1, 2. Kiko kada un di nos mester ta konvensí di dje? (Wak e promé plachi.)

MANERA nos a mira den e artíkulo anterior, Diabel a insinuá ku Yehova no tin derecho di ta e Soberano i ku ta mihó pa humanidat goberná nan mes. Satanas tin rason? Imaginá ku hende ku skohe pa goberná nan mes por biba pa semper. Kosnan lo ta mihó pa nan sin e gobernashon di Dios? Abo lo ta mas felis si bo ta totalmente independiente i ta bibando pa semper?

² Niun hende no por kontestá e preguntanan ei pa bo. Ta kada ken mester pensa bon riba e asuntu ei. Ora nos hasi esei, nos mester ripará ku ta Dios tin derecho di goberná i ku su gobernashon ta esun mihó, i e meresé nos apoyo di henter nos kurason. Beibel ta duna prueba konvinsente di esei. Por ehèmpel, laga nos analisá loke e Skritura ta bisa nos tokante e derecho ku Yehova tin di ta Soberano.

3. Dikon Yehova ta e úniko Soberano legítimo?

³ Yehova ta e Soberano legítimo di universo pasobra e ta e Dios todopoderoso i Kreador. (1 Kró. 29:11; Echo. 4:24) Na Revelashon 4:11, den un vishon e 144.000 ko-gobernantenan huntu ku Kristu ta bisa: “Bo ta digno, Yehova, nos Dios, di risibí alabansa pa bo gloria, onor i poder, pasobra ta abo a krea tur kos, i pa motibu di bo boluntat nan ta eksistí i a ser  kreá.” Sí, komo ku Yehova a krea tur kos, e tin e derecho legítimo di goberná hende i angel.

4. Dikon ora nos rebeldiá kontra Yehova su soberania nos ta hasi mal uso di nos boluntat liber?

⁴ Satanas no a krea nada. P’esei, e no tin derecho di goberná e universo. Ora ku tantu e komo e promé pareha humano a rebeldiá kontra e soberania di Yehova, nan a komportá nan na un manera arogante. (Yer. 10:23) Ta bèrdat ku komo kriaturanan ku tin boluntat liber, nan por a skohe pa ta independiente di Dios. Pero, akaso esei a duna nan e derecho pa hasi esei? Nò. E echo ku hende tin boluntat liber ta yuda nan tuma hopi desishon ku ta bon tur dia. Ma esaki no ta duna nan e derecho di rebeldiá kontra nan Kreador i Dunadó di bida. Klaramente anto, ora nos rebeldiá kontra Yehova, nos ta hasi mal uso di nos boluntat liber. Komo hende, nos mester di Yehova su gobernashon hustu.

5. Dikon nos por ta sigur ku Dios su desishonnan ta hustu?

⁵ Tin mas motibu pakiko Yehova ta e Soberano legítimo. E ta usa su outoridat na un manera perfekto i hustu. E ta deklará: “Ami ta SEÑOR, kende ta mustra miserikòrdia [òf, “amor leal,” NW], huisio i hustisia riba tera; pasobra mi tin delisia den e kosnan akí.” (Yer. 9:24) E no tin nodi di konsultá niun lei ku hende imperfekto a bini kuné pa determiná kiko ta hustu. Su sentido perfekto di hustisia ta bini for di dje mes, i a base di esei el a duna hende lei skirbí. Nos por tin sigur ku tur su lei-, prinsipio- i desishonnan ta hustu, pasobra Beibel ta bisa: “Hustisia i huisio ta e fundeshi di [su] trono.” (Sal. 89:14; 119:128) Na kontraste, apesar ku Satanas a pretendé ku Yehova no ta un gobernante hustu, e no por a krea un mundu kaminda semper hustisia ta prevalesé.

6. Pa ki motibu mas Yehova tin derecho pa goberná mundu?

⁶ Yehova ta e Soberano legítimo tambe pasobra e tin e konosementu i sabiduria pa kuida henter universo. Por ehèmpel, pensa riba e poder ku Dios a duna su Yu pa kura malesa ku dòkternan no tin kura p’e. (Mat. 4:23, 24; Mar. 5:25-29) For di e punto di bista di Yehova, esaki no tabata un milager. E sa kon kurpa di hende ta, i e por kura kualke malesa. Tambe e ta kapas pa lanta hende for di morto i pa prevení desaster natural.

7. Dikon Yehova su sabiduria ta muchu mas superior ku esun di e mundu bou di poder di Satanas?

⁷ E mundu bou di influensia di Satanas ainda ta buskando un manera pa resolvé desakuerdo nashonal i internashonal. Yehova so tin e sabiduria pa trese pas mundial. (Isa. 2:3, 4; 54:13) Segun ku nos ta siña tokante Yehova su konosementu i sabiduria, nos ta sinti meskos ku apòstel Pablo, kende a bisa bou di inspirashon: “O ki profundo e rikesa, sabiduria i konosementu di Dios ta! Ki insondabel su huisionan ta i ki ininvestigabel su kamindanan ta!”—Rom. 11:33.

8. Kiko bo ta gusta mas di Yehova su manera di goberná?

⁸ Beibel no solamente ta mustra ku Yehova tin derecho di goberná, sino e ta mustra tambe dikon su soberania ta superior na esun di otronan. Un motibu ta ku e ta goberná ku amor. Sí, su manera di goberná ta konmové nos. E ta “yen di kompashon i grasia, . . . no ta rabia lihé i . . . ta abundá den miserikòrdia [òf,  “amor leal,” NW] i bèrdat.” (Éks. 34:6) Dios ta trata su sirbidónan humano ku dignidat i rèspèt, i e ta kuida nos mihó ku nos por kuida nos mes. Kontrali na loke Diabel ta pretendé, Yehova ta duna su fiel sirbidónan tur loke ta bon. Sí, asta el a manda su Yu presioso pa asina nos por tin e speransa di biba pa semper.—Lesa Salmo 84:11; Romanonan 8:32.

9. Kon nos por sa ku Dios ta interesá den kada un di nos?

⁹ Yehova ta preokupá pa e bienestar di su pueblo komo grupo, pero e ta interesá tambe den kada persona individual. Por ehèmpel, durante tres siglo, Yehova a usa hues pa salba e nashon di Israel for di nan opresornan. Durante e periodo turbulento ei, e no a keda sin tuma nota di Rut, un muhé ku no tabata israelita kende a hasi hopi sakrifisio pa bira parti di e pueblo di Dios. Yehova a bendishoná Rut ku un kasá i un yu hòmber. Pero esei no ta tur kos. Dia Rut resusitá, lo e haña sa ku su yu tabata un antepasado di e Mesías. Anto imaginá bo kon konmoví lo e keda ora e haña sa ku su historia di bida a keda konserbá den un buki di Beibel ku ta karga su nòmber.—Rut 4:13; Mat. 1:5, 16.

10. Dikon Yehova su gobernashon no ta demasiado restriktivo?

¹⁰ Yehova su gobernashon no ta opresivo ni kruel. E ta duna espasio pa libertat i ta hasi nos felis. (2 Kor. 3:17) David a bisa: “Splendor i mahestat ta [Dios] su dilanti, fortalesa i goso ta den su lugá.” (1 Kró. 16:7, 27) Di igual manera, e salmista Etan a skirbi: “Felis ta e pueblo ku konosé e gritu gososo. O Yehova, nan ta kana den e lus di bo kara. Nan ta alegrá den bo nòmber henter dia, i den bo hustisia nan ta ser halsá.”—Sal. 89:15, 16, NW.

11. Kiko por konvensé nos mas ainda ku Yehova su gobernashon ta esun mihó?

¹¹ Mas nos meditá riba e bondat di Yehova, mas konvensí nos ta keda ku su gobernashon ta esun mihó. Nos ta kuminsá sinti meskos ku e salmista, kende a bisa: “Un dia den bo pationan ta mihó ku mil dia pafó.” (Sal. 84:10) Komo nos Diseñadó i Kreador amoroso, Yehova sa kiko nos mester pa nos ta berdaderamente felis, i e ta satisfasé e nesesidat ei na un manera abundante. Loke e ta rekerí di nos ta pa nos mes bon, i esei ta resultá den gran felisidat, asta si nos tin ku hasi sakrifisio pa kumpli ku su rekisitonan.—Lesa Isaías 48:17.

12. Kiko ta nos motibu prinsipal pa apoyá Yehova su soberania?

¹² Beibel ta indiká ku despues di e Reinado di Mil Aña di Kristu, algun hende lo skohe pa rebeldiá kontra Yehova su soberania. (Rev. 20:7, 8) Kiko por pone nan hasi esei? Despues ku Diabel ser librá for di su prizòn, sin duda lo e purba lanta egoismo den hende ku e intenshon di gaña nan, manera semper el a hasi. Kisas lo e trata di konvensé hende ku nan por haña bida eterno sin ku nan tin ku obedesé Yehova. Klaru ku esei lo no ta posibel. Pero mas importante ainda: Nos lo kere e mentira ei? Si nos ta stima Yehova i ta sirbié pa motibu di su bondat i pasobra é ta e Soberano legítimo di universo, nos lo haña e mentiranan diabóliko ei repugnante. Hamas nos lo ke hiba un bida ku no ta bou di Yehova su soberania hustu i di amor.

13. Kon nos ta demostrá ku nos ta apoyá Dios ora nos ta imit’é?

¹³ Manera nos a mira, Yehova tin e derecho di goberná i su manera di goberná  ta esun mihó. Pues e soberania di Yehova meresé e apoyo di henter nos kurason. Nos por dun’é esei ora nos ta mantené nos integridat i ora nos ta sirbi Dios fielmente. Den ki manera mas nos por demostrá nos apoyo? Nos por apoy’é ora nos ta hasi kosnan manera Yehova ke. Asina nos ta demostrá ku nos ta stima su manera di goberná i ta para tras di dje.—Lesa Efesionan 5:1, 2.

14. Kon kabesnan di famia i ansianonan por imitá Yehova?

¹⁴ For di nos estudio di Beibel nos ta siña ku Yehova ta ehersé outoridat ku amor. P’esei, kabesnan di famia i ansianonan ku ta stima e soberania di Yehova lo no ta eksigente i kere ku nan por hasi i deshasí manera nan haña ta bon. Mas bien, nan lo imitá Yehova. Un bon ehèmpel di esei tabata apòstel Pablo, kende a imitá Dios i su Yu. (1 Kor. 11:1) Pablo no a pone otro hende na bèrgwensa ni e no a preshoná nan pa hasi loke ta bon. En bes di esei, el a motivá nan pa hasi loke ta korekto. (Rom. 12:1; Efe. 4:1; Flm. 8-10) Asina Yehova ta usa su outoridat. Pues, asina nos tur ku ta stima Yehova su manera di goberná i ku ke apoy’é mester hasi.

15. Dikon ora nos mustra rèspèt pa esnan den puesto di outoridat nos ta demostrá ku nos ta apoyá e gobernashon di Dios?

¹⁵ Den ki otro manera nos por apoyá e gobernashon di Yehova? Esei ta ora nos ta mustra rèspèt i ta kooperá ku esnan ku Yehova a pone den puesto di outoridat. Nos lo ke apoyá e órden teokrátiko asta ora nos no ta komprondé algu bon òf ora nos no ta kompletamente di akuerdo ku un desishon. Esei ta un aktitut kompletamente diferente for di mundu, pero esei ta e manera di biba bou di e gobernashon di Yehova. (Efe. 5:22, 23; 6:1-3; Heb. 13:17) I ora nos hasi  esei, lo bai bon ku nos, pasobra Dios tin nos bienestar na pechu.

16. Kon hende ku ta apoyá Dios su soberania ta tuma desishon?

¹⁶ Ademas, nos por demostrá ku nos ta apoyá Dios su soberania den e manera ku nos ta tuma desishon. Yehova no ta bisa nos kiko nos tin ku hasi den kada situashon. Mas bien, e ta revelá na nos kiko ta su pensamentunan. Por ehèmpel, Yehova no ta duna nos un lista di paña ku nos por bisti. Ma e ke pa nos skohe un estilo di bisti i di areglá nos kurpa ku ta demostrá modestia i ku ta pas pa un sirbidó di Dios. (1 Tim. 2:9, 10) Ademas, e no ke pa nos pone otro hende trompeká ni laga nan sinti nan molestiá pa e desishonnan ku nos ta tuma. (1 Kor. 10:31-33) Ora nos ta tuma desishon a base di Yehova su manera di pensa i no solamente a base di nos preferensianan, nos ta demostrá ku nos ta stima i apoyá su manera di goberná.

17, 18. Den ki maneranan parehanan kasá por demostrá ku nan ta apoyá e soberania di Yehova?

¹⁷ Laga nos wak un área den kua un pareha kristian kasá por apoyá e soberania di Yehova. Kiko si bo bida kasá resultá di ta mas difísil ku bo a ferwagt? Òf suponé ku bo ta asta sinti bo desepshoná. Si esei ta e kaso ku bo, pakiko no tuma tempu pa pensa riba e manera ku Yehova a trata e israelitanan? Yehova a kompará su mes ku un esposo pa e nashon di Israel. (Isa. 54:5; 62:4) Nan “matrimonio” sí tabata difísil! Pero Yehova no a entregá fásilmente. Bes tras bes el a mustra miserikòrdia na e nashon i tabata leal na su pakto ku nan. (Lesa Salmo 106:43-45.) E amor leal ei no ta atraé nos na Yehova?

¹⁸ Pues, parehanan kasá ku ta stima Yehova su manera di hasi kos lo imit’é. Nan no ta buska manera ku no ta di akuerdo ku Beibel pa libra nan mes for di un matrimonio difísil. Nan ta realisá ku Yehova a uni nan i ke pa nan “pega” na otro. E úniko base bíbliko pa divorsio ku e chèns ku un hende por bolbe kasa ta inmoralidat seksual. (Mat. 19:5, 6, 9) Pues, parehanan kasá ta demostrá ku nan ta apoyá Yehova su manera hustu di goberná ora nan hasi tur loke ta posibel pa nan matrimonio bai bon.

19. Si nos faya den apoyá e soberania di Dios, kiko nos mester hasi?

¹⁹ Komo ku nos ta imperfekto, tin biaha nos lo hasi kos ku ta desapuntá Yehova. E sa esaki i ku amor el a manda su Yu komo un reskate pa nos. P’esei, ora nos kometé piká, nos mester pidi Yehova pa pordoná nos. (1 Huan 2:1, 2) En bes di keda tormentá nos mes pa pikánan di pasado, nos mester hasi esfuerso pa siña for di nos foutnan. Si nos keda serka Yehova, lo e pordoná nos, yuda aliviá nos doló i prepará nos pa trata ku éksito ku situashonnan similar den futuro.—Sal. 103:3.

20. Dikon nos tin ku apoyá e soberania di Yehova for di awor?

²⁰ Den e mundu nobo, tur hende lo ta bou di e soberania di Yehova i lo siña tokante su kamindanan hustu. (Isa. 11:9) Ma for di awor nos ta siña hopi di nan. I pronto e kuestion di soberania lo keda resolvé unabes i pa semper. P’esei, awor ta e tempu pa nos mantené nos integridat, sirbi Yehova fielmente i hasi tur nos esfuerso pa nos imit’é pa asina nos demostrá ku nos ta apoyá e soberania di Yehova.