Kuswalela ki kezo ya kutuhelela sifosi. Mwa Bibele, linzwi la Sigerike lelitolokilwe kuli “kuswalela” litalusa “kutuhelela,” sina mutu ya tuhela kubata tifo yahae ku mutu ya mukolotezi. Jesu naaitusisize mutala wo hanaaluta balateleli bahae mwakulapelela, naaize: “Uluswalele libi zaluna, kakuli ni luna luswalela mutu kaufela yalufoseza.” (Luka 11:4) Ka mukwa oswana, mwa nguli ya mutanga yasina makeke, Jesu naabapanyize kuswalela kwa kufelisa sikoloti.—Mateu 18:23-35.

 Lubonisa kuli luswalezi babañwi haiba lutuhela kuba ni ndimbelela ni halusa tundameni kuli mutu yalufoselize alulife kabakala butuku boluutwa kamba nto yeñwi yelusinyehezwi. Bibele iluta kuli lilato ki lona lelitahisa kuli mutu aswalele habuniti, bakeñisa kuli lilato “halina ndimbelela.”—1 Makorinte 13:4, 5.

Kuswalela hakutalusi:

•   Kutuhelela mafosisa. Bibele inyaza batu babaanga kuli likezo zemaswe ki zende.—Isaya 5:20.

•   Kuicanganisa inge kuli hakuna mafosisa aezizwe. Mulimu naaswalezi libi zetuna zanaaezize Mulena Davida, kono naasika musileleza kwa lika zemaswe zene zwile mwa likezo zahae. Mane Mulimu naalumelelize kuli libi za Davida liñolwe mwa Bibele ilikuli luitute kwa mafosisa ahae.—2 Samuele 12:9-13.

•   Kutabela kueziwa maswe. Ka mutala, luungeni kuli mukolotisize mutu yomuñwi masheleñi, kono yena waasinya ni kupalelwa kumilifa sina mwanaa sepiselize. Uikutwa hahulu bumaswe mi umikupa kuli mumuswalele. Mwakona kuketa kumuswalela ka kusaba ni ndimbelela, kusa kuta-kutela kuambolanga ka za teñi hamuli ni yena, mi mane mwendi mwakona kufelisa sikoloti seo. Nihakulicwalo, mwakona kuikatulela kusa mukolotisa masheleñi amañwi hape.—Samu 37:21; Liproverbia 14:15; 22:3; Magalata 6:7.

•   Kuswalela kusina libaka leliutwahala. Mulimu haswalelangi batu babaezanga sibi kabomu ni babahananga kuitumelela mafosisa abona, kucinca mupilelo wabona, kamba kuhana kukupa swalelo kwa batu beba foselize. (Liproverbia 28:13; Likezo 26:20; Maheberu 10:26) Batu babacwalo baba salati kubakela libi zabona babanga lila za Mulimu, mi haabati kuli luswalele batu basika swalela.—Samu 139:21, 22.

   Kucwañi haiba hamusika eziwa hande ki mutu yomuñwi mi uhana kukupa swalelo kamba mane kulumela kuli ufosize? Bibele ilueleza kuli: “Lisela buhali mi utuhele mabifi.” (Samu 37:8) Nihaike kuli hamusika tabela mafosisa aezizwe, musike mwahalifa hahulu. Mube ni sepo ya kuli Mulimu uka kutiseza mutu yo. (Maheberu 10:30, 31) Hape mwakona kuomba-ombiwa ki kuziba kuli Mulimu usepisa kuli kukaba ni nako yelusike lwautwanga butuku bolukona kuutwa ka nako ya cwale.—Isaya 65:17; Sinulo 21:4.

•   “Kuswalela” nihaiba lika zenyinyani. Fokuñwi, mwa sibaka sa kuswalela mutu yalufoselize, lwakona pili kunyakisisa ka za haiba lunani libaka luli la kuikutwa kuli mutu yo ulufoselize. Bibele ibulela kuli: “Usike waakufa kuhalifa, kakuli kuhalifa ki sisupo sesizibahaza sikuba.”—Muekelesia 7:9, litaluso ze kwatasi.

Zekona kulutusa kuswalela babañwi

1.   Muhupule ze kuama kuswalela. Hamutabeli mafosisa aezizwe kamba kuicanganisa inge kuli hakuna zeezahalile—mu atuhelela feela.

2.   Mulemuhe bunde bomukona kufumana hamuswalela. Kusahalifa ni kusaba ni ndimbelela kwakona kumitusa kuwa pilu, kuba ni buikangulo bobunde, ni kuekeza kwa tabo yamina. (Liproverbia 14:30; Mateu 5:9) Mane nto ya butokwa hahulu nikufita kikuli, kuswalela babañwi ki kona kokutahisa kuli Mulimu ni yena aswalele libi zamina.—Mateu 6:14, 15.

3.   Mube ni kutwelo butuku. Kaufelaa luna halusika petahala. (Jakobo 3:2) Sina feela halutabela kuswalelwa, ni luna luno swalelanga mafosisa a babañwi.—Mateu 7:12.

4.   Mube ni kutwisiso. Haiba lunani libaka la kutongoka halufoselizwe, lwakona kuitusisa kelezo ya mwa Bibele yeli: “Muzwelepili kutuhelelana.”—Makolose 3:13.

5.   Mutatulule butata kapili. Kufita kuzwelapili kuhalifiswa ki mafosisa aezize mutu yomuñwi, mueze momukonela kaufela kuli muswalele mutu yo.—Maefese 4:26, 27.