EMANLE OKHUMELELA EPAHU, APWANNE MONTOKO WIIKOHA: ‘MULUKU AARI WOOWI?’ AKHWEYA YOHOOKHUMELELAANI ECHU YOOTHANANIHASA NAVE MUKHALA MUUPUWELAKA: ‘APWANNE MULUKU ONNAKITHOKORORYA?’

Akhweya nyuwo munnoona ntoko Sheila, o Estatu Unitu. Amusi awe yaanatepa ovekela. Sheila onnathariha: “Kaahisuwela wi Muluku aari Mpatuxa ahu. Mwawiihiiha, kaahikhalano nchuno na opacerya ohuserya vooloca sa yoowo vaavaa kaaryaaka mwaana. Nyenya nkantonko woona wi aari nthamwene aka eeparipari. Kuupuwela wi Muluku aakoona ocai wene. Nkuupuwela wi Muluku aanakiica, nyenyatho nkuupuwela wi aanakithokororya.” Ntakhara heeni Sheila aanakhwa minikwa osivela wa Muluku? Owo onnathariha: “Amusi aka yaahihoolela ipahu sincipale, seiyo saacharelana. Yaakhala ntoko wi Muluku haaniweharu.”

Hiiha ntoko Sheila, akhweya nyuwotho munnaroromela wi ookhalavo Muluku oowerya woothene. Nyenya akhweya mookhalano minikwa waakhanle wi owo chiryene onnoothokororyaani nyuwo. Khalai mulopwana yoowo aaroromela owerya ni miruku sa Mpatuxa aahikhalano minikwa soolikana. Nsina nawe aari Yupu. (Yobi 2:3; 9:4) Amanle ohoolela ipahu soocharelana, nave mukhalelo awe otorokeya, owo aahimukoha Muluku: “Munahuluselani ethoni anyu? Munakovelani ntoko mwitxana anyu?”— Yobi 13:24.

Tiheeni Piipiliya onaloceiye? Apwanne Muluku ookhalano nthowa vooloca sa ipahu? Apwanne aakhalavo mathowa awi owo onnaathokororya achu ophitaanyerya mmoha ti mmoha a hiyo? Apwanne muchu onanwerya osuwela wi Muluku oonisuwela, onnaniiwexexa, onnoona wiicela vaavaa nnahooseyaahu nave onnanikhaviherya ovilela ni makacamiho ahu?

Mmiyaha inacharela, nnahaala othokororya yeeyo soopatuxiwa sinanihusihaaya vooloca sa othokororya wa Muluku ntakhara hiyo. (Aroma 1:20) Voocharela nnahaala ohuserya yeeyo Piipiliya onooniheryeiye vooloca sa othokororya wa Muluku. Wakhala wi “nòmusuwela yowo” vancipale moorweela wa soopatuxiwa ni Masu we, nnahaala ororomela wi ‘onnonikhapelela.’— 1 Yohani 2:3; 1 Pedro 5:7.