Ge o ka nyaka keletšo ya kamoo o ka kgotlelelago bohloko bja go hwelwa, o tlo hwetša dikeletšo tše dintši—eupša tše dingwe di ka go thuša go feta tše dingwe. Lebaka la gore go be le dikeletšo tše dintši ke gore batho ga ba lle go swana ge ba hwetšwe. Seo se thušitšego motho yo mongwe se ka no se go thuše.

Eupša go na le dikeletšo tše dingwe tšeo di thušitšego batho ba bantši. Dikeletšo tšeo di bolelwa ke ditsebi tšeo di eletšago batho bao ba hwetšwego. Ge e le gabotse, ditsebi tšeo di no ba di bušeletša seo Beibele e se boletšego kgale.

• Ditsebi tše dingwe di re ye ke tsela e bohlokwa kudu ya go fola bohlokong bja go hwelwa. Eupša ka dinako tše dingwe o ka ikwa o nyaka go ba noši. O ka ba wa ikwa o tenwa ke bao ba nyakago go go thuša. Go tlwaelegile go ikwa bjalo.

• O se ke wa nagana gore o swanetše go ba le batho ka dinako tšohle, eupša gape o se ke wa ba rakela kgole le wena. Lebaka ke gore o tlo hloka thušo ya bona ge nako e dutše e eya. Ka botho, botša batho bao seo o se hlokago ka nako yeo le seo o sa se hlokego.

• Go ya ka maemo a gago, tseba nako yeo o nyakago go ba le batho le yeo o nyakago go ba noši.

MOLAO WA MOTHEO WA BEIBELE: “Ba babedi ba phala o tee, . . . ge yo mongwe a ewa, yo mongwe a ka tsoša mogwera yoo wa gagwe.”​—Mmoledi 4:9, 10.

• Go ja dijo tše di nago le phepo go tla go thuša gore o kgotlelele bohloko bja go hwelwa. Eja dienywa tša go fapafapana, merogo le dijo tše di nago le protheine eupša di se na makhura a mantši.

• Enwa meetse a mantši le dino tšeo di fepago mmele.

• Ge e ba o sa dume dijo, eja tše dinyenyane kgafetšakgafetša. O ka botšiša le ngaka ya gago gore ke dihlare dife le dijo dife tšeo di ka go thušago. *

• Go itšhidulla ka go sepediša le ka ditsela tše dingwe go ka go thuša gore o se dulele go nagana ka dilo tše di kwešago bohloko. Go itšhidulla go ka go thuša gore o naganišiše ka seo se go diragaletšego goba gwa go thuša go lebalanyana ka sona.

MOLAO WA MOTHEO WA BEIBELE: “Ga go na motho yo a kilego a hloya mmele wa gagwe; eupša o a o fepa le go o babalela.”​—Baefeso 5:29.

• Go robala go bohlokwa, eupša go bohlokwa kudu go motho yo a hwetšwego ka gobane go hwelwa go ka dira gore motho a ikwe a lapile kudu.

• O se ke wa ipolaiša dijo le dino tše di nago le khafeine gotee le bjala ka gore di ka go palediša go robala.

MOLAO WA MOTHEO WA BEIBELE: “Go kgotsofatšwa ke bonnyane bjo o nago nabjo go phala go katana kudu, gona go swanago le go phuthela phefo ka kobo.”​—Mmoledi 4:6, Beibele ya Taba ye Botse.

• Gopola gore batho bao ba hwetšwego ga ba lle go swana. Ka gona go tlo nyakega gore wena o tsebe gore o thušwa ke eng gore o ikwe o le kaone.

• Batho ba bantši bao ba hwetšwego ba hweditše gore go botša ba bangwe ka taba ya go hwelwa go a ba thuša, mola ba bangwe ba sa rate go bolela ka yona. Eupša ditsebi ga di dumelelane tabeng ye. Tše dingwe di re go bolela go a thuša mola tše dingwe di re ga go thuše. Ge e ba wena o nyaka go bolela eupša o tšhaba, thoma ka go botša mogwera wa gago. Ka morago ga moo, go tla ba bonolo gore o botše ba bangwe.

• Ba bangwe ba hweditše gore go lla go ba thuša go ikwa ba le kaone, mola ba bangwe ba ikwa ba le kaone le ge ba sa lle kudu.

MOLAO WA MOTHEO WA BEIBELE: “Bohloko bo kwewa ke mong wa bjona.”​—Diema 14:10, Beibele ya Taba ye Botse.

• Batho ba bangwe bao ba hwetšwego ba leka go fokotša bohloko bjo ba bo kwago ka go nwa bjala kudu le go diriša dihlaretagi. Mekgwa ye e kotsi. Le ge mekgwa ye e ka thuša motho ka nakwana, eupša e na le ditlamorago tše bohloko. Leka mekgwa e mengwe e sa gobatšego gore o fokotše bohloko bjo o bo kwago.

MOLAO WA MOTHEO WA BEIBELE: “A re itlhwekišeng ditšhila tšohle.” ​—2 Bakorinthe 7:1.

• E le gore batho ba bangwe ba kgotlelele bohloko bja go hwelwa, ba thušwa ke go ipha nako ya go lla le ya go dira dilo tšeo di ba lebatšago ganyenyane ka bohloko bjo ba bo kwago.

• Dilo tše dingwe tše di ka go thušago ke go dira bagwera ba bafsa, go ithuta go dira dilo tše o sa di tsebego goba go itapološa.

• Ge nako e dutše e eya, maemo a ka boela sekeng. O ka lemoga gore ga o sa fetša nako e ntši o ekwa bohloko. Seo se bontšha gore o a fola.

MOLAO WA MOTHEO WA BEIBELE: “Selo se sengwe le se sengwe se na le nako ya sona e beilwego, . . . [go na le] nako ya go lla le nako ya go sega; nako ya go golola le nako ya go bina.”​—Mmoledi 3:1, 4.

• Thoma go dira dilo tšeo o bego o tlwaetše go di dira.Dira seo ka pela ka mokgwa wo o ka kgonago.

• Ge o ka tlwaela go robala ka nako ye o bego o robala ka yona, wa boela mošomong le go dira dilo tše dingwe tšeo o bego o tlwaetše go di dira, o tla ikwa o boela sekeng.

• Go swarega ka dilo tša bohlokwa go ka fokotša bohloko bjo o bo kwago.

MOLAO WA MOTHEO WA BEIBELE: “Ga se gantši a tlago go gopola mehla ya bophelo bja gagwe, ka gobane Modimo wa therešo o mo neile [goba, o mo dirile gore a nagane kudu ka] lethabo pelong ya gagwe.”​—Mmoledi 5:20.

• Batho ba bantši bao ba ilego ba kitimela go dira diphetho tše dikgolo ka morago ga go hwelwa, ba ile ba itsholela diphetho tšeo.

• Ge e ba go kgonega, leta gore go fete nako e lekanego pele o ka huduga, pele o ka nyaka mošomo o mofsa goba pele o ka lahla dilo tša motho yo a hlokofetšego.

MOLAO WA MOTHEO WA BEIBELE: “Maano a motho yo mafolofolo a a mo hola, eupša mang le mang yo a akgofago o wela bohloking.”​—Diema 21:5.

• Batho ba bangwe bao ba hwetšwego ba re go dira dilo tšeo di ba gopotšago ka motho yoo go a thuša.

• O ka homotšwa ke go kgoboketša dinepe tša motho yoo, dilo tšeo di go gopotšago ka yena goba go ngwala ka pukwaneng dilo tšeo o sa nyakego go di lebala ka yena.

• O se ke wa lahla dilo tšeo di go gopotšago dinako tše di kgahlišago tša ge o be o na le motho yoo, gomme ka morago ge o ikwa o le kaone o di lebelele.

MOLAO WA MOTHEO WA BEIBELE: “[Gopola] matšatši a bogologolo.”​—Doiteronomio 32:7.

• Mohlomongwe o ka ya maikhutšong.

• Ge e ba o sa kgone go ya maikhutšong, mohlomongwe o ka dira selo seo se go thabišago ka letšatši le tee goba a mabedi, e ka ba go bogela tlhago, go ya mmusiamong goba go no tšea leeto ka koloi le bagwera.

• Se sengwe seo se ka go thušago ke go dira dilo tšeo o sa tlwaelago go di dira.

MOLAO WA MOTHEO WA BEIBELE: “Tlang, lena le nnoši, ka thopeng lefelong le le lego lekatana le khutšeng go se nene.”​—Mareka 6:31.

• Ge o thuša batho ba bangwe, o tla ikwa o le kaone.

• O ka thoma ka go thuša ba bangwe bao le bona ba kwešitšwego bohloko ke lehu leo, ba bjalo ka bagwera goba ba leloko, bao ba ka bago ba nyaka go homotšwa.

• Go thekga ba bangwe le go ba homotša go ka dira gore o thabe le go go matlafatša.

MOLAO WA MOTHEO WA BEIBELE: “Go na le lethabo le legolo go neeng go feta go amogeleng.”​—Ditiro 20:35.

• Ka morago ga go hwelwa, iphe nako ya go naganišiša ka seo o se nyakago bophelong.

• Diriša nako yeo go naganišiša ka tsela yeo o phelago ka yona.

• Ge e ba o bona gore o swanetše go dira diphetogo, di dire.

MOLAO WA MOTHEO WA BEIBELE: “Go ya ntlong ya dillo go phala go ya ntlong ya monyanya, ka gobane yeo ke pheletšo ya batho ka moka; yo a phelago o swanetše go dula a gopola ka se.”​—Mmoledi 7:2.

 Ga go na selo se se ka tlošago ka mo go feletšego bohloko bja go hwelwa. Eupša batho ba bantši bao ba hwetšwego ba re ba homoditšwe ke go dira dilo tše itšego, tše bjalo ka tšeo go boletšwego ka tšona sehlogong se. Ke nnete gore ditšhišinyo tšeo di ngwadilwego mo ga se tšona feela di ka fokotšago bohloko bja go hwelwa. Eupša ge o ka diriša tše dingwe tša tšona, o tla ikwa o le kaone.