1, 2. (a) Ki kuestion fundamental humanidat ta enfrentá? (b) Dikon ta importante pa nos komprondé e asuntu akí bon?

PA HOPI hende awe, plaka ta e kos di mas importante. Nan ta enfoká riba akumulá mas rikesa òf mantené loke nan tin kaba. Pa otro hende, loke ta mas importante pa nan ta di tin un famia, pa ta bon di salú i pa alkansá nan metanan.

² Sinembargo, nos ta enfrentá un kuestion muchu mas importante: vindikashon di e soberania di Yehova. Nos mester tene kuidou pa nos no pèrdè e kuestion importante akí for di bista. Kon esei por sosodé? Nos por bira asina okupá ku nos kosnan di tur dia ku nos por lubidá kon importante e vindikashon di Dios su soberania ta. Òf nos por laga e pruebanan ku nos ta pasa aden tapa e kuestion di peso akí. Di otro banda, mas nos komprondé dikon nos tin ku rekonosé Yehova komo e gobernante supremo, mihó prepará nos lo ta pa enfrentá prueba den nos bida diario i mas nos lo hala serka Yehova.

3. Kiko Satanas a insinuá tokante Dios su gobernashon?

³ Satanas e Diabel a insinuá ku Yehova no tin derecho di goberná, ku su gobernashon ta korupto i ku e no ke lo mehor pa su kriaturanan. Segun Diabel, hende lo ta mas felis i mihó  pará si nan goberná nan mes. (Gén. 3:1-5) Satanas a duna di komprondé tambe ku niun hende no ta leal na Yehova di kurason, i ku si nan ta bou di sufisiente preshon, nan lo rechasá e gobernashon di Dios. (Yòb 2:4, 5) P’esei Yehova ta permití tempu pasa pa demostrá ku e rechaso di su gobernashon hustu a hiba na konsekuensianan teribel.

4. Dikon mester resolvé e kuestion di soberania?

⁴ Klaru ku Yehova sa ku e akusashonnan di Satanas ta falsu. Pues dikon Dios a permití e situashon akí sigui i duna Satanas tempu pa proba su punto? E kontesta riba e pregunta akí ta enbolbé tur angel i tur hende. (Lesa Salmo 83:18. *) Al fin i al kabo, e promé pareha humano a rechasá e gobernashon di Yehova i djei padilanti hopi persona mas a sigui nan. Esaki por pone algun pensa ku kisas Diabel tin rason. Miéntras ku e kuestion akí no ser aklará pa hende i angel, semper lo tin konflikto entre nashon, rasa, tribu, famia i hende individual. Pero despues ku Yehova su soberania keda vindiká, tur kriatura lo someté nan mes na su gobernashon hustu i kreashon lo tin pas atrobe.—Efe. 1:9, 10.

5. Kon nos por apoyá e soberania di Yehova?

⁵ Dios su derecho di goberná lo ser vindiká, e gobernashon di Satanas i e hendenan ku ta apoy’é lo frakasá i Dios lo kaba ku nan. E gobernashon di Dios mediante e Reino Mesiániko lo tin éksito, i hende ku a mantené nan integridat lo demostrá ku hende por apoyá e gobernashon di Dios. (Isa. 45:23, 24) Abo lo ke ta entre esnan ku a keda fiel i a apoyá e soberania di Yehova? Sigur ku sí. Pa nos por keda fiel, nos mester keda ku nos bista fihá riba e kuestion fundamental akí i komprondé kon importante e ta.

6. Kon importante e vindikashon di Yehova su soberania ta?

⁶ Manera a ser menshoná kaba, e vindikashon di Yehova su soberania ta un kuestion fundamental pa humanidat. E ta mas importante ku nos felisidat personal. Esei ta nifiká ku nos salbashon no ta di gran importansia òf ku Yehova no ta interesá den nos? Di ningun manera. Dikon nò?

7, 8. Dikon e vindikashon di e soberania di Dios ta inkluí e kumplimentu di su promesanan?

⁷ Yehova ta stima i ta balorá hende mashá. E tabata dispuesto pa usa e sanger di su Yu pa habri e kaminda pa nos haña salbashon eterno. (Huan 3:16; 1 Huan 4:9) Si Yehova no kumpli ku su promesanan, esei lo duna Diabel motibu pa yama Dios un gañadó i un gobernante inhustu ku ta nenga di duna su sirbidónan loke ta bon. Ademas, esei lo duna Yehova su opositornan motibu pa bisa: “El a primintí ku lo e bini, pero unda su binida a keda? Figurá bo, for di dia ku nos antepasadonan a bai sosegá, tur kos ta sigui eksaktamente manera nan tabata for di kuminsamentu di kreashon.” (2 Ped. 3:3, 4) P’esei Yehova lo hasi sigur ku e vindikashon di su soberania ta inkluí e salbashon di hende obediente. (Lesa Isaías 55:10, 11.) Ademas, amor ta un karakterístika di Yehova su soberania. Pues nos por tin sigur ku semper Yehova lo stima, balorá i apresiá su sirbidónan fiel.—Éks. 34:6.

 ⁸ E echo ku nos ta rekonosé e importansia di e soberania di Yehova no ta nifiká ku nos ta mira nos salbashon komo algu di ménos importansia òf sin balor. Simplemente, nos ta duna e soberania di Yehova i nos salbashon e lugá ku ta korespondé kada un di nan. E lugá korekto ei ta importante si nos ke keda ku nos bista fihá riba e kuestion importante akí i apoyá Yehova su gobernashon hustu.

9. Kiko Satanas a insinuá tokante Yòb? (Wak e promé plachi.)

⁹ E buki di Yòb, un di e promé bukinan di Beibel ku a ser skirbí, ta mustra bon kla pakiko nos mester tin un punto di bista korekto. Ei nos ta lesa tokante e insinuashon di Satanas ku Yòb lo a rechasá Dios si e mester a sufri muchu. Satanas a bisa Dios pa e kousa daño na Yòb. Yehova no a hasi esei, pero el a permití Satanas pone Yòb na prueba, bisando: “Tur loke e tin ta den bo poder.” (Lesa Yòb 1:7-12.) Den poko tempu, Yòb a pèrdè su sirbidónan, su fuente di entrada i su dies yunan stimá. Satanas a logra hasi esaki di tal manera ku a parse manera ku ta Dios mes tabata e kousa di tur e problemanan di Yòb. (Yòb 1:13-19) Despues, Satanas a dal Yòb ku un malesa doloroso i repugnante. (Yòb 2:7) Pa hasi e situashon pió, su kasá i su tres supuesto amigunan a desanim’é.—Yòb 2:9; 3:11; 16:2.

10. (a) Kon Yòb a demostrá ku e tabata fiel na Dios? (b) Ki fayo el a kometé?

¹⁰ Kiko tabata e resultado? Loke Satanas a bisa di Yòb tabata kompletamente falsu. Yòb a nenga di bira lomba pa Dios. (Yòb 27:5) Sinembargo, pa un tempu Yòb a pèrdè for di bista loke tabata realmente importante. El a kuminsá pone muchu atenshon na su mes normanan di hustisia i a asta eksigí un motibu pa su sufrimentu. (Yòb 7:20; 13:24) Kisas nos por komprondé pa Yòb si nos tene na mente kuantu el a sufri. Pero Yehova a mira ku tabata nesesario pa korigí e pensamentu di Yòb. Kiko Yehova a bis’é?

11, 12. Kiko Yehova a yuda Yòb komprondé, i kon Yòb a reakshoná?

¹¹ Nos ta haña loke Dios a bisa Yòb den e kapítulonan 38 pa 41 di e buki di Yòb. Pero nos no ta lesa niun kaminda ku Dios a bisa Yòb pakiko e tabata sufri. Esei no tabata e punto prinsipal, komo si fuera Dios mester a hustifiká su mes. Mas bien, Yehova kier a yuda Yòb rekonosé kon insignifikante e tabata kompará ku Dios su grandesa. El a yuda Yòb komprondé tambe ku tabatin otro kuestionnan mas importante pa preokupá kuné. (Lesa Yòb 38:18-21.) Esaki a yuda Yòb korigí su punto di bista.

 ¹² Yehova tabata muchu severo ku Yòb ora el a papia kuné na un manera asina direkto despues ku Yòb a sufri asina tantu? Nò, i Yòb no a pensa esei tampoko. Apesar di tur loke Yòb a pasa aden, finalmente el a kuminsá komprondé e asuntu. El a asta bisa: “Mi ta hala mi palabranan atras, i ta arepentí den stòf i shinishi.” Yehova su palabranan tabatin un bon efekto riba dje. (Yòb 42:1-6) Mas promé, Yòb a haña korekshon tambe serka e yònkuman Eliú. (Yòb 32:5-10) Despues ku Yòb a aseptá e korekshon di Dios i a kambia su punto di bista, Yehova a duna di konosé ku Yòb tabatin su aprobashon pasobra el a keda fiel ora e tabata pasa den prueba.—Yòb 42:7, 8.

13. Kon e konseho di Dios por a benefisiá Yòb asta hopi tempu despues di su pruebanan?

¹³ E konseho di Yehova lo a sigui benefisiá Yòb asta despues ku su pruebanan a pasa. Kon asina? Wèl, aunke Yehova “a bendishoná e último dianan di Yòb mas ku e proménan,” lo mester a tuma tempu pa Yòb por a rekuperá. Despues el a haña “shete yu hòmber i tres yu muhé.” (Yòb 42:12-14) Siguramente, Yòb mester a sinti falta di su yunan ku a muri na man di Satanas. Pa un tempu, kasi sigur e tabata kòrda tur e sufrimentu ku el a pasa aden. Asta si despues el a haña un mihó komprondementu di e motibu pakiko el a pasa den e pruebanan ei, kisas tin biaha lo e mester a puntra su mes dikon e tabatin ku sufri asina tantu. Sea kual sea su pensamentunan, e por a meditá riba e konseho di Dios. Esei por a yud’é mantené e punto di bista korekto i dun’é konsuelo.—Sal. 94:19.

14. Kiko nos por siña for di e relato di Yòb?

¹⁴ E relato di Yòb por yuda nos tambe haña un punto di bista korekto i tambe konsuelo. Al fin i al kabo, Yehova a konserbá e relato akí “pa nos instrukshon pa asina mediante nos perseveransia i e konsuelo for di e Skritura nos por tin speransa.” (Rom. 15:4) Ki lès nos por saka for di esaki? Na promé lugá, laga nos no ta asina tantu enfoká riba nos mes bida ku nos ta pèrdè for di bista e kuestion di mas importante: vindikashon di e soberania di Yehova. I laga nos kòrda ku nos papel den e kuestion importante akí ta di keda fiel bou di prueba, asta ora nos ta enfrentá sirkunstansianan difísil, manera Yòb a hasi.

15. Kiko lo ta e resultado ora nos keda fiel bou di prueba?

¹⁵ Dikon nos ta haña konsuelo ora nos meditá riba e importansia pa keda fiel? Pasobra esei ta nifiká ku nos no ta sufri pòrnada. E pruebanan ku nos ta pasa aden no ta nifiká ku Dios ta malkontentu  ku nos; mas bien, nan ta duna nos oportunidat pa demostrá ku nos ta apoyá e soberania di Dios. (Pro. 27:11) Nos perseveransia “ta produsí un kondishon aprobá pa Dios” i ta fortalesé nos speransa. (Lesa Romanonan 5:3-5.) E relato di Yòb ta mustra ku “Yehova tin masha kariño, kompashon i miserikòrdia.” (Sant. 5:11) Pues, nos por tin sigur ku Yehova lo rekompensá nos i tur esnan ku ta apoyá su soberania. E konvikshon akí lo yuda nos “soportá tur kos ku pasenshi i goso.”—Kol. 1:11.

16. Dikon nos mester kòrda nos mes pakiko ta asina importante pa apoyá e soberania di Yehova?

¹⁶ Ta bèrdat ku pa nos mantené nos bista fihá riba e vindikashon di Yehova su soberania no ta nada fásil. Tin bes nos por sinti nos hogá den problema. Asta problema chikitu por preokupá nos muchu si nos keda pensa riba nan. P’esei ta importante pa nos keda kòrda nos mes dikon ta asina importante pa apoyá e soberania di Dios ora nos ta enfrentá pruebanan difísil.

17. Ora nos partisipá den e trabou di Yehova, kon esei por yuda nos keda enfoká riba e kuestion di mas importante?

¹⁷ Ora nos ta partisipá regularmente den e trabou di Yehova, nos por keda enfoká riba e kuestion importante. Por ehèmpel, un Testigu ku yama Renee a haña un atake selebral, e tabatin kanser i tabata lucha ku doló króniko. Ora ku e tabata haña tratamentu, e tabata prediká na personal di hospital, na pashènt- i bishitantenan. Na un klínika, el a prediká 80 ora den apénas dos siman i mei. Asta ora Renee tabata muriendo, e no a pèrdè e soberania di Yehova for di bista. Esei na su turno, a aliviá su sufrimentu un poko.

18. Kon e eksperensia di un ruman muhé ta mustra nos pakiko ta bon pa apoyá e soberania di Yehova?

¹⁸ Klaru ku nos ke keda enfoká riba e soberania di Yehova ora nos ta enfrentá problema i e preshonnan di tur dia tambe. Jennifer a pasa tres dia na un aeropuerto ta warda un vuelo pa bai kas. E vuelonan a ser kanselá un tras di otro. Komo ku e tabata hopi kansá i tabata sintié su so, fásilmente e por a kuminsá tene duele di su mes. En bes di hasi esei, el a hasi orashon pa wak kon e por yuda otro hende den sentido spiritual ku tambe tabata den e mesun situashon fèrfelu. Ku ki resultado? El a prediká na hopi hende i a laga hopi publikashon. El a bisa: “Mi a sinti ku Yehova a bendishoná mi aunke mi tabata den un situashon fèrfelu, i el a duna mi forsa pa yuda mi karga su nòmber na un manera digno.” Sí, el a keda enfoká riba e propósito di Yehova.

19. Kiko ta distinguí e religion berdadero for di religion falsu?

¹⁹ Ta e pueblo di Yehova so ta komprondé e importansia di apoyá su soberania, i su pueblo ta hasiendo esei pa hopi tempu kaba. Esei ta distinguí e religion berdadero for di religion falsu. Kada un di nos mester hasi esfuerso pa sigui apoyá e soberania di Yehova.

20. Kon Yehova ta mira bo esfuersonan pa apoyá su soberania?

²⁰ Bo por tin sigur ku Yehova ta balorá bo esfuersonan pa apoyá su soberania mediante bo sirbishi fiel i bo perseveransia bou di prueba. (Sal. 18:25) Den e siguiente artíkulo nos lo analisá mas a fondo dikon e soberania di Yehova meresé tur nos apoyo i kon nos por hasi esei.