Boemong bjoo, phuthego e lebelela lenyalo la peleng le fedile ge monna a nyala mosadi yo mongwe ke moka ya lebelela lenyalo le lefsa le le molaong. E le gore re kwešiše lebaka le gabotse, a re boleleng ka seo Jesu a se boletšego mabapi le tlhalo le go nyala gape.

Go Mateo 19:9, Jesu o boletše ka lebaka le nnoši la Mangwalo la tlhalo. O boletše gore: “Mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.” Mantšu a Jesu a re ruta gore (1) lebaka le nnoši la Mangwalo la go hlala ke bootswa le gore (2) ge monna a ka hlala mosadi ntle lebaka la Mangwalo ke moka a nyala gape, o a hlotlola. *

Na Jesu o be a era gore ge monna a ka dira bootswa o lokologile go ya ka mangwalo gore a ka nyala gape? Aowa. Ge monna a ka dira bohlotlolo, mosadi wa gagwe yo a se nago molato o tla kgetha gore o a mo swarela goba ga a mo swarele. Ge a ka kgetha go se mo swarele ke moka ba hlalana semolao, bobedi bja bona ba lokologile gore ba ka nyala gape.

Ka lehlakoreng le lengwe, molekane yo a se nago molato a ka kgetha go swarela monna wa gagwe e bile a mmotša gore o nyaka gore ba dule ba nyalane. Go direga eng ge e ba monna yo a dirilego bohlotlolo a gana ge mosadi wa gagwe a mo lebalela ke moka a mo hlala? Monna yoo a ka se lokologe go ya ka Mangwalo go nyala gape ka gobane mosadi wa gagwe o kgethile go mo swarela. Ge a ka no tšwela pele a nyala mosadi yo mongwe le ge Mangwalo sa dumele, o dira bohlotlolo gape. Bagolo ba phuthego ba tla swanelwa ke go hloma komiti ya boahlodi gape gore e swaragane le sebe seo.—1 Bakor. 5:1, 2; 6:9, 10.

Ge monna a ka nyala gape a se a lokologa go ya ka Mangwalo, phuthego e tla lebelela bjang lenyalo leo la peleng le le lefsa? Na lenyalo leo la peleng le sa le molaong go ya ka Mangwalo? Na molekane yo a se nago molato o sa dutše a ka kgetha go swarela monna wa gagwe goba go se mo swarele? Na phuthego e ka lebelela lenyalo leo le lefsa e le la bohlotlolo?

Nakong e fetilego, phuthego e be e lebelela lenyalo leo le lefsa e le la bohlotlolo ge fela molekane yo a se nago molato a sa phela, a se a nyalwa e bile a se a ka a dira bootswa. Eupša Jesu ga se a bolela ka molekane yo a se nago molato ge a be a hlalosa taba ya tlhalo le go nyala gape. Go e na le moo, o hlalositše gore ge e ba monna a ka hlala mosadi wa gagwe ntle le lebaka la Mangwalo ke moka a nyala gape, o a hlotlola. Ge e le gabotse, ge monna yoo a  hlala e bile a nyala gape, o fediša lenyalo leo la peleng.

Ge lenyalo le fela ka gobane molekane yo mongwe a hladile ke moka a nyala gape, molekane yo a se nago molato a ka se sa ba le boikarabelo bja gore na o tla lebalela molekane yo a nago le molato goba go se mo lebalele. Ka gona molekane yoo o imologile. Go sa šetšwe gore molekane yo a se nago molato o hlokofetše, o nyetšwe gape goba o dirile bootswa, phuthego e swanetše go lebelela lenyalo leo e le la molao. *

Mohlaleng wo re sa tšwago go bolela ka wona, monna o dirile bohlotlolo ke moka ba hlalana. Go tla direga eng ge e ba monna a se a hlotlola eupša a kgetha go hlala mosadi wa gagwe ke moka a nyala mosadi yo mongwe? Goba go tla direga eng ge e ba monna a dira bootswa ka morago ga ge a hladile mosadi wa gagwe, ke moka a nyala gape le ge mosadi wa gagwe a ikemišeditše go mo swarela? Mehlaleng ye ka moka, ge monna a hlala mosadi wa gagwe ke moka a nyala yo mongwe o dira bohlotlolo e bile o fediša lenyalo leo la peleng. Lenyalo le lefsa le swanetše go lebelelwa le le molaong. Morokami wa Seisemane wa November 15, 1979, letlakala 32, o itše: “Monna o fedišitše lenyalo leo la peleng, ka gona a ka se boele go mosadi yoo gore ba lokiše ditaba, lenyalo le fedile ka lebaka la tlhalo, bohlotlolo le go nyala gape.”

Tsela yeo re kwešišago taba ye ka gona ga bjale ga e re gore ga re sa tšea lenyalo e le le lekgethwa goba gore ga re sa tšea bohlotlolo e le sebe se segolo. Ge monna a hlala mosadi wa gagwe ntle le mabaka a Mangwalo ke moka a nyala gape a se a lokologa go ya ka Mangwalo, o tlo swanelwa ke go tšwelela pele ga komiti ya boahlodi ka molato wa bohlotlolo. (Ge e ba motho yo a nyalanago le yena e le Mokriste, le yena o swanetše go tšwelela pele ga komiti ya boahlodi ka molato wa bohlotlolo.) Le ge lenyalo leo le lefsa le ka se lebelelwe e le la bohlotlolo, monna yoo a ka se hwetše ditokelo tšeo di kgethegilego tša tirelo ka mengwaga e mentši goba go fihlela ge batho ba se sa kgopišega ka baka le sebe seo sa gagwe. Pele bagolo ba ka nea motho yo bjalo ditokelo, ba swanetše go nagana kudu le ka molekane yo a radiilwego gotee le ka bana le ge e le bafe ba banyenyane bao a ka bago a ba tlogetše ge a hlalana le yena.—Mal. 2:14-16.

Ka ge re tseba ditlamorago tšeo di bago gona ka lebaka la go hlala mo go sa dumelelwego ke Mangwalo le go nyala gape, Bakriste ba swanetše go ba bohlale gomme ba katanele go lebelela lenyalo ka tsela yeo Jehofa a le lebelelago ka yona.—Mmo. 5:4, 5; Baheb. 13:4.