Nabutwidilwe mu Paddington, kipindi kya bantu bavule mu Londoni, Angeletele. Twadi tushikata na mama ne bakaka bami basatu. Tata wadi’tu, i’nka kyaba twamumona, kyaba wajimina mwanda wa bunkolwankolwa bwandi.

Pa bwanuke, mama wamfundije kulombela kyolwa ne kyolwa. Nadi na Kabible katyetye kadi’mo’tu enka Ñimbo ya Mitōto, nadi ñimba’yo ne kwimba. Navuluka musemwa umo onatangile mu dibuku dya ntanda wantulumwine, wa amba: “Difuku dimo kudi ne kufwa.” Bino binenwa byalengeje mbulwe tulo kenangulukila pa būmi bwa kumeso. Kenena’mba, ‘Na bubine būmi bufwaninwe kwikala bulampe.’ ‘Mwanda waka ngidi’ko?’ Nadi na moyo wa kufwa!

Nasenswe bininge bya majende. Nadi ntompa kwisamba na bafwe, kwenda ku bibundu na bakwetu ba ku masomo, ne kutala nabo mafilime alenga nzuba. Twadi twibimona bu bisangaja koku kadi bileta moyo.

Nashilwile kulongakana ponadi’tu na myaka dikumi. Naalula kutoma mfwanka, na pano kala namunwa nayo. Mwenda mafuku naanza kutoma ne dyamba. Ponabwenye myaka 11, naanza kutoma malwa. Nansha byokeadipo ansangaja, ino nadi’ko nsaka kukolwa. Kadi nadi nsenswe minjiki ne luja. Nadi ñenda kitatyi kyonso kyonsaka ku mafetyi ne ku bala bufuku. Nadi momboloka bufuku pa kwenda’ko ne kujoka lubanga kepatōkele. Byonadi mbūka na bukōke, nadi nyema nyeke ku masomo. Kadi shi ngidi’ko, nadi ntoma malwa, mwadimu papo ufundija.

Mu mwaka wami wa mfulo ku masomo napona. Mama byakadipo uyukile konafudile na mwiendelejo wami mubi, watyumukilwe mutyima ne kundobela. Twepotomeja, nafula ne ku kunyema kwinjibo. Papo, nakashikete bidi kwa Tony, kishinka kyami wadi Rasta. Tony wadi mu kisumpi kya bantapani, wadi upotoloja dyamba kadi wadi uyukene bu muntu wa bukalabale. Na pano kala naimita ne kubutula wetu mwana mwana-mulume, ami papo na myaka 16 kete.

Twetene dibajinji na Batumoni ba Yehova ponadi nshikata ku hotela ya bainabana bampikwa kusongwa ne babo bana. Baumpele’ko kyumba kudi ba lupusa ba mu kibundi. Batumoni babidi bana-bakaji badi bapempula kyaba ne kyaba bainabana bakwabo banuke. Difuku dimo twesamba nabo. Nadi nsaka kwibatuluja’mba i babi. Inoko balondolola bipangujo byami byonso na butūkanye ne mu muswelo upēla kupityila ku Bible. Badi biyampe kadi batūkanye, kino kyo kine kyaunsangeje bininge. Ye kyonaitabijije nami kwifunda nabo Bible.

Ne kwija mpika, nefunda bintu mu Bible byashintyile būmi bwami. Tamba pa bwanuke, nadi ntyina kufwa. Ino nasokwele bufundiji bwa Yesu butala pa lusangukilo! (Yoano 5:28, 29) Kadi nefundile amba Leza untele mutyima. (1 Petelo 5:7) Natengelwe bininge na binenwa bidi mu Yelemia 29:11, binena’mba: “Mwanda ami ndyukile milangwe yo nalanga ko mudi, milangwe ya ndoe, ke ya bibipo, ehe; kwimupa lukulupilo ne ku myaka yonso ya kumeso, i Yehova unena.” Nakulupila amba mbwanya nami kukekala nyeke mu Paladisa pano pa ntanda.—Ñimbo ya Mitōto 37:29.

Batumoni ba Yehova banombwele buswe bya binebine. Ponakatenwe musunsa umbajinji ku kupwila, leka, kwadi nsangaji kadi kuyampe—bonso badi besamba bya bulunda! (Yoano 13:34, 35) Byadi bishile kulampe na byobadi banonga ku kipwilo kyetu. Batumoni bauntambwile nansha byonadi na būmi bufwe. Badi bantele mutyima, bampempula ne kunkwasha bininge mu miswelo palapala. Nemwene amba pano naikala mu kisaka kikatampe kya buswe.

Kupityila ku kifundwa kya Bible, nayukile amba mfwaninwe kushinta mu būmi bwami mwanda wa kwiendeja mungya misoñanya ya Leza ya peulu ya mu mwikadilo. Kuleka kutoma mfwanka kekwadipo kupēla. Kitatyi kimo, namwene amba kudi minjiki imo inkankamika kutoma dyamba, pene’pa naleka kwiivwana. Pa kuleka kukolwa, nalekele kwenda ku mafetyi ne ku bala ya bufuku kwine kwadi kubwanya kunengeja ñanze kutoma monka. Ebiya nakimba balunda bakwabo badi na ngikadilo miyampe ne babwanya kunkwasha ngikale nyeke biyampe.—Nkindi 13:20.

Papo, Tony nandi washilula kwifunda Bible na Batumoni ba Yehova. Batumoni byobadi balondolola bipangujo byandi kupityila ku Bible, nandi waitabije bubine bwaadi wifunda. Washintyile bininge mu būmi bwandi: watamba mu kisumpi kya ba bukalabale, waleka ne mingilo yandi ya butapani, kadi waleka ne kutoma dyamba. Pa kusangaja Yehova bininge, twamwene amba tufwaninwe kuleka mwikadilo wetu mubi mwa kutamijija bana betu mu būmi buyampe. Mu 1982, twesonga.

Mvulukanga monadi nkimbila bishinte mu mapepala a Kiteba kya Mulami ne mu Réveillez-vous ! * adi’mo nsekununi ya bantu babwenye kushinta enka na monadi nsakila nami kushinta. Bimfwa byabo byankankamikile! Namwene bukomo bwa kwendelela na kulwa pampikwa kuzoza. Nadi nomba nyeke Yehova na’mba kakingela. Ami ne Tony twabatyijibwe bu Batumoni ba Yehova mu Kweji 7, 1982.

Kusamba bulunda na Yehova Leza kwapandije būmi bwami. Kadi ami ne Tony twi bemwene bukwashi bwa Yehova mu bitatyi bya makambakano. Twi befunde kukulupila mudi Leza mu bino bitatyi, kadi twi bamone amba bine witukwashanga nyeke ne kulela kyetu kisaka.—Ñimbo ya Mitōto 55:22.

Naikele na nsangaji ya kukwasha betu bana, mwana-mulume ne mwana-mukaji bayuke Yehova na momuyukile. Pano ngivwananga nsangaji pa kumona babo bana nabo bayukila’ko Leza.

Tulo ketukimpungapo na moyo wa kulangalanga būmi bwa kumeso nansha lufu. Ami ne Tony tudi na bivule bya kulonga potwenda yenga ne yenga mu bipwilo palapala bya Batumoni ba Yehova mwanda wa kwibakankamika. Tufundijanga nabo pamo bantu amba shi balombole lwitabijo mudi Yesu, nabya nabo bakamona būmi bwa nyeke.