Иисус Христосын колымыжым шарнымаш касым палемдымына годым (тудым эше Господьын кас кочкышыжо але Шолып кас маныт) ме чылажымат Библий почеш ыштена (1 Коринфян-влаклан 11:20). Вес религий-влакым ончалаш гын, Шарнымаш кас дене кылдалтше нунын йӱлашт Библиеш огеш негызлалт.

 Господьын кас кочкышыштыжо ме Иисус Христосым шарналтена да тудын мемнам тӱлен налмыжлан тауштымашым ончыктена (Матфейын 20:28; 1 Коринфян-влаклан 11:24). Тиде пайремлымаш ала-могай таинстве але суапым кондышо але языкым проститлаш полшышо религиозный йӱла огыл *. Библий дене келшышын, Юмо языкнам ала-могай религиозный йӱлалан кӧра огыл, а Христослан ӱшанымашлан кӧра веле кудалтен кертеш (Римлян-влаклан 3:25; 1 Иоаннын 2:1, 2).

 Иисус тунемшыж-влаклан Господьын кас кочкышыжым палемдаш кӱштен, но ийыш мыняр гана тидым ышташ кӱлеш, каласен огыл (Лукан 22:19). Иктышт шонат, пуйто Кас кочкышым кажне тылзын эртарыман, а весышт шонат, пуйто тидым кажне арнян, кажне кечын, кечеш икмыняр гана але кумыл лекме годым кажне гана ыштыман. Но ты шотышто ӱлнӧ возымым шотыш налман.

 Иисус Господьын кас кочкышыжым палемдымым еврей Кугечым пайремлыме кечын пуртен; варажым ту кечыштак тудо колен (Матфейын 26:1, 2). Тиде тыглай гына лийын огыл. Священный Возымаште Иисусын кондымо надырже кугече пача дене таҥастаралтеш (1 Коринфян-влаклан 5:7, 8). Кугечым ийыш ик гана палемденыт (Исход 12:1—6; Левит 23:5). Тидын семынак икымше христиан-влак Христосын колымыжым шарнымаш касым ийыш ик гана палемденыт *. Иегован Таныкше-влак икымше христиан-влак гай ыштат.

 Иисусын икымше Кас кочкышым кузе эртарымыже мыланна умылаш полша, ийыш мыняр гана тудым палемдыман да кунам тидым ыштыман — могай кечын да кечын могай жапыштыже. Иисус тиде пайремлымым м. э. 33-шо ийын 14-ше нисан тылзын (библийысе тылзе календарь почеш) кече шичме деч вара пуртен (Матфейын 26:18—20, 26). Меат икымше христиан-влак семын кажне ийын тиде кечынак Шарнымаш касым палемдена *.

 М. э. 33-шо ийын 14-ше нисан кугарнян лийын гынат, кажне ийын тиде дате вашталтеш да арнян тӱрлӧ кечылан толын кертеш. 14-ше нисан могай кечын лиеш пален налашлан ме икымше курымышто илыше еҥ-влак гаяк шотлена. Тугодым ме тугай методым она кучылт, кудыжым тачысе еврей календарьым возашлан кучылтыт *.

 У пайремым пуртымыж годым Иисус кугече кас кочкыш деч вара кодшо ру деч посна кӱктымӧ киндым да йошкар аракам кучылтын (Матфейын 26:26—28). Тудын примерже почеш ме Шарнымаш касыште тыгай киндым кучылтына, кудыштыжо ру уке да ниможат моло ок ешаралт. Тыгак ме йошкар аракам кучылтына. Тиде виноград сок огыл, тыгай йошкар аракаш сакыр ден тӱрлӧ специйым огыт пыште да спиртым огыт ешаре.

 Южо религийлаште ру дене шуктымо киндым кучылтыт. Но Библийыште ру чӱчкыдын языкым але пужлымым ончыкта (Лукан 12:1; 1 Коринфян-влаклан 5:6—8; Галат-влаклан 5:7—9). Сандене Христосын сулыкдымо капшылан келшен толшо символ тыгай гына кинде лийын кертеш, кудыштыжо ру уке да тылеч моло нимомат ешарыме огыл (1 Петрын 2:22). Тыгак йошкар арака олмеш тыглай виноград сокым кучылтмаш Библийлан келшен ок тол. Алкогольым йӱаш ок йӧрӧ манын шонен, южо черке-влак виноград сокым кучылтыт, но тыгай чарымаш Библийын туныктымыжлан келшен ок тол (1 Тимофейлан 5:23).

 Ру деч посна кӱктымӧ кинде да йошкар арака Шарнымаш касыште Христосын кап ден вӱржым ончыктышо символ-влак улыт. Южышт шонат, пуйто кинде ден йошкар арака ала-кузе кап ден вӱрыш савырнат але нунын дене ушалтыт. Молан тиде Библийлан келшен ок тол, доказательстве-влакым ончен лектына.

•   Иисус тунемшыж-влаклан тудын вӱржым йӱаш кӱшта ыле гын, тыге тудо нуным вӱрым кочкаш чарыше Юмын законжым пудырташ тарата ыле (Тӱҥалтыш 9:4; Апост. пашашт 15:28, 29). Но тидым Иисус кӱштен кертын огыл, молан манаш гын, тудо вӱрын святостьшо нерген Юмын законжым пудырташ нигунамат ок тарате ыле (Иоаннын 8:28, 29).

•   Апостол-влак Иисусын вӱржым чынжымак йӱыныт ыле гын, тудо нунылан вӱржӧ йоктарыме лиеш манын ок каласе ыле. Тыге каласымыж дене тудо эше лийшаш колымыжо нерген палдарен (Матфейын 26:28, УТ).

•   Иисус шкенжын илышыжым надыреш «ик гана гына» конден (Еврей-влаклан 9:25, 26). Шарнымаш касыште кинде ден йошкар арака тудын кап ден вӱрышкыжӧ савырнат гын, лектеш, киндым кочкышо да йошкар аракам йӱшӧ-влак угыч да угыч Иисусым надыреш кондат.

•   «Мыйым шарнен, тыге ыштыза» каласымыж дене Иисус тунемшыж-влаклан тудым надыреш кондаш огыл, а тудын нерген шарнаш кӱштен (1 Коринфян-влаклан 11:24).

 Кинде ден йошкар арака Иисусын кап ден вӱрышкыжӧ савырнат манын шонышо еҥ-влак шке ончалтышыштым икмыняр библийысе почеламутеш негызлат. Мутлан, шуко кусарымаште йошкар арака нерген Иисусын мутшым тыге кусарыме: «Тиде — Мыйын... Вӱрем» (Матфейын 26:28). Но Иисусын мутшым тыгак «тиде капемым ончыкта» манын кусараш лиеш. Иисус чӱчкыдын туштен ойлен (Матфейын 13:34, 35).

 Шарнымаш касым пайремлыме годым южо Иегован Таныкше-влак веле киндым кочкыт да йошкар аракам йӱыт. Молан?

 Иисус Христосын йоктарыме вӱржӧ негызеш Иегова Юмо «у сугыньым» ыштен. Тиде у сугынь акрет годсо Израиль калык ден Юмо кокласе сугыньым алмаштен (Еврей-влаклан 8:10—13). Шарнымаш кас годым йошкар аракам йӱын да киндым кочкын кертыт тыгай еҥ-влак гына, кӧ дене тиде у сугынь ыштыме лийын. Тиде чыла христиан огыл, а нуно веле, кӧм Юмо ойырен налын (Еврей-влаклан 9:15; Лукан 22:20). Нине еҥ-влак Христос дене пырля каваште вуйлаташ тӱҥалыт. Библий дене келшышын, тиде 144 000 еҥ веле лиеш (Лукан 22:28—30; Почмаш 5:9, 10; 14:1, 3).

 Христос дене вуйлаташ тӱҥалше еҥ-влак «изи кӱтӱш» пурат, но мемнан кокла гыч шукышт «моткоч шуко калык» коклаш пураш да мландыште курымеш илаш ӱшанат (Лукан 12:32; Почмаш 7:9, 10). Мландыште илаш ӱшаныше еҥ-влак киндым огыт коч да йошкар аракам огыт йӱ гынат, Шарнымаш касыш миен, Иисусын надыржылан тауштымашым ончыктен кертыт (1 Иоаннын 2:2).