Muma ok ti gi wach mar “golo ich” kowuoyo kuom golo nyathi e ich ka kinde minyuolee pok ochopo. Kata kamano, ndiko mang’eny manie Muma nyisowa kaka Nyasaye neno ngima mar dhano, moriwo nyaka mar nyathi ma pok onyuol.

Ngima en mich mowuok kuom Nyasaye. (Chakruok 9:6; Zaburi 36:9) Oneno ngima kaka gima duong’ ahinya, to mano oriwo nyaka ngima mar nyathi ma pod nie ich. Omiyo, ka ng’ato onego nyathi ma pok onyuol goyiem, ikwane kaka janek.

Chik ma ne Nyasaye omiyo Jo-Israel ne wacho niya: “Ka po ni ji ariyo gore mi gihinyo dhako mayach kae to dhakono onyuol ka ndalone podi, to dhakono kata nyathine ok otho, ng’at ma ne ohinyeno nyaka chul gima chwor dhakono biro wachone; nochul kaluwore gi kaka jobura ong’ado. To ka achiel kuomgi otho, nyaka chul ngima kar ngima.”​—Wuok 21:22, 23. *

•  Ngima mar dhano chakorega karang’o?

•  Be Nyasaye nyalo ng’wonone ng’at mogolo ich?

•  Be en gima rach golo ich ka ngima miyo kata mar nyathi ni kama rach?

Nyasaye neno ni ngima dhano chakorega sama omak ich. E Muma, Nyasaye neno nyathi ma pok onyuol kaka ng’ato. Ne ane ranyisi moko ma nyiso ni Nyasaye neno nyathi manie ich kod ma osenyuol e yo machal.

• Ka itaye gi roho maler, Ruoth Daudi nonyiso Nyasaye niya: “Ne inena ka pod ichueya e ich.” (Zaburi 139:16) Nyasaye ne neno Daudi kaka ng’ato kata ka ne pok onyuole.

• E wi mano, Nyasaye nong’eyo ni odhi miyo Jeremia migawo makende kata ka ne pok onyuol Jeremia. Nyasaye nowachone niya: “Ka ne pok achueyi e ich, ne aseng’eyi, ka ne pok onyuoli, ne asepwodhi. Ne aketi janabi ne ogendni.”​—Jeremia 1:5.

• Luka ma ne en jandik Muma kendo laktar notiyo gi wach achiel e dho Grik kowuoyo kuom nyathi ma pok onyuol gi nyathi ma osenyuol.​—Luka 1:41; 2:12, 16.

Nyasaye nyalo ng’wonone joma osegolo ich. Ka sani koro giserwako paro ma Nyasaye nigo e wi ngima, chunygi ok onego ochandgi. “Jehova en Nyasaye mang’won kendo ma kecho ji . . . Osewito kethowa mabor kodwa mana kaka wuok chieng’ bor gi podho chieng’.” * (Zaburi 103:8-12) Jehova biro ng’wonone ji duto moloko chunygi gadier kuom richo ma gisetimo, to mano oriwo nyaka jogo ma ne ogolo ich.​—Zaburi 86:5.

Kaluwore gi gima Muma wacho e wi ngima mar nyathi ma pok onyuol, ng’ato ok nyal golo ich nikech oparo ni ngima mar nyathi kata mar min-gi nyalo bedo kama rach.

To nade kochopo sama idwaro nyuol nyathi to chuno ni oyier e kind reso ngima mar nyathi kata mar min-gi ? E chal kaka mano, joma wachno omako e ma nigi ting’ mar yiero ni gibiro reso ngima mar miyo koso mar nyathi.