Itech xiuit 2020, tikpiakej eyi nechikol tein uejkaua eyi tonal kemej amo keman ijkon mochiujtoya; mochiuak ika grabación uan tiktalijkej itech Internet. Sayoj ke tokniuan akin nemij Malaui uan Mozambique kikakkej nejin ueyi nechikol maski amo kikuikej Internet. ¿Keniuj uelik kichiujkej?

 Oloch Taojtokaltianij inintechkopa Oloch Tokniuan Taixyekananij uan Oloch Tokniuan akin Kiixyekanaj Tamachtilis tein Motemaka, kijtojkej ke ompa Malaui uan Mozambique, ueliskia kipanoltiskej ueyi nechikol itech radio uan televisión. ¿Keyej? Porin ompa Malaui semi patiyoj Internet kemej amo kanaj ijkon itech taltikpak, yejua ika semi amo miakej tokniuan ueli kikuij Internet. William Chumbi, semej akin taixyekana itech sucursal ompa Malaui, kijtoua: “Tokniuan ueliskia kikakiskej ueyi nechikol sayoj itech radio uan televisión”. Luka Sibeko, semej akin no taixyekana itech sucursal ompa Malaui no kijtoua: “Komo amo mopanoltiskia itech radio uan televisión, semi amo miakej tokniuan akin nemij kampa taixyekana sucursal ueliskiaj kikakiskej ueyi nechikol”. Ompa Mozambique no semi amo miakej tokniuan ueli kipiaj Internet nion tepos tein ika kiitaskej ueyi nechikol.

 Ipa mopanoltijtoyaya nechikolmej tein tikpiaj sejse semana itech radio uan televisión itech nejin tonalmej keman momoyaujtok COVID-19. a Tokniuan tajtanitoj okachi horas uan ijkon ueliskia mopanoltis ueyi nechikol.

 Ompa Malaui, tokniuan kipiakej se ouijkayot. Sayoj se hora kipanoltiaj teisa itech radio uan televisión, porin kinemiliaj ke komo miak horas uejkaua tein kipanoltijtokej, amo akin kikakiok. Sayoj ke tokniuan kinmelauilijkej ke tekit tein tikchiuaj kinpaleuia akin nemij itech xolalmej. Kemej neskayot, maski amo ueli tikisaj, tikinixmatiltiaj kuali tanauatilmej tein kipia Biblia, uan kinpaleuia maj kuali monejnemiltikan uan maj yolpakikan kemej kalyetouanij. Keman kikakkej nejon, kiniluijkej ke kemaj ueliskia kinmakaskej horas tein tajtaniaj.

 Ompa Malaui, tein kipanoltiaj itech se radio uan okse itech se televisión ajsi kampa okachi uejka itech altepet, yejua ika semi miakej ueli kikakij. Ompa Mozambique, ueyi nechikol kipanoltijkej itech 85 radios uan se itech televisión.

 Ompa Malaui uan Mozambique, keman kipanoltijkej ueyi nechikol itech televisión, taxtaujkej 28,227 dólares b, uan itech radio taxtaujkej ajsitokya 20,000 dólares. Komo radio amo semi uejka ajsi moneki taxtauaskej 15 dólares uan komo uejka ajsi moneki taxtauaskej 2,777 dólares.

 Tokniuan semi kitemojkej maj kuali mokuini nepaleuil ika tomin. Kemej neskayot, ompa Malaui, itech seki radios kampa tajtanitoj maj kintemoltilianij ipatiuj, kemaj kintsinkixtilijkej. Itech se radio kintemoltilijkej ipatiuj hasta 30%. Ijkon mopaleuij 1,711 dólares. Ompa Mozambique, itech seki radios, kintemoltilijkej ipatiuj porin kinixmatij ke tokniuan amo takajkayauaj uan niman taxtauaj tein moneki.

 Tokniuan semi kitasojkamatij ueyi nechikol tein kipanoltiaj itech radio oso televisión. Patrick, se tayekankej itech se nechikol ompa Malaui, kijtoj: “Tikintasojkamatiliaj tokniuan Oloch Taojtokaltianij tein toka kichiujkej itech nejin tonalmej keman momoyaujtok ueyi kokolis”. Isaac, akin no nemi ompa Malaui, kijtoj: “Sayoj tikpiaj radio, yejua ika semi tiktasojkamatij maj inechikol Jiova kiixtaliani maj mopanolti ueyi nechikol itech radio. Nochin nokalyetouanij uelik kikakkej ueyi nechikol. Moyekita ke Jiova kintasojta itekitikauan”.

 Ompa Mozambique, se tanojnotskej akin yekinika kikakik ueyi nechikol itech xiuit 2020, kijtoj: “Ueyi nechikol tein nikitak itech televisión, nechelnamiktij ke Jiova nochi ueli kichiua. Maski momoyaujtok nejin ueyi kokolis, techmakak tamachtilis hasta nikan kalijtik. Nikitak ke itekitikauan Jiova semi motasojtaj. Nikyekneltoka ke yejua taneltokalis tein melauak”.

 Se tokniuj tayekankej akin monotsa Wyson, kijtoj: “Nikneki niktasojkamatilis takeual takuaujtamach porin semi kuali techyekpia itech nejin tonalmej keman momoyaujtok ueyi kokolis. Semi tatasojti kampa tinemij uan semi amo miak tein tikpiaj. Sayoj ke uelik tikakkej ueyi nechikol tein mopanoltij itech radio uan televisión, uan semi techpaleuij tamachtilis.

 Itech xiuit 2021, Oloch Taojtokaltianij inintechkopa Oloch Tokniuan Taixyekananij uan Oloch Tokniuan akin Kiixyekanaj Tamachtilis tein Motemaka, oksepa kijtojkej maj mopanolti ueyi nechikol itech radio uan televisión itech seki altepemej. ¿Keniuj moixtaua nejon? Ika tomin tein motemaka maj ika mochiua itekiyo Dios noyampa taltikpak. Seki nejin nepaleuil ueli motemaka itech donate.mt711.com. Semi tiktasojkamatij namonepaleuil ika tomin.