Na o hweditše motho yo e ka bago molekane wa gago wa lenyalo? Ge e ba go le bjalo, o ka tseba bjang ge e ba motho yoo a go swanetše?

 Ke ga bohlokwa gore o se ke wa fo lebelela dilo tšeo di sego bohlokwa. Go ba gona, ngwanenyana yo mobotsana o ka fo hwetša a sa botege goba mošemane yo a ratwago kudu o ka fo hwetša a se na boitshwaro bjo bobotse. O nyaka motho yo o tlago go lokologa ge o na le yena—motho yoo a swanelago semelo sa gago le yoo dipakane tša gagwe di dumelelanago le tša gago.—Genesi 2:18; Mateo 19:4-6.

 Lebelela motho yo o mo kganyogago ka leihlo le le bulegilego. Lega go le bjalo, o itlhokomele! O ka fo bona feela seo o nyakago go se bona. Ka gona, o se ke wa lebelela ka lepotlapotla. Leka gore o tloge o tseba seo a lego sona.

 Batho ba bantši bao ba ratanago ba fo kga dilo ka godimo. Ba fo kitimela go bona dilo tšeo ba swanago ka tšona, go swana le gore: “Re rata mmino wa go swana.” “Re thabela go dira mediro e itšego.” “Re dumelelana ka dilo ka moka!” Lega go le bjalo, o swanetše go tloga o lebeledišiša. O swanetše go lemoga “motho wa sephiring wa pelo.” (1 Petro 3:4; Baefeso 3:16) Go e na le go lebelela kudu gore le dumelelana ka dilo tše itšego, go ka ba kaone go lebelela seo se diregago ge le sa dumelelane.

 Ka mohlala, ela hloko dilo tše di latelago:

•   Motho yo o arabela bjang ge le sa dumelelane—ka go gapeletša gore dilo di dirwe ka tsela ya gagwe, mohlomongwe ka “go tlalelana ka bogale” goba ka “polelo e gobošago”? (Bagalatia 5:19, 20; Bakolose 3:8) Na motho yo o na le tekatekano—o dumelelana le dipono tša batho ba bangwe e le gore go be le khutšo ge e ba go sa tshelwe melao ya motheo?—Jakobo 3:17.

•   Na motho yo o a hlalefetša goba o na le lehufa? Na o nyaka go dula a tseba mesepelo ya gago? Nicole o re: “Ke hlwa ke ekwa ka batho bao ba ratanago bao ba lwago ka baka la ge yo mongwe a sa fele a founa a bolela gore o gokae. Ke nagana gore seo se bontšha gore go na le bothata.—1 Bakorinthe 13:4.

•   Batho ba bangwe ba mo le lebelela bjang? Go tla go hola go bolela le bao e lego kgale ba tsebana le motho yo, bjalo ka batho bao ba godilego tsebong ka phuthegong. Ge o ka dira seo, o tla tseba ge e ba motho yoo a “bolelwa gabotse.”—Ditiro 16:1, 2.