Mwanuke umo wamwene mwishi utamba mu Tyapu keumweka pamo bwa makumbi. Walanga’mba kitungo kya ino tyapu i kupunga makumbi. Kubulwa kwivwanija kutyetye kwa uno mwanuke kubwanya kusepeja. Ino kubulwa kwivwanija kukatampe kubwanya kwikala na lupusa pa būmi bwetu. Kimfwa, kutanga bibi byobya bilembelwe pa lawa kubwanya kuleta makambakano makatampe.

Kwivwana bibi myanda ya ku mushipiditu kubwanya kuleta makambakano makatampe kupita. Kimfwa, bantu bamo bāivwene bibi bufundiji bwa Yesu. (Yoano 6:48-68) Pa kyaba kya kuyukila’ko bikwabo, ino abo bāpela byonso byādi bifundija Yesu. Bine bābudilwe bivule kashā!

Lelo utañanga Bible mwanda wa akuludike? Tubakufwija’ko. Inoko le kodi mutanwe mu kyaka kya kwivwana bibi bintu bimo byokodi mutange? Nankyo kudipo bunka. Tala myanda isatu ivwananga bantu bingi.

• Bantu bamo kebevwanijepo musoñanya wa mu Bible wa amba, “akamwa Leza.” Balañanga amba i moyo mubimubi wa kuzakala Leza unenenwe pano. (Musapudi 12:13) Inoko Leza kasakengapo boba bamutōta bakwatwe moyo uno muswelo. Unena’mba: “Kokakwatwapo moyo, mwanda ndi nobe kokizumbazumbapo, mwanda ami ne Leza obe, nkakukomeja; eyo, nkakukwasha.” (Isaya 41:10) Kuno kwakamwa Leza kushintulula’tu kumulēmeka bininge.

• Bantu bavule batangakanyanga bino binenwa bya ku mushipiditu bya amba: “Bintu byonsololo’tu bidi ne mwaka wabyo, . . . kudi kitatyi kya kubutulwa, ne kitatyi kya kufwa.” Bafulanga ku kunena’mba Leza i mutunge kala kitatyi kifwaninwe kufwa muntu ne muntu. (Musapudi 3:1, 2) Inoko, uno vese aye wisambilanga pa mushintyilanga būmi ne kulombola amba muntu ense i wa kufwa. Kadi Kinenwa kya Leza kitufundija amba butyibi botutyiba bubwanya kulēpeja nansha kwipipija būmi bwetu. Kimfwa, tutanga’mba: “Kwakamwa Yehova kulēpeja mafuku.” (Nkindi 10:27; Ñimbo ya Mitōto 90:10; Isaya 55:3) Muswelo’ka? Kimfwa, kulēmeka Kinenwa kya Leza kuketutonona tuleke bilongwa bimo bileta misongo, pamo bwa bunkolwankolwa ne busekese.—1 Kodinda 6:9, 10.

• Bamo kebevwanijangapo biyampe panena Bible amba madiulu ne ntanda “bibikīlwe mudilo,” ke bafule ku kunena’mba Leza ukonakanya uno umbuo. (2 Petelo 3:7) Inoko Leza ulaile amba kakonakanyapo nansha dimo ino nshi. Leza “wādije byalwilo bya panopanshi, amba kepakikajinapo nyeke.” (Ñimbo ya Mitōto 104:5; Isaya 45:18) Nanshi ntanda ikonakanibwa ke inopo nshi’i, ino i ngikadilo ya bintu mibi ya ino ntanda ikonakanibwa lonso bwa ayo yasōkwa mu mudilo. Pa mwanda utala madiulu, shi besambila pa ano amweka’a, abwanya kufinkila pa diulu dya ñenyenye, mu lwelele, nansha momwa mushikete Leza. Pa bino i kutupu nansha kimo kikonakanibwa.

Enka mowekimwena kupityila ku bino bimfwa, bantu bavudile kwivwana bibi bisonekwa byobatanga mu Bible. Mwanda waka Leza wibilekele namino? Bamo babwanya kulanga’mba: ‘Shi Leza udi na tunangu tonso ne muyuke byonso, nanshi wadi wa kwitupa dibuku mulembelwe bintu patōkelela mu muswelo upēlelwa muntu yense kwivwana. Mwanda waka kālongelepo namino?’ Tala bubinga busatu bulengeja bantu bevwane bibi Bible.

1. Bible i mulembelwe kwivwanwa na bantu betyepeje ne badi na mutyima wa kwifunda’ye. Yesu wātendele Shandi amba: “Nakutendela ku meso a bonso, a Tata, Mfumu wa diulu ne ntanda,  mwanda ubafi fyē bino bintu ku ba tunangu ne bafunde ino ubasokwela’byo twana tutyetye.” (Luka 10:21) Bible i mulembwe mu uno muswelo mwanda wa boba badi na mumweno muyampe bevwanije musapu wandi. Bantu ba mitatulo—kato kene kavudile kwikala na bantu ba “tunangu ne bafunde”—kebevwanangapo Bible senene. Ino bantu batanga Bible na mutyima wa “twana tutyetye”—betyepeje bakimba kuyuka—bekalanga na dyese dya kwivwana senene musapu wa Leza. Bine, Leza wālembeje Bible na bunwa!

2. Bible i mulembelwe bantu bampikwa budimbidimbi basaka Leza ebakwashe pa kumwivwana. Yesu wānenene amba bantu bafwaninwe kukwashibwa pa kwivwanija ne pa mfulo byaādi wibafundija. Le bādi ba kukwashibwa namani? Yesu amba: “Mukwashi, mushipiditu ujila, ukatumwa na Tata mu dijina dyami, ye ukemufundija bintu byonso.” (Yoano 14:26) O mwanda Leza upānanga mushipiditu wandi ujila ke bukomo bwandi bwingila kadi—mwanda wa kukwasha bantu bevwanije byobya byobatanga mu Bible. Inoko Leza kapānangapo mushipiditu wandi ku bantu kebakulupilepo mu bukwashi bwandi, o mwanda kobadi, Bible i mukutakane. Kadi mushipiditu ujila wa Leza utononanga bene Kidishitu bayukile bivule bakwashe boba bakimba kwivwanija bya binebine.—Bilongwa 8:26-35.

3. Bantu babwanya kwivwanija myanda imo ya mu Bible enka pa kitatyi kifwaninwe. Kimfwa, mupolofeto Danyele bāmulombwele asoneke myanda ya mu mafuku a kumeso. Mwikeulu wāmusapwidile amba: “Danyele fya binenwa bya, lamika mukanda, ne ku kyaba kya kumfulo’kwa.” Mu bula bwa myaka tutwa na tutwa, bantu bavule bādi batanga mukanda wa Danyele ino kwiwivwanija senene mpika. Na bubine, enka ne Danyele mwine kāivwanijepo bintu bimo byaādi ulemba. Wānenene na kwityepeja amba: “Naivwana, ino kwivwanijapo mpika.” Ke mwenda mafuku, ebiya bantu ke bevwanija senene bupolofeto bwa Leza bwālembelwe na Danyele, kadi napo i enka pa kitatyi kitungwe na Leza. Mwikeulu wāshintulwile amba: “Enda dyobe shobe, abe Danyele; mwanda binenwa i bifibwe, ne kulamikwa, poso’nka ku kyaba kya kumfulo’kwa.” Pene’po i bāni badi ba kwivwanija musapu wa Leza? “Nansha umo mwine wa bapupakane ukevwanija; nanshi boba badi ne ñeni bakevwanija.” (Danyele 12:4, 8-10) Pa kino Leza usokolanga buluji bwa myanda imo ya mu Bible enka shi kitatyi kifwaninwe kibabwana.

Lelo kitatyi ke kilengeje Batumoni ba Yehova nabo bakomenwe kwivwana senene Bible? En-en. Ino shi kitatyi kya Leza kusokola myanda patōka kibabwana, Batumoni bajadikanga bukidibukidi mwivwanino wabo. Bakulupile amba kulonga uno muswelo i kwiula batumibwa ba Kidishitu, bene bādi bajadika na kwityepeja milangwe yabo shi Yesu webalēmununa.—Bilongwa 1:6, 7.

Milangwe ya mwanuke itala pa kokwa kutamba makumbi ibwanya kwikala bu kubulwa kwivwanija kutyetye. Inoko kubulwa kwivwanija byobya bifundija Bible i mwanda mukatampe. Musapu wa mu Bible i wa mvubu mpata, keulombepo kwiivwanina’o’tu enka na butangi bwa Bible bwa muntu mwine. Nanshi kimba bukwashi pa kwivwanija byobya byotanga. Kimba boba befunda Bible na kwityepeja, bantu balomba bidi mushipiditu ujila wa Leza pa kwivwanija Bible, boba bakulupile amba kitatyi kitungile Leza ke kibwane kya kwivwanija Bible kupita mafuku kunyuma. Kokekaka kwisamba na Batumoni ba Yehova nansha kutanga pa diteba dya jw.org byobya byobasokwele pa kupwa kulonga bukimbi na katentekeji. Bible ulaya’mba: ‘Shi wikale na kwivwanija, nabya ukatana kuyukidija Leza.’—Nkindi 2:3-5.