LUZIA OOKHALANO MAKACAMIHO A WEECA. Vaavaa aareiye mwaana, owo aakhalano ereca eniichaniwa poliomielite, ereca yooraveya yeeyo enavolowela ocoopare. Ereca eyo yaavolowela mweco awe woothiyana nave aapacerya otuthunya. Vaavaa Luzia aariyeno iyaakha 16 sa oyariwa, muthiyana yoowo aamulapeiye aaloca: “Muluku ohoolaka moorweela wa woorakaliha, nthowa nawi hiwawiiwelela naari waakhaliha phaama amama.” Naamwi ivinrevo iyaakha sincipale, Luzia hanacuwala masu yaala.

VAAVAA DAMARIS AASUWENLEIYE WI OOKHALANO ERECA YA CÂNCER, atiithi awe yaaloca: “Tiheeni wenraawe? Wi ela yeereyeke, kinoona wi woheera echu yoonanara. Akhweya Muluku onamoolaka.” Masu ala yaatuthula murima wa Damaris.

Achu apacenrye khalai wuupuwela wi Muluku onnapharihela ireca wi aalake achu. Liivuru awiichaniwa Mihapo ni sookhovelela, a Enklesi, onnaloca mukhalelo achu yuupuwelaaya mu elukuluku ya Kristu. Ancipale yaaneemererya wi “ireca saari sookhumelela sa soonanara seeriweno ni mulipa awiiceliwa naari ni makholo awe. Achu yuupuwela wi ereca yaari yoolaka nthowa na yoocheka.” Liivuru a Enklesi oniichaniwa Medieval Medicine and the Plague, onnaloca wi ivinrevo iyaakha masana masaneene E.K. “achu yuupuwela wi Muluku aanapharihela masooso wi aalake nthowa na soocheka saya.” Mwawiihiiha, mu iyaakha 600 muculi, vaavaa achu ancipale yaakhwilaaya o Europa nthowa na ereca eniichaniwa Peste Negra, apwanne iwo waari olaka wa Muluku ntakhara achu oonanara? Naari wi ereca ela yaatannyenye nthowa na nyuuku, hiiha ntoko alipa ootholathola yaaloncaaya ohoolo waya? Achu akina akhweya ananwerya okoha: Apwanne chiryene Muluku onaaruuhela achu ireca wi ekhale yoolivela ya soocheka saya? *

NKUUPUWELANI: Waakhanle wi Muluku onnapharihela ireca naari makacamiho wi aahooxe achu yaale anaphwanelela, apwanne Yesu ahaala waapenuxa achu awiiceliwa ancipale vaavaa aareiye veelaponi yavathi? Hamunoona wi vaavaa Yesu aapenuxeiye achu, aahaala waakaahaka othoriha weekhaikhai wa Muluku? (Mateu 4:23, 24) Nyenya Yesu haahaala weera echu ntoko yeela, eeraka echu yoovuhana ni othoriha wa Muluku. Yesu aaloca: “Kinera yele enamusivela” Muluku nave “kinnera ntoko Atithi akirummaya.”—Yohani 8:29; 14:31.

Piipiliya onnaloca mookwakwaleya wi Yehova Muluku ‘elukuluku yothene tawokololowa.’ (Malamulo 32:4) Ntoko yootakiherya, Yehova haahaala weeriha wi nceeke nimore osulu, awiiphaka achu ancipale ahirino nthowa, pahiru wi amulake muchu mmoharu! Aakhalavo muchu yoowo aasuwenle phaama ekhaikhai ya Muluku yoowo aari kapuro awe oororomeleya awiichaniwa Aparahamu. Aparahamu aaloca wi Yehova harwa aatoloxa “atxhu òtxheka ni ale òhitxheka” nave wi aari ocai wa weerano hiiha. (Maphatxuwelo 18:23, 25) Piipiliya tho onnaloca wi Muluku “hanera itxhu sonanara” naari ichu seiho iri “s’ohokololowa.”—Yobi 34:10-12.

Vaavaa nnahooxeyaahu, hannaphwanela wuupuwela wi Muluku onamunilaka nthowa na yoocheka nipankaahu. Yesu aahiya yeela mookwakwaleya vaavaa yoowo vamoha ni oohuserya awe yaamonnaaya mulopwana aayariwa evaasi. “Amuhuserya yàmukoha eriki: ‘Muhusiha, otxhenke tani, yowo nari asitithinya, wi ayariwe ahonaka?’ Yesu ahakhula: ‘Nari owo hatxhenke nari asitithinya, nto wi mwa yowo soneye miteko sa Muluku.’”—Yohani 9:1-3.

Mweelukuluku yeele, ancipale yuupuwela wi Muluku aanapharihela ireca naari makacamiho wi aalake achu. Mwawiihiiha, vaavaa Yesu aalonceiye wi mulopwana  ole naari asitiithi awe hiyaarino nthowa, akhweya oohuserya awe yaakhala ootikhiniheya. Yesu aaheera echu ekina ohiya pahiru ompenuxa mulopwana ole eevaasi. Owo aahooniherya wi Muluku hanaalaka achu ni ireca naari ni makacamiho. (Yohani 9:6, 7) Wa yaawo anahooxeya ni makacamiho matokweene mu okumi aya, ennaahakararya osuwela wi tahi Muluku onatannya makacamiho aya.

Piipiliya onnanroromeliha

• “Ntakhara Muluku hanawerya wereryiwa ti yonanara, nari mano hanawererya mutxhu.” (TIYAKO 1:13) Ela enataphulela wi Muluku hanapharihela ichu soonanara wi aweererye achu. Mweeparipari, moohilekela Muluku onahaala omaliha ichu soothene ‘sonanara’ seiho inaahooxa achu ovinyerya khalai. Ichu iho soonanara inavolowela ireca, makacamiho, ni okhwa.

• Yesu Kristu “àhapenusa atxhu othene yari ni iretxa.” (MATEU 8:16) Ela, ennanikhaviherya osuwela yeeyo Yesu onahaaleiye weera wa alipa awiiceliwa mu elapo yoothene vaavaa onahaaleiye okhala Mwene a Omwene wa Muluku.

• “Muluku onanvuta mithori aya, nave horwa okhalavotho okhwa nari winla, nari ikutxho, nari witxela, wona wi sakhalai sòvira.”—WUPULULA 21:3-5.

Vano ntakhara heeni nnahooxeyaahu vancipale? Ennaviravo elukuluku yincipale ovinyerya vaavaa achu anachunaaya osuwela naakhulo na nikoho nenla. Waakhanle wi tahi Muluku onatannya makacamiho, vano taani? Nnahaala woona naakhulo na nikoho nenla mmwaha onacharela.