Biblia kijtojka ke itech tonalmej keman tatamitiya onkaskia kokolismej oso kokoxkayomej tein miakkan momoyauaskia (Lucas 21:11). Dios amo tetatsakuiltia ika nejon tetsaujkakokolismej. Tein melauj, ika iTaixyekanalis, Dios kiixpolos kokolis oso kokoxkayot, hasta tetsaujkakokolismej tein miakkan momoyauaj.

•  ¿Kijtojka Biblia ke onkaskiaj kokolismej tein noyampa momoyauaskiaj?

•  ¿Kemansa kintatsakuiltiani Dios taltikpakneminij ika se kokolis oso se kokoxkayot?

•  ¿Tetatsakuiltia Dios ika tetsaujkakokolismej tein noyampa momoyauaj?

•  ¿Ejkos tonal keman amo onkaskejok kokolismej tein noyampa momoyauaj?

•  Tajkuilolmej itech Biblia tein ika tajtouaj kokolis oso kokoxkayot

 Biblia amo senkis kijtojka ke onkaskiaj kokolismej oso kokoxkayomej tein momoyauaskiaj noyampa kemej kokolis COVID-19, sida oso gripe española. Sayoj ke kemaj kijtoj ke onkaskiaj “tetsaujkakokolismej” uan kokolismej tein temiktiaj (Lucas 21:11; Apocalipsis 6:8). Nejin kokolismej no kinextiskiaj ke tinentokej “itech tonalmej keman tatamitiya” oso tonalmej keman “tamitiya tein mochiujtok itech taltikpak” (2 Timoteo 3:1; Mateo 24:3).

 Biblia kijtoua ke kemansa Dios kintatsakuiltij taltikpakneminij ika se kokolis oso se kokoxkayot. Kemej neskayot, kichiuak maj sekin kinkuini lepra (Números 12:1-16; 2 Reyes 5:20-27; 2 Crónicas 26:16-21). Sayoj ke, nejin tein kemansa panok amo katkaj kokolismej tein kinijtakoj akin amo kichiujkaj tein amo kuali, ta Dios ijkon kintatsakuiltij akin kiixnamikkaj.

 Amo. Sekin kijtouaj ke Dios kintatsakuiltia taltikpakneminij ika tetsaujkakokolismej tein noyampa momoyauaj uan okseki taman kokolismej. Sayoj ke amo yejua nejon tein Biblia tamachtia. ¿Keniuj tikmatij?

 Se taman, porin sekin itekitikauan Dios akin nenkej ne uejkauj uan itech nejin tonalmej kokolispeuanij. Itech 1 Timoteo 5:23 moijtoua ke se itekitikauj Dios akin monotsaya Timoteo achichika mokokouaya. Sayoj ke Biblia amo kijtoua ke kipanouaya nejon porin Dios kualantoya iuan. Axkan no ijkon panoua. Seki itekitikauan Dios kipiaj tataman kokolismej oso kokoxkayomej. Miakpa, yejuan momauanij porin yanij kansaika kampa amo kimatiaj ke yetoya aksa akin mokokouaya (Eclesiastés 9:11).

 Uan no, Biblia tamachtia ke ayamo ejko tonal keman Dios kintatsakuiltis akin amo yolkualmej. Axkan tinentokej itech “tonal keman Dios temakixtia”, tein kijtosneki, keman Dios kinyoleujtok taltikpakneminij maj iuan motokikan uan maj momakixtikan (2 Corintios 6:2). Se taman tein ika kinyoleua taltikpakneminij yejua tanojnotsalis tein mochiua noyampa taltikpak kampa moteixmatiltia se taman tein semi kualtsin: “kuali tanauatilmej tein ika tajtoua iTaixyekanalis Dios” (Mateo 24:14).

 Kemaj. Biblia kijtoua ke ejkos tonal keman amo akinok kokolispeuas. Keman tekiuajtitosya iTaixyekanalis Dios, kiixpolos nochi kokolismej oso kokoxkayomej (Isaías 33:24; 35:5, 6). Kichiuas maj amo akinok tajyoui nion maj momikili (Apocalipsis 21:4). Akin momikilijkejya, kichiuas maj oksepa nemikan itech se xochital nikan taltikpak kampa amo onkasok kokolismej (Salmo 37:29; Hechos 24:15).

 Apocalipsis 6:8: “Uan nikitak se caballo ixapochiktik. Akin ipanko yaya monotsaya Mikilis, uan Miketekoch kitojtokatiaya. Uan […] kinmakakej tanauatil […] para maj temiktikan […] ika se kokolis [oso se tetsaujkakokolis]”.

 Tein kijtosneki: Nauin akin youij ininpanko caballos, akin ininka motajtoua itech Apocalipsis, kinextiaj ke itech nejin tonalmej onkaskiaj kokolismej oso kokoxkayomej tein momoyauaskiaj itech nochi taltikpak.