SEKIN KIJTOUAJ KE AMO. Se tapajtijkej kijtoj ke se kitemos se moixyekanas ika Biblia kemej yeskia se kikuis se amatajkuilol tein mochijchiuak itech xiuit 1920 uan ika se tamachtis Química. Aksa akin amo taneltoka itech Biblia xa hasta mitsontajtaniskia ox tionmoyekanaskia ika se amat tein kinextia keniuj se kitekitiltia se computadora tein amo mokuiok keman tikonkuis se tein yankuik. Tein kijtosneki ke, sekin kinemiliaj ke Biblia amo tapaleuiaok.

¿Keyej aksa moyekanaskia ika se uejkauj amatajkuilol, ta axkan onkak miak taman tein yankuik? Itech Internet moajsij miak páginas kampa nochipa teyolmajxitiaj uan teiluiaj tein uelis se kichiuas. Itech televisión no ixnesij psicólogos uan tajkuilouanij akin kinyolmajxitiaj oksekin. Uan mokixtiaj miak amatajkuilolmej tein kijtouaj keniuj uelis se mopaleuis, tein ika kitanij miak tomin.

Ika nochi nejon taman tein niman ueli momati, ¿keyej monekiskia timoixyekanaskej ika Biblia, tein moijkuiloj ajsitokya dos mil xiujmej achto? ¿Melauak tein kijtouaj akin amo taneltokaj ke Biblia tamati kemej se amatajkuilol tein ika tajtoua Química tein amo tapaleuiaok oso kemej se amaix tein kijtoua keniuj se kikuis se computadora tein amo mokuiok? Nejon amo melauak. Tein tamatinij kiajsinij uan teposmej ijsiujka mopataj, sayoj ke ¿mopatani tein tikyolnejnekij tikpiaskej? Tiksentokaj tiknekij tiyolpakiskej, tiyolseujkanemiskej, tisenyetoskej iniuan tokalyetouanij uan kuali timouikaskej iniuan oksekin.

Maski Biblia moijkuiloj ne uejkauj, ika tajtoua nejon uan okseki taman. No kijtoua ke tein ompa ijkuiliujtok itanemililuan toTachijchiujkauj. Kitemaka tayolmajxitilis tein techpaleuia itech nochi taman itech tonemilis uan techpaleuia maj tikixnamikikan uejueyi ouijkayomej (2 Timoteo 3:16, 17). Uan no, kijtoua ke tein tayolmajxitia nochipa tapaleuis. Biblia kijtoua: “In Tajtoltsin de Dios kipia uelilis uan kitemaka nemilis” (Hebreos 4:12).

¿Melauak tein kijtoua Biblia? ¿Amo tapaleuiaok oso yejua amatajkuilol tein okachi tapaleuia? Nejin amaix Tanejmachtijkej uan oksekin tein kisaskej satepan, mitsonpaleuiskej xikonajsi itanankililuan nejon netajtanilmej.