LEHONO DITSEBI DI BOLELA KUDU KA DITSELA TŠE DINTŠI TŠA KAMOO BATHO BA KA KGOTLELELAGO BOHLOKO BJA GO HWELWA. Eupša ka ge re kwele dihlogong tše di fetilego, gantši keletšo e kaonekaone yeo ditsebi di e neago e dumelelana le puku yeo e ngwadilwego kgale e lego Beibele. Seo se bontšha gabotse gore le ge Beibele e le puku ya kgale, keletšo ya yona ga e felelwe ke nako. Le gona ga se feela gore Beibele e re nea keletšo e botse. Eupša gape e re nea keletšo e di phalago ka moka yeo e ka homotšago bao ba hwetšwego.

• Beibele e re botša gore bahu ga ba tlaišege

  Lengwalo la Mmoledi 9:5 le re: “Bahu ga ba tsebe selo.” Le gona Beibele e re “menagano ya [bona] e a fela.” (Psalme 146:4) Go bontšha gore seo ke nnete, Beibele e swantšha lehu le boroko.—Johane 11:11.

• Beibele e re ge re na le tumelo e tiilego go Modimo re tla homotšega

  Beibele go Psalme 34:15 e re: “Mahlo a Jehofa * a lebeletše baloki, ditsebe tša gagwe di a ba kwa ge ba llela gore a ba thuše.” Go botša Modimo maikwelo a rena ka thapelo ga go re thuše feela go ba le khutšo ya monagano. Eupša go re thuša gore re gwerane le yena, ka gore ke yena a ka re neago matla a go kgotlelela.

• Beibele e re tshepiša bokamoso bjo bo kgahlišago

  Nagana nakong e tlago ge Modimo a tla be a tsoša bahu gore ba phele gape mo lefaseng! Beibele e bolela gantši ka se. Ge e hlalosa kamoo bophelo bo tlago go ba ka gona ka nako yeo e re: “[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”​—Kutollo 21:3, 4.

Batho ba bantši bao ba dumelago go Jehofa, e lego Modimo yo go bolelwago ka yena ka Beibeleng, ba kgona go kgotlelela bohloko bja go hwelwa ka ge ba dumela gore Modimo o tlo tsoša bahu ba gabo bona. Ka mohlala, Ann, yoo a hlokofaletšwego ke monna yo a bego a nyalane le yena ka mengwaga e 65, o re: “Beibele e a nkhomotša ka gore e re bahu ga ba tlaišege, e bile e re Modimo o tlo ba tsoša. Ka mehla ge ke nagana ka lehu la monna wa ka, ke ikhomotša ka mantšu ao. Seo se nthuša go kgotlelela bohloko bja go hwelwa.”

Tiina, yoo go boletšwego ka yena dihlogong tše di fetilego, o re: “Ga e sa le monna wa ka a hlokofala, ke ile ka bona gore Modimo o a nthekga. Ke ile ka kwa gore o a mmatlafatša. Le gannyane ga ke belaele gore Modimo o tlo tsoša bahu. Taba ye e nthuša gore ke kgotlelele go fihlela ge a tla be a tsoša monna wa ka bahung.”

Batho ba bantši bao ba kgolwago seo Beibele e se bolelago ba dumelelana le mantšu ao. Le ge o nagana gore seo Beibele e se rutago se ka se kgonege goba gore ke ditoro, iphe nako ya go e bala. Ge o ka dira bjalo, o tlo bona gore keletšo ya yona e a šoma le gore ditshepišo tša yona ke tša nnete. Le gona o tlo hwetša gore Beibele e nea bao ba hwetšwego thušo e di phalago ka moka.

Bogela dibidio tša mabapi le taba ye wepesaeteng ya jw.org/nso

 GO DIREGA ENG KA BAHU?

NA O KA RATA GO KWA DITABA TŠE DIBOTSE?