“¡Nikchixtoya 19 xiujmej!”. ¿Toni kichixtoya nejin tokniuj? Traducción del Nuevo Mundo de las Escrituras Griegas Cristianas itech itajtol, bengalí. Miakej no ijkon kijtouaj keman mokixtia Traducción del Nuevo Mundo itech inintajtol. Sayoj ke, ¿tionmotajtaniani nochi tekit tein mochiua keman mokixtiaj nejin Biblias?

 Achto, tokniuan akin kiixyekanaj tein moijkuiloua uan tekitij iniuan Oloch Taojtokaltianij, kinixtaliaj seki tokniuan akin kitajtolkepaskej Biblia uan kiniluiaj keniuj kichiuaskej. ¿Kanachi tiempo kinuikilia tajtolkepanij para kitajtolkepaskej Biblia? Nicholas Ahladis, Akin tekiti iniuan akin kinpaleuiaj akin kitajtolkepaj amaixmej ompa Warwick (Nueva York), techtapouia: “Moneki miak taman tein se kiitas, kemej kanachimej takepanij uelis kichiuaskej nejin tekit, ox ouij kitajtolkepaskej itech inintajtol oso akin kiixtajtoltiskej kiixmatij keniuj nemiaj ne uejkauj. No moneki kiitaskej ox semi mopata kemej tajtouaj itech se xolal iuan okse. Sekin takepanij kitamitajtolkepaj Escrituras Griegas Cristianas itech se xiuit oso hasta itech eyi xiuit, uan uejkauaj kemej naui xiuit kitajtolkepaskej nochi Biblia. Uan akin kitajtolkepaj itech señas okachi uejkauaj”.

 Para kitajtolkepaskej Biblia amo sayoj moneki seki tajtolkepanij, ta no moneki seki tokniuan akin taixtajtoltiskej, akin tataman tein kipanouaj uan seseko kayomej para maj kiitakan ox kuali mokaki tein motajtolkepak uan amo tajtanij maj kintaxtauikan. Tein yejuan kiajxiliskej semi tapaleuia para maj kipia nochi tanemililmej tein kipia Biblia, uan maj kuali moajsikamati. Se tokniuj akin kayot Sudáfrica uan tamachtia keniuj motajtolkepas Biblia, kijtoua: “Tajtolkepanij kiitaj ke Jehová kinmakatok se ueyi tekit uan akin kiixtajtoltiskej moneki kiajsikamatiskej”.

 Keman kitamitajtolkepaj Biblia, moneki kiamakixtiskej. Uan para kichiuaskej, imprentas moneki kipiaskej majtakti taman: amat, tinta, tein kiuikas ipanko, tein ika kipepechoskej, tein ika kipanpikiskej, tapal tein tamati kemej plata tein kipias itejtenpan, cintas, kampa kijtsomaj páginas, cartón tein kiuika kampa pepechiujtokej páginas uan se teisa tein tapaleuia para maj amo ejkeui. Itech xiuit 2019 mokouak nochi nejin taman uan moixtauak panoua 20 millones dólares. Uan no nejon xiuit, tokniuan tekitikej panoua 300,000 horas para moamakixtis uan kintitaniskej biblias.

 ¿Keyej mokui miak tiempo uan miak tomin para mochiuas nejin tekit? Joel Blue, akin tekiti itech Departamento Internacional de Impresión, kijtoua “Porin Biblia yejua amatajkuilol tein okachi tayekantok tein tikixtiaj”. Uan no kijtoua: “Tiknekij maj moita kemej kiueyitalis Dios uan tein tikteixmatiltiaj”.

 Uan no tikixtiaj Traducción del Nuevo Mundo para akin amo tachiaj, yejua ika mokixtiaj itech 10 tataman tajtolmej itech braille. Para mochijchiuas se Biblia itech braille desde Génesis hasta Apocalipsis uejkaua hasta 8 horas uan keman kinsajsalouaj volúmenes de nejin Biblia takuij 2,3 metros, uan no tikixtiaj biblias para akin tsaktokej, kampa sayoj kinkauaj maj kipiakan amatajkuilolmej tein ipanko chijchiujtok ika amat tein okachi kanauak.

 Biblia Traducción del Nuevo Mundo semi kinpaleuia akin kiixtajtoltiaj. Maj tikitakan tein kinpanok tokniuan akin tajtouaj kiluba itech nechikol La Tombe ompa (República Democrática del Congo). Nejin xolal yetok panoua 1,700 kilómetros den ueyi altepet. Tokniuan sayoj kipiayaj se Biblia itech tajtol kiluba uan amo semi moajsikamatia. Keman momachtiayaj para nechikol tokniuan monekia motataneujtiskej nejon Biblia. Sayoj ke, itech metsti agosto xiuit 2018, nochin tokniuan de nejon nechikol kipiajya Traducción del Nuevo Mundo desde Génesis hasta Apocalipsis itech tajtol kiluba ijkon kemej axkan motajtoua.

 Se tokniuj akin tajtoua alemán akin semi kiuelita Traducción del Nuevo Mundo tein oksepa kiyekitakej, kijtoj: “Amo nikijtouaok ke moneki nikixtajtoltis Biblia. Axkan nimotajtania: ‘¿Toni hora oksepa niuelis niksentokas nikixtajtoltis?’”. Se takat akin tsaktok kijkuiloj: “Nechmakakej se Biblia Traducción del Nuevo Mundo, uan nechpaleuijtok maj nimopata. Amo keman kuali nikajsikamattoya iTajtol Dios hasta ke peuak nikixtajtoltia nejin Biblia. Nikuelitaskia nikinixmatis itaixpantijkauan Jehová uan toni moneki nikchiuas para nimochiuas itaixpantijkauj Jehová”

 Akin kiixtajtoltiaj Traducción del Nuevo Mundo semi motasojkamatij porin nantapaleuiaj ika namotomin, porin ijkon ueli mokixtiaj Biblias. Nejin tomin tapaleuia maj mosentoka motanojnotsa uan motemaka itech donate.mt711.com. Tasojkamatik porin nantapaleuiaj ika nochi namoyolo.