Meta l-Adoloxxent Tiegħek Jibda Jiddubita mit-Twemmin Tiegħek
Fatturi Essenzjali għall-Hena fil-Familja
Meta l-Adoloxxent Tiegħek Jibda Jiddubita mit-Twemmin Tiegħek
Huma u jimmaturaw, ħafna żgħażagħ jagħżlu li jadottaw ir-reliġjon tal-ġenituri tagħhom. (2 Timotju 3:14) Iżda, xi wħud jagħżlu li ma jadottawhiex. X’tistaʼ tagħmel jekk bintek jew ibnek li qed jikber jibda jiddubita mit-twemmin tiegħek? Dan l-artiklu se jiddiskuti kif ix-Xhieda taʼ Ġeħova jittrattaw maʼ sfida bħal din.
“Ma rridx insegwi r-reliġjon tal-ġenituri tiegħi iktar. Qtajt qalbi.”—Cora, li għandha 18-il sena. *
INT tinsab konvint li r-reliġjon tiegħek tgħallem il-verità dwar Alla. Temmen li l-Bibbja toffri l-aqwa mod taʼ ħajja. Għalhekk, huwa naturali li int tipprova ddaħħal dawn il-valuri f’qalb ibnek. * (Dewteronomju 6:6, 7) Imma xi ngħidu jekk, hekk kif jikber, ibnek jitlef l-interess fl-affarijiet spiritwali? Xi ngħidu jekk jibda jiddubita mill-istess fidi li donnu aċċetta bil-ħerqa meta kien tifel?—Galatin 5:7.
Jekk dan hu l-każ, tikkonkludix li fallejt bħala ġenitur Kristjan. Jistaʼ jkun hemm fatturi oħrajn involuti, kif se naraw. Però, kun af dan: Il-mod kif tirreaġixxi għad-dubji taʼ ibnek jistaʼ jagħmel id-differenza bejn jekk hux se jagħżel li jersaq eqreb lejn il-fidi tiegħek jew jitbiegħed iktar minnha. Jekk int taġixxi qisek dieħel f’xi battalja kontra ibnek minħabba din il-problema, se jkollok taqbida diffiċli ferm—taqbida li wisq probabbli se titlef.—Kolossin 3:21.
Ikun bil-wisq aħjar li tagħti kas it-twissija tal-appostlu Pawlu. Hu kiteb: “Ilsir tal-Mulej m’għandux għalfejn jiġġieled, imma għandu jkun ġentili maʼ kulħadd, kwalifikat biex jgħallem, iżomm ruħu mrażżan.” (2 Timotju 2:24) Kif tistaʼ turi li int ‘kwalifikat biex tgħallem’ jekk l-adoloxxent tiegħek jibda jiddubita mit-twemmin li tħaddan?
Idħol fil-Qalba tal-Kwistjoni
L-ewwel, ipprova agħraf liema affarijiet jistgħu jkunu qed jinfluwenzaw il-ħarsa taʼ ibnek. Pereżempju:
▪ Iħossu waħdu u bla ħbieb fil-kongregazzjoni Kristjana? “Peress li ridt il-ħbieb, bdejt nagħmilha ħafna maʼ xi wħud mill-iskola, u dan fixkel it-tkabbir spiritwali tiegħi għal snin sħaħ. Tlift
l-interess fl-affarijiet spiritwali l-iktar minħabba l-assoċjazzjoni ħażina, u issa hemm ħafna affarijiet li jiddispjaċini għalihom.”—Lenore, li għandha 19-il sena.▪ Għandu nuqqas taʼ fiduċja fih innifsu, u għalhekk isibha bi tqila biex jitkellem dwar il-fidi tiegħu? “Meta kont l-iskola kont inżomm lura milli naqsam it-twemmin tiegħi maʼ sħabi tal-klassi. Bżajt li jarawni bħala wieħed stramb jew xi ‘qaddis.’ Kwalunkwe persuna li kienet differenti kienet tiġi mwarrba, u ma ridtx li dan jiġri lili.”—Ramón, li għandu 23 sena.
▪ Iħossu li ma jiflaħx għar-responsabbiltà li jgħix fi qbil mal-livelli Kristjani? “Inħoss bħallikieku l-wegħda tal-Bibbja taʼ ħajja taʼ dejjem tinsab fuq nett taʼ taraġ għoli, u jien għadni lanqas irfist fuq l-ewwel tarġa; qiegħda ’l bogħod ħafna minnha. Tant nibżaʼ nibda nitlaʼ t-taraġ li ġieli ħsibt dwar li nċedi l-fidi tiegħi.”—Renee, li għandha 16-il sena.
Tkellmu Dwarha
X’tistaʼ tkun il-vera problema li l-adoloxxent tiegħek qed jiffaċċja? L-aqwa mod kif issir taf hu billi tistaqsih! Iżda, oqgħod attent li d-diskussjoni ma tinbidilx malajr f’argument. Minflok, segwi t-tħeġġiġ f’Ġakbu 1:9: ‘Kun ħafif biex tismaʼ, tqil biex titkellem, tqil biex tinkorla.’ Kun paċenzjuż miegħu. Uża ‘l-paċenzja kollha u l-arti tat-tagħlim,’ l-istess kif kieku tagħmel maʼ xi ħadd barra l-familja.—2 Timotju 4:2.
Pereżempju, jekk ibnek ma jridx jiġi l-laqgħat Kristjani, ipprova sir af jekk hemmx xi ħaġ’oħra li qiegħda ddejqu. Imma agħmel dan bil-paċenzja. Ma tantx jinkiseb ġid mill-ġenitur fis-sitwazzjoni li ġejja.
Iben: M’għadnix inħobb immur il-laqgħat.
Missier: [ton ostili] Xi trid tgħid biha ma tħobbx tmur?
Iben: Idejquni!
Missier: Hekk tħossok dwar Alla? Idejqek? Ma jinteressanix! Sakemm tgħix taħt is-saqaf tagħna, se tiġi magħna—trid jew ma tridx.
Alla jistenna li l-ġenituri jgħallmu lil uliedhom dwaru u li t-tfal jobdu lill-ġenituri tagħhom. (Efesin 6:1) Madanakollu, int ma tridx li ibnek sempliċement isegwi r-rutina spiritwali tiegħek b’mod mekkaniku u li kontra qalbu jiġi miegħek il-laqgħat Kristjani. Jekk inhu possibbli, tixtiequ jiġi minn qalbu u jkun moħħu hemm.
Għandek iktar ċans li twettaq dan jekk tidħol fil-qalba tal-kwistjoni u tara x’jistaʼ jkun li qed iżid mal-attitudni tiegħu. B’dan f’moħħna, ikkunsidra kif il-konversazzjoni t’hawn fuq setgħet saret b’mod iktar effettiv.
Iben: M’għadnix inħobb immur il-laqgħat.
Missier: [bil-kalma] Għala tħossok hekk?
Iben: Idejquni!
Missier: Vera, tistaʼ tiddejjaq toqgħod bilqiegħda għal siegħa jew sagħtejn. Imma x’inhi l-iktar ħaġa li ssib taʼ sfida int?
Iben: Jien naf? Naħseb nippreferi nkun xi mkien ieħor.
Missier: L-istess iħossuhom il-ħbieb tiegħek?
Iben: Xi ħbieb huma? Dik hi l-problema! M’għandix ħbieb—jew imissni ngħid, m’għadx għandi. Mindu siefer sieħbi, inħoss li m’hemm ħadd li nistaʼ nitkellem miegħu! Kulħadd qed jieħu gost minbarra jien. Inħossni bħal ħuta barra mill-ilma!
“Kun Paċenzjuż!” li tinsab hawn taħt.
Billi joħroġ dak li kien hemm f’qalb l-adoloxxent, il-missier fis-sitwazzjoni t’hawn fuq mhux biss jasal fil-qalba tal-kwistjoni—li f’dan il-każ kienet li t-tifel ħassu waħdu—imma wkoll jibni l-fiduċja, u b’hekk iħalli l-bieb miftuħ għal iktar diskussjonijiet.—Ara l-kaxxaMaż-żmien, ħafna żgħażagħ jindunaw li jekk jegħlbu l-isfidi li qed iżommuhom milli jikbru spiritwalment, huma ġeneralment se jħossuhom aħjar kemm dwarhom infushom kif ukoll dwar il-fidi tagħhom. Ikkunsidra lil Ramón, żagħżugħ ikkwotat qabel li żamm lura milli jidentifika lilu nnifsu bħala Kristjan fl-iskola. Eventwalment, Ramón sab li ma kienx trawmatiku daqskemm ħaseb li jitkellem dwar il-fidi tiegħu—anke meta dan wassal għal twaqqigħ għaċ-ċajt. Hu jirrakkonta:
“Darba minnhom tifel fl-iskola kien qed jaqbad miegħi minħabba r-reliġjon tiegħi. Tgħidx kemm ħassejtni ansjuż, u indunajt li l-klassi kollha kienet qed tismaʼ. Imbagħad iddeċidejt li ndawwar id-diskussjoni fuqu u nistaqsi lilu dwar il-fidi tiegħu. Bqajt skantat meta rajt li hu kien saħansitra iktar ansjuż minni! Imbagħad irrealizzajt li ħafna żgħażagħ għandhom twemmin reliġjuż, imma ma jifhmuhx. Għall-inqas jien kapaċi nispjega t-twemmin tiegħi. Fil-verità, meta niġu biex nitkellmu dwar il-fidi, sħabi tal-klassi jmisshom iħossuhom skomdi—mela jien!”
IPPROVA DAN: Oħroġ dak li hemm f’qalb ibnek billi tistaqsih kif iħossu dwar li jkun Kristjan. Fl-opinjoni tiegħu, x’inhuma l-benefiċċji? X’inhuma l-isfidi? Hemm iktar benefiċċji milli sfidi? Jekk iva, b’liema mod? (Marku 10:29, 30) L-adoloxxent tiegħek jistaʼ jikteb il-ħsibijiet tiegħu fuq karta billi jagħmel żewġ kolonni—tax-xellug għall-isfidi u tal-lemin għall-benefiċċji. Li jara ħsibijietu bil-miktub jistaʼ jgħin lil ibnek jidentifika x’inhi l-problema tiegħu u jsib soluzzjoni.
“Il-Qawwa tar-Raġuni” tal-Adoloxxent Tiegħek
Il-ġenituri u l-esperti raw li hemm differenza kbira bejn il-mod kif jaħsbuha t-tfal żgħar u l-mod kif jaħsbuha l-adoloxxenti. (1 Korintin 13:11) Waqt li t-tfal żgħar ġeneralment jaħsbu b’mod konkret, bl-iswed jew bl-abjad, l-adoloxxenti għandhom it-tendenza li jirraġunaw dwar l-affarijiet b’mod iktar astratt. Pereżempju, tifel żgħir jistaʼ jiġi mgħallem li Alla ħalaq l-affarijiet kollha. (Ġenesi 1:1) Madanakollu, adoloxxent għandu mnejn jissielet maʼ mistoqsijiet bħal: ‘Kif naf li hemm Alla? Alla taʼ mħabba għala jippermetti l-ħażen? Kif jistaʼ jkun veru li Alla minn dejjem eżista?’—Salm 90:2.
Forsi tħoss li mistoqsijiet bħal dawn jirrappreżentaw pass lura fil-fidi taʼ ibnek. Iżda, fir-realtà jistgħu jirrappreżentaw pass ’il quddiem. Wara kollox, il-mistoqsijiet jistgħu jkunu aspett importanti tat-tkabbir spiritwali taʼ Kristjan.—Atti 17:2, 3.
Iktar minn hekk, ibnek qed jitgħallem juża “l-qawwa tar-raġuni” tiegħu. (Rumani 12:1, 2) B’hekk, hu jistaʼ jifhem “il-wisaʼ u t-tul u l-għoli u l-fond” tal-fidi Kristjana b’tali mod li sempliċement ma setax bħala tifel. (Efesin 3:18) Iktar minn qatt qabel, issa hu ż-żmien biex tgħin lil ibnek jirraġuna fuq it-twemmin tiegħu ħalli jkun jistaʼ jiżviluppa konvinzjonijiet sodi rigward il-fidi tiegħu.—Proverbji 14:15; Atti 17:11.
IPPROVA DAN: Mur lura għall-affarijiet bażiċi maʼ ibnek, erġgħu ddiskutu suġġetti li int—u hu—forsi tarawhom bħala ovvji. Pereżempju, qanqlu jaħseb fuq mistoqsijiet bħal: ‘X’jikkonvinċi lili li hemm Alla? X’evidenza nara jien li Alla jimpurtah minni? Għala nħoss li dejjem se jaħbatli tajjeb jekk nobdi l-liġijiet t’Alla?’ Oqgħod attent li ma timponix l-opinjonijiet tiegħek fuq ibnek. Minflok, għinu jiżviluppa l-konvinzjonijiet tiegħu stess. B’dan il-mod se jsibha eħfef li jibni l-fiduċja fit-twemmin tiegħu.
“Emmint Għax Sirt Konvint li Hu Minnu”
Il-Bibbja titkellem dwar iż-żagħżugħ Timotju li kien jaf il-kitba qaddisa ‘mindu kien tarbija.’ Però, l-appostlu Pawlu ħeġġeġ lil Timotju: “Kompli f’dak li tgħallimt u li emmint għax sirt konvint li hu minnu.” (2 Timotju 3:14, 15) Bħal Timotju, ibnek forsi ġie mħarreġ fil-livelli tal-Bibbja mit-twelid. Imma issa għandek bżonn tgħinu jsir konvint ħalli jiżviluppa l-konvinzjonijiet tiegħu stess.
Il-ktieb Questions Young People Ask—Answers That Work, Volume 1, jgħid: “Dment li ibnek ikun għadu jgħix taħt l-istess saqaf tiegħek, int għandek id-dritt titolbu josserva r-rutina spiritwali tiegħek. Però, fl-aħħar mill-aħħar, il-mira tiegħek hi li tnaqqax imħabba għal Alla f’qalb ibnek—mhux li sempliċement iġġiegħlu jaġixxi b’mod mekkaniku.” Billi żżomm din il-mira f’moħħok, int tkun tistaʼ tgħin lil ibnek isir ‘sod fil-fidi’ ħalli l-verità tal-Bibbja ssir il-mod tal-ħajja tiegħu—mhux biss tiegħek. *—1 Pietru 5:9.
[Noti ta’ taħt]
^ par. 4 L-ismijiet f’dan l-artiklu ġew mibdulin.
^ par. 5 Biex ikun eħfef, se nirreferu għall-adoloxxent fil-maskil f’dan l-artiklu. Imma l-prinċipji diskussi japplikaw kemm għall-ġuvintur u kemm għat-tfajliet.
^ par. 40 Għal iktar informazzjoni, ara It-Torri tal-Għassa tal-1 taʼ Lulju, 2009, paġni 18-20, u l-ktieb Questions Young People Ask—Answers That Work, Volume 1, paġni 315-318.
STAQSI LILEK INNIFSEK . . .
▪ Kif nirreaġixxi meta ibni jibda jiddubita mit-twemmin tiegħi?
▪ Kif nistaʼ nuża l-materjal f’dan l-artiklu biex intejjeb il-mod kif nirreaġixxi?
[Kaxxa f’paġna 19]
Imqarrqin?
Ħrafa: Ġenituri li huma Xhieda taʼ Ġeħova jġiegħlu lil uliedhom isegwu l-fidi tagħhom.
Fatt: Ġenituri li huma Xhieda jistinkaw biex idaħħlu sew f’qalb uliedhom imħabba għal Alla, eżatt kif il-Bibbja tikkmandahom jagħmlu. (Efesin 6:4) Minkejja dan, huma jirrealizzaw li meta t-tifel isir adult, hu se jagħmel għażla persunali rigward il-qima. —Rumani 14:12; Galatin 6:5.
[Kaxxa/Stampa f’paġna 20]
Kun Paċenzjuż!
Jistaʼ jkollok bżonn ħafna paċenzja meta titkellem mal-adoloxxent tiegħek. Imma meta tara lil ibnek jafdak iktar u iktar, se tara li l-isforz hu taʼ min jagħmlu. Żagħżugħa tirrakkonta: “Darba filgħaxija għedt lil missieri li bil-moħbi kelli paġna fuq netwerk soċjali, kelli għarus, u ridt naħrab mid-dar. Veru baqaʼ kalm hekk kif iddiskuta kollox miegħi! Ma nafx missier ieħor li kien jibqaʼ bilqiegħda u ma jibdiex jgħajjat maʼ bintu meta jsir jaf li kienet bieset ġuvni u li kienet qed tibgħatlu messaġġi l-ħin kollu. Inħoss li m’hemm xejn li ma nistax ngħid lil missieri. Naf li verament irid jgħinni.”
[Kaxxa f’paġna 21]
L-Importanza taʼ Xi Ħadd li Jistaʼ Jkun t’Eżempju Għalih
Kultant, iż-żgħażagħ jiġu megħjunin meta adult barra miċ-ċirku tal-familja jkun sors taʼ inkuraġġiment għalihom. Taf lil xi ħadd li bil-mod kif iħares lejn l-affarijiet spiritwali jistaʼ jkun t’għajnuna għal ibnek? Għala ma tagħmilx arranġamenti biex iqattgħu xi ħin flimkien? L-iskop tiegħek mhuwiex li tfarfar ir-responsabbiltà li għandek. Imma ftakar f’Timotju. Hu bbenefika bil-kbir mill-eżempju tal-appostlu Pawlu, u Pawlu bbenefika bil-kbir minn sieħbu Timotju.—Filippin 2:20, 22. *
[Nota ta’ taħt]
^ par. 57 Mill-ktieb Questions Young People Ask—Answers That Work, Volume 1, l-edizzjoni tal-2011, paġna 318, pubblikat mix-Xhieda taʼ Ġeħova.