Щаба Кʹьтеба Пироз

 Ньхӧмандьн те һʹәсабе бь тʹәмами бькʹәвьнә бьне аве у дәрен. a Кʹьтеба Пирозда гәләк щар дәрһәԛа ньхӧмандьне те готьне (Кʹаред Шандийа 2:41). Мәсәла Иса ве йәке мәрʹа әʹйан дькә, чахе әԝ чʹәме Урдӧнеда һатә ньхӧмандьне (Мәтта 3:13, 16). Ӧса жи мәрьвәки Әтйопи һиви кьр кӧ ԝи бьньхӧминьн, чахе әԝана «гьһиштьнә авәки» (Кʹаред Шандийа 8:36-40).

 Иса тʹәми да кӧ һʹәму шагьртед ԝи гәрәке бенә ньхӧмандьне (Мәтта 28:19, 20). Һьнә ԝәхт шунда Пәтрусе шанди дәрһәԛа ве йәке гот (1 Пәтрус 3:21).

Ве готареда

•  Чь те һʹәсабе ньхӧмандьн?

•  Гәло Кʹьтеба Пироз һин дькә ԝәки зарʹа вьрʹни гәрәке бе ньхӧмандьне?

•  Чь те һʹәсабе бь наве Бав, бь наве Кӧрʹ у бь рʹӧһʹе пироз бенә ньхӧмандьне?

•  Гәло гӧнә йә кӧ щара дӧда бенә ньхӧмандьне?

•  Ньхӧмандьнед дәрһәԛа кʹижани Кʹьтеба Пирозда те готьне

•  Ньһерʹандьнед нәрʹаст дәрһәԛа ньхӧмандьне

 Чь те һʹәсабе ньхӧмандьн?

 Чахе мәрьв те ньхӧмандьне әԝ бәр мәрьва нишан дькә, кӧ гӧнә хԝә дайә рʹуйе хԝә у соз дьдә ԝәки ԝе ԛьрара Хԝәде бинә сери. Ӧса жи кӧ ԝе һәр тьштида гӧһ бьдә ԝи у кӧрʹе ԝи Иса Мәсиһ. Әԝ мәрьве кӧ те ньхӧмандьне хԝә ль рʹийа кӧ дьбә бәрбь жийина һʹәта-һʹәтайе дьгьрә.

 Кʹьтеба Пирозда ньхӧмандьн бәрамбәри дәфьнкьрьне дьбә (Рʹомайи 6:4; Колоси 2:12). Ньхӧмандьна аведа бь симболик те һʹәсабе, ԝәки мәрьв жийина хԝәйә бәре дьһелә у чаԝа мәрьве ну әʹмьре хԝә тʹәсмили Хԝәде дькә.

 Гәло Кʹьтеба Пироз һин дькә ԝәки зарʹа вьрʹни гәрәке бе ньхӧмандьне?

 Кʹьтеба Пирозда тʹӧ щийа найе готьне дәрһәԛа ньхӧмандьна зарʹа. b У нә жи әԝ һин дькә, кӧ зарʹа вьрʹни гәрәке бе ньхӧмандьне.

 Анәгори Кʹьтеба Пироз, һәнә чәнд тьштед сәрәкә йед кӧ мәрьв гәрәке бькә һәрге дьхԝазә бе ньхӧмандьне. Мәсәлә, әԝ гәрәке һинкьрьнед сәрәкә, йед кӧ Хәбәра Хԝәдеда ньвисаре фәʹм бькә у ль гора ԝан һинкьрьна бьжи. Ӧса жи әԝ гәрәке гӧне хԝә тʹобә кә у дӧада әʹмьре хԝә тʹәсмили Хԝәде бькә (Кʹаред Шандийа 2:38, 41; 8:12). Әԝ һʹәму тьшт зарʹа вьрʹни нькарә бькә.

 Чь те һʹәсабе бь наве Бав, бь наве Кӧрʹ у бь рʹӧһʹе пироз бенә ньхӧмандьне?

 Иса тʹәми да шагьртед хԝә, ԝәки әԝана «һәрʹьн һʹәму мьләта һин кьн у ԝана бь наве Бав, Кӧрʹ у Рʹӧһʹе Пироз бьньхӧминьн» (Мәтта 28:19, 20). «Бь наве» те һʹәсабе ԝәки мәрьве кʹижан кӧ те ньхӧмандьне гәрәке сәрԝертийа Бав у Кӧрʹ ԛәбул кә, ӧса жи рола рʹӧһʹе пироз. Мәсәлә, Пәтрус ӧса готә мәрьве кӧ жь буйине тʹопал бу: «Бь наве Иса Мәсиһе Ньсрәте рʹабә бьгәрʹә» (Кʹаред Шандийа 3:6). Жь хәбәред Пәтрус те кʹьфше кӧ әԝи сәрԝертийа Иса ԛәбул дькьр у мәрьвед дьнрʹа әԝе йәке әʹйан дькьр.

•   «Бав» те готьне сәр Хԝәде Йаһоԝа c. Йаһоԝа Әʹфьрандар у Хԝәдайе Һьмзор ә у сәрԝертийа ԝи бесинор ә (Дәстпебун 17:1; Әʹйанти 4:11).

•   «Кӧрʹ» әԝ Иса Мәсиһ йә, йе кӧ әʹмьре хԝә чаԝа ԛӧрбан бона мә да (Рʹомайи 6:23). Әм хьлазбуне дькарьн тʹәне бь сайа ве йәке бьстиньн, һәрге фәʹм дькьн у ԛәбул дькьн рола Иса, йа кӧ тʹәви ԛьрара Йаһоԝа һьндава инсанәте гьредайи йә (Йуһʹәнна 14:6; 20:31; Кʹаред Шандийа 4:8-12).

•   «Рʹӧһʹе пироз» әԝ ԛәԝата Хԝәде йә. d Бь сайа рʹӧһʹе хԝәйи пироз Хԝәде һәр тьшт әʹфьранд, әʹмьр да әʹфринед хԝә, мьзгини пʹехәмбәрарʹа у мәрьвед дьнрʹа дәрбаз дькьр, ӧса жи ԛәԝате дьда ԝан ԝәки әԝана бькарьбьн ԛьрара ԝи биньн сери (Дәстпебун 1:2; Ибо 33:4; Рʹомайи 15:18, 19). Хенщи ве йәке, Хԝәде бь сайа рʹӧһʹе хԝәйи пироз фькьред хԝә дәрбази ԝан мәрьва дькьр, йед кӧ Кʹьтеба Пироз дьньвисин (2 Пәтрус 1:21).

 Гәло гӧнә йә кӧ щара дӧда бенә ньхӧмандьне?

 Иро гәләк бәлабуйи йә кӧ мәрьв религийа хԝә бьгӧһезьн. Ле һәрге мәрьве кӧ ида дерәкида һатийә ньхӧмандьне у диса щарәке бе ньхӧмандьне, гәло әв йәк ԝе ча гӧнә бе һʹәсабе? Һьнәк ԝе бежьн «әре» ль гора Әфәси 4:5, кʹидәре те готьне: «Хӧдан йәк ә, баԝәри йәк ә, ньхӧмандьн йәк ә». Ле бь рʹасти әԝ хәбәр найенә һʹәсабе, кӧ мәрьв нькарә щара дӧда бе ньхӧмандьне. Гәло чьма?

 Контекст: Жь контекста Әфәси 4:5 те кʹьфше, ԝәки Паԝлос дьхԝәст бьгота кӧ ньһерʹандьн у баԝәрийа һʹәму Мәсиһийед рʹаст гәрәке йәк бә (Әфәси 4:1-3, 16). Әв йәкти тʹәне бь сайа ве йәке дькарә бе стандьне, һәрге һәр кәс Рʹебәрәки ԛәбул кьн, демәк Иса Мәсиһ; баԝәрийа хԝә һинкьрьнед сәрәкә биньн у дәʹԝакьрьнед һьндава ньхӧмандьне рʹаст фәʹм бькьн у биньн сери.

 Кʹьтеба Пирозда те гьликьрьне дәрһәԛа дәрәщәке, чахе Паԝлос чәнд мәрьва һелан кьр щара дӧда бенә ньхӧмандьне. Әԝ йәк лазьм бу, чьмки чахе әԝ мәрьв щара пешийе һатьбун ньхӧмандьне, әԝана һинкьрьнед Иса Мәсиһ бь тʹәмами фәʹм нәдькьрьн (Кʹаред Шандийа 19:1-5).

 Дәʹԝакьрьнед сәрәкә бона ньхӧмандьне. Сәва кӧ Хԝәде ньхӧмандьна мә ԛәбул кә, занәбуна мә гәрәке сәр һʹиме рʹастийа Кʹьтеба Пироз бә (1 Тимотʹейо 2:3, 4). Һәрге мәрьв сәр һʹиме ԝан һинкьрьна һатийә ньхӧмандьне йед кӧ мьԛабьли Кʹьтеба Пироз ьн, Хԝәде ԝе ньхӧмандьна ԝи ԛәбул нәкә (Йуһʹәнна 4:23, 24). Дьԛәԝьмә мәрьв бь дьл у нета рʹаст һатьбу ньхӧмандьне, «ле әв йәк бе занәбун» бу (Рʹомайи 10:2). Ләма жи сәва кӧ Хԝәде ньхӧмандьна ԝи мәрьви ԛәбул кә, әԝ гәрәке рʹастийа Кʹьтеба Пироз һин бә, әʹмьре хԝәда бьдә хәбате, хԝә тʹәсмили Хԝәде кә у паше диса бе ньхӧмандьне. Ве дәрәщеда ньхӧмандьна ԝи мәрьви ԝе ча гӧнә нәйе һʹәсабе, ле әԝ йәк ԝе гавәкә фәрз бә әʹмьре ԝида.

 Ньхӧмандьнед дәрһәԛа кʹижани Кʹьтеба Пирозда те готьне

 Кʹьтеба Пирозда нә тʹәне дәрһәԛа ньхӧмандьна бьне аведа те готьне, ле ӧса жи дәрһәԛа щурʹе ньхӧмандьнед дьн. Дина хԝә бьдьнә чәнд мәсәла.

 Ньхӧмандьнед Йуһʹәннайе Ньхӧмдар. e Йуһʹәннайе Ньхӧмдар Щьһуйа у мәрьве кӧ бунә Щьһу, бь симболик ньхӧманд чьмки әԝана гӧне хԝә данә рʹийе хԝә жь бо ве йәке, кӧ мьԛабьли Ԛануна Муса дәркʹәтьбун—Ԛануна кӧ Хԝәде бь сайа Муса дабу Исраелийа. Әԝ ньхӧмандьн мәрьва бона ве йәке һазьр кьр, кӧ әԝана Мәсиһ ԛәбул кьн, демәк Исайе жь Ньсрәте (Луԛа 1:13-17; 3:2, 3; Кʹаред Шандийа 19:4).

 Ньхӧмандьна Иса. Ньхӧмандьна Иса ньхӧмандьнәкә мәхсус бу. Иса йәки беԛьсур бу у әԝи гӧна нәдькьр (1 Пәтрус 2:21, 22). Ләма жи ньхӧмандьна ԝи нә ль гора тʹобәкьрьн йан жи хԝәстьна «исафа рʹьһʹәт» бу (1 Пәтрус 3:21). Бь ньхӧмандьна хԝә әԝи да кʹьфше кӧ әʹмьре хԝә дьдә дәсте Хԝәде у һазьр ә чаԝа Мәсиһ ԛьрара Ԝи бинә сери. Әв йәк ӧса жи дьһатә һʹәсабе, кӧ әԝе әʹмьре хԝә сәва мәрьва бәрва бьдә (Ибрани 10:7-10).

 Ньхӧмандьна бь рʹӧһʹе пироз. Чаԝа Йуһʹәннайе Ньхӧмдар ӧса жи Иса Мәсиһ дәрһәԛа ньхӧмандьна бь рʹӧһʹе пироз дьготьн (Мәтта 3:11; Луԛа 3:16; Кʹаред Шандийа 1:1-5). Ньхӧмандьн у ньхӧмандьна бь наве рʹӧһʹе пироз, мина һәв ниньн (Мәтта 28:19). Гәло чь фьрԛи ортʹа ԝан һәйә?

 Тʹәне һьнә жь пәйчуйед Иса бь рʹӧһʹе пироз тенә ньхӧмандьне. Әԝана бь рʹӧһʹе пироз һатьнә кʹьфшкьрьне, чьмки әԝана ԝе тʹәви Иса чаԝа һәмпʹадшә у кʹаһин сәр әʹрдерʹа сәрԝертийе бькьн f (1 Пәтрус 1:3, 4; Әʹйанти 5:9, 10). Бь милйона пәйчуйед Иса гӧмана кʹижана жийина һʹәта-һʹәтайе йә сәр әʹрде щьнәте, ԝе бьбьнә бьнәлийед ве Пʹадшатийе (Мәтта 5:5; Луԛа 23:43).

 Ньхӧмандьна Исада у мьрьна ԝида. Мәрьвед кӧ бь рʹӧһʹе пироз тенә ньхӧмандьне бь «Мәсиһ Исада һатьнә ньхӧмандьне» (Рʹомайи 6:3). Әԝ ньхӧмандьн сәва ԝан кәса йә, кʹе ԝе тʹәви Иса сәр әʹзмана сәрԝертийе бькьн, демәк йед кʹьфшкьри. Әԝ йәк те һʹәсабе кӧ әԝана дьбьнә әндәмед «бәдәна ԝи», у Иса сәре Бәдәне йә (1 Корьнтʹи 12:12, 13, 27; Колоси 1:18).

 Йед кʹьфшкьри ӧса жи «мьрьна ԝида һатьнә ньхӧмандьне» (Рʹомайи 6:3, 4). Әԝана чʹәʹв дьдьнә Иса у рʹӧһʹе хԝәԛӧрбанкьрьне дьдьнә кʹьфше у инкʹар дькьн мәщала кӧ һʹәта-һʹәтайе сәр әʹрде бьжин. Ньхӧмандьна ԝан мьрьна Исада бь симболик ԝи чахи хьлаз дьбә, чахе әԝана дьмьрьн у тенә сахкьрьне, сәва кӧ сәр әʹзмана бьжин (Рʹомайи 6:5; 1 Корьнтʹи 15:42-44).

 Ньхӧмандьна бь агьр. Йуһʹәннайе Ньхӧмдар ӧса готә ԝан, кʹе гӧһ дьда ԝи : «[Иса] ԝә бь рʹӧһʹе пироз у бь агьр бьньхӧминә. Һащәта g ԝи дәсте ԝида йә у әԝе бедәра h хԝә паԛьж кә. Әԝе гәньм ль әʹмбара тʹоп кә у кайе бьшәԝьтинә бь агьре кӧ натәмьрә» (Мәтта 3:11, 12). Ньхӧмандьна бь агьр у ньхӧмандьна бь рʹӧһʹе пироз жь һәв щӧдә дьбьн. Ле бь ве йәке Йуһʹәнна чь дьхԝәст бьгота?

 Гәньм сәр ԝан кәса те готьне, кʹе гӧһ дьдьнә Иса у гӧра ԝи дькьн. Ԝанрʹа мәщал вәдьбә кӧ бь рʹӧһʹе пироз бенә ньхӧмандьне. Ле кайе сәр ԝан мәрьва те готьне, йед кӧ гӧһ надьнә Иса. Әԝана ԝе бь агьр бенә ньхӧмандьне, демәк сәр һʹәта-һʹәтайе бенә кʹӧтакьрьне (Мәтта 3:7-12; Луԛа 3:16, 17)