Kutshoni ‘Ukuhlonipha Uyihlo Lonyoko’?
Impendulo yeBhayibhili
Umlayo othi “hlonipha uyihlo lonyoko” utholakala kanengi eBhayibhilini. (U-Eksodusi 20:12; UDutheronomi 5:16; UMathewu 15:4; Kwabase-Efesu 6:2, 3) Nanku okunye okutshiwo yikulalela umlayo lo.
Tshengisa ukuthi uyabonga abakwenzele khona. Ungatshengisa ukuthi uyabahlonipha abazali bakho ngokubonga konke abakwenzele khona langokubalalela. (IZaga 7:1, 2; 23:26) IBhayibhili likukhuthaza ukuthi ‘uziqhenye’ ngabazali bakho.—IZaga 17:6.
Zehlise kubo. Kuqakathekile ukuzehlisa kubazali bakho ikakhulu nxa usakhula. UKholose 3:20 uthi ebantwaneni: “Lalelani abazali benu ezintweni zonke, ngoba lokhu kuyayithokozisa iNkosi.” UJesu laye esesengumntwana wayelalela abazali bakhe.—ULukha 2:51.
Bahloniphe. (ULevi 19:3; KumaHebheru 12:9) Ukuhlonipha abazali bakho kugoqela lokho okutshoyo lendlela okutsho ngayo. Kodwa ngezinye izikhathi abanye abazali benza izinto ezenza kube nzima ukuthi abantwababo babahloniphe. Lanxa kunjalo abantwana akumelanga badelele abazali babo ngalokho abakutshoyo labakwenzayo. (IZaga 30:17) IBhayibhili lithi ukuthuka abazali yisono esikhulu.—UMathewu 15:4.
Banakekele. Nxa abazali sebekhulile bayabe bedinga ukuthi ubenzele izinto ezithile. Ungatshengisa ukuthi uyabahlonipha ngokuba leqiniso lokuthi balakho abakudingayo. (1 KuThimothi 5:4, 8) Ngokwesibonelo uJesu esezakufa wahlela ukuthi unina anakekelwe.—UJohane 19:25-27.
Imibono engaqondanga mayelana lokuhlonipha abazali
Umbono ongaqondanga: Ukuhlonipha abazali kutsho ukuthi kumele ubavumele bakutshele okokwenza emtshadweni wakho.
Okuqondileyo: IBhayibhili lifundisa ukuthi ukuba lobuhlobo obuhle lotshade laye kuqakatheke ukwedlula ukuba lobuhlobo obuhle lezihlobo zakho. UGenesisi 2:24 uthi: “Indoda izadela uyise lonina imanyane lomkayo.” (UMathewu 19:4, 5) Kodwa akukubi ukuthi abazali benu balicebise. (IZaga 23:22) Lanxa kunjalo abatshadileyo akumelanga bangenise izihlobo kukho konke abakwenzayo emtshadweni wabo.—UMathewu 19:6.
Umbono ongaqondanga: Kumele wenze loba yini oyitshelwa ngabazali bakho.
Okuqondileyo: Lanxa uNkulunkulu esithi kumele silalele abazali, uyasitshela ukuthi kumele sicine ngaphi. Akumelanga silalele bona ukwedlula uNkulunkulu. Ngokwesibonelo ngesikhathi abafundi bakaJesu besenkantolo batshelwa ukuthi bayekele ukutshumayela, kodwa bona bathi: “Simele silalele uNkulunkulu kulokulalela abantu!” (ImiSebenzi 5:27-29) Abantwana labo kumele balalele abazali babo nxa ababatshela khona kungaphikisani lemithetho kaNkulunkulu.—Kwabase-Efesu 6:1.
Umbono ongaqondanga: Ukuhlonipha abazali bakho kutsho ukuthi kumele ulandele abakukholwayo.
Okuqondileyo: IBhayibhili lithi sihlole ukuthi lokho esikufundiswayo kuliqiniso yini. (ImiSebenzi 17:11; 1 UJohane 4:1) Yikho kungenzakala ukuthi ucine ukhetha ukulandela izimfundiso ezitshiyene lezabazali bakho. IBhayibhili lisitshela ngabanye ababekhonza uJehova abakhetha ukulandela izimfundiso ezazitshiyene lezabazali babo. Abanye babo ngu-Abhrahama, uRuthe lomphostoli uPhawuli.—UJoshuwa 24:2, 14, 15; URuthe 1:15, 16; KwabaseGalathiya 1:14-16, 22-24.
Umbono ongaqondanga: Ukuhlonipha abazali kutsho ukuthi kumele ulandele amasiko abo okugoqela ukukhonza amadlozi.
Okuqondileyo: IBhayibhili lithi: “Khonza iNkosi uNkulunkulu wakho, ubambelele kuye yedwa.” (ULukha 4:8) UNkulunkulu uyamzonda umuntu okhonza amadlozi. Kanti njalo iBhayibhili lithi “abafileyo kabazi lutho.” Yikho akulalutho esingabenzela lona olungabanceda futhi labo ngeke basincede.—UmTshumayeli 9:5, 10; U-Isaya 8:19.
Nanku Okunye
IMIBUZO YEBHAYIBHILI IYAPHENDULWA
IBhayibhili Lithini Ngokunakekela Abazali Asebegugile?
IBhayibhili lilezibonelo zabanye abakwenzayo lokhu njalo liphinde libe lamacebiso anganceda labo abanakekela asebekhulile.
OKUMAYELANA LATHI
Imihlangano Yebandla YaboFakazi BakaJehova
Thola ukuthi sikhonzela ngaphi futhi sikhonza njani.