Dimpšanyana tša ka di Hwetša Mpho
Nick yo a dulago Oregon, U.S.A. o ngwadile gore: “Mathomong a 2014 ke be ke sepela le dimpšanyana tša ka toropong ya gešo, Dihlatse tša Jehofa di be di tlwaetše go ema kgauswi le teroli ka toropong yeo. Ba be ba apere gabotse e bile ba dumediša motho yo mongwe le yo mongwe ka semaele.
“Dihlatse tša Jehofa di be di sa no thabela batho fela, di be di thabela le dimpšanyana tša ka. Ka letšatši le lengwe, Elaine yo a bego a eme kgauswi le teroli o ile a fa dimpšanyana tša ka dipisikiti. Ka morago ga moo, ge re be re feta kgauswi le moo Dihlatse tša Jehofa di bego di eme ka teroli, dimpšanyana tša ka di be di rata go ya go bona gore di hwetše dipisikiti.
“Go ile gwa feta dikgwedi tše dintši. Dimpšanyana tša ka di be di thabetše dipisikiti gomme lenna ke thabetše go boledišana le Dihlatse tša Jehofa. Eupša ke be ke sa nyake go fetša nako e ntši ke bolela le bona. Ke be ke na le mengwaga ya ka godimo ga e 70 le gona ke be ke sa tsebe seo Dihlatse tša Jehofa di se dumelago. Ka ge ke be ke nyamišitšwe ke dikereke tše dintši tšeo ke bego ke di tsena, ke ile ka bona go le kaone gore ke ipalele Beibele ke nnoši.
“Ka nako yeo ke ile ka bona Dihlatse tše dingwe karolong e nngwe ya toropo di eme kgauswi le diteroli tša bona. Le tšona di be di dula di thabela batho. Ba be ba dula ba araba dipotšišo tšeo ke ba botšišago tšona ka Beibele, seo se ile sa dira gore ke thome go ba tshepa.
“Ka letšatši le lengwe, Elaine o ile a mpotšiša gore: ‘Na o a dumela gore diphoofolo le tšona ke mpho e tšwago go Modimo?’ Ke ile ka re, ‘Ee kea a dumela!’ Ke moka Elaine a mpalela Jesaya 11:6-9. Go tloga ka nako yeo ke ile ka nyaka go ithuta Beibele eupša ke sa dutše ke sa nyake go tšea dikgatišo tša Dihlatse tša Jehofa.
“Ka morago ga nako e itšego, ke ile ka thabela go bolela le Elaine le monna wa gagwe Brent. Ba ile ba nkgopela gore ke bale Beibele go tloga go lengwalo la Mateo go fihla go la Ditiro gore ke kwešiše gore go ba Mokriste wa nnete go bolela eng. Ke ile ka bala Mangwalo ao. E se kgale magareng ga 2016 ke ile ka dumela go ithuta Beibele le Brent le Elaine.
“Ke be ke dula ke fela pelo ya go swarelwa thuto ya Beibele le go ba gona dibokeng Holong ya Mmušo. Ke be ke dula ke thabela go ithuta seo Beibele e se bolelago. Ka morago ga ngwaga ke ile ka ba Hlatse e kolobeditšwego. Gona bjale ke na le mengwaga e 79, gomme ke thabela gore ke hweditše bodumedi bja nnete. Jehofa o ntšhegofaditše ka go ntumelela gore ke be karolo ya lapa la gagwe la lefase ka moka.”
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
