិនាសកម្មដ៏ធំបំផុតមួយក្នុងប្រវត្ដិសាស្ត្រដែលបង្កឡើងដោយស៊ូណាមី។
លោកអ្នកក៏ប្រហែលជាចូលចិត្តដែរ
ទស្សនាវដ្ដី
«ទីបញ្ចប់» តើនេះមានន័យអ្វី?
តើអ្នកដឹងទេថាអ្វីដែលគម្ពីរចែងអំពី«ទីបញ្ចប់»គឺជាដំណឹងល្អ?
