DIA 26 di desèmber 2004, un temblor di un magnitut di 9,1 a sagudí e isla Simeulue ku ta keda na kosta nortwèst di Sumatra, Indonesia. Tur hende na kosta tabatin bista riba laman. Asina nan a mira ku e nivel di laman tabata bahando mas ku normal, nan tur a kuminsá kore bai na e serunan. Anto nan tabata grita “Smong! Smong!” ku na nan idioma ta nifiká tsunami. Den ménos ku 30 minüt, olanan grandi a subi kosta i a destruí mayoria di e kas- i pueblitonan.

Simeulue tabata e promé isla ku e tsunami devastador ei a asotá. Pero di e 78.000 habitantenan, ta 7 persona so a pèrdè nan bida. Kon bini ta asina poko hende a muri? * Wèl, e habitantenan di e isla tin un dicho ku ta bisa: ‘Si tin un temblor fuerte i nivel di laman kuminsá baha, kore bai den seru, pasobra laman lo subi tera djis despues.’ Debí na eksperensianan di pasado, e hendenan di Simeulue a siña ku ora nivel di laman baha na un sierto grado ta nifiká ku un tsunami ta na kaminda. Debí ku nan a hasi kaso di spièrtamentu, nan a skapa nan bida.

Beibel ta papia di un desaster ku ta aserkando, un “tribulashon grandi manera no a yega di sosodé nunka, for di prinsipio di mundu te awor, i ku lo no sosodé nunka mas tampoko.” (Mateo 24:21) Pero esaki no ta nifiká ku hende iresponsabel òf un òf otro desaster natural lo destruí nos planeta, pasobra e propósito di Dios ta pa tera permanesé pa semper. (Eklesiástes 1:4) Mas bien, e binidero tribulashon ta un obra di Dios ku lo “kaba ku esnan ku ta kaba ku e tera.” Esei lo ta fin di tur maldat i sufrimentu. (Revelashon 11:18; Proverbionan 2:22) Ki un bendishon esei lo ta!

Ademas, distinto for di tsunami, temblor òf erupshon di volkan, e binidero destrukshon lo no kousa morto di hende inosente. Beibel ta bisa ku “Dios ta amor,” i Dios, kende su nòmber ta Yehova, ta primintí ku “e hustunan lo heredá e tera, i lo biba den dje pa semper.” (1 Huan 4:8; Salmo 37:29) Pero kon bo por sobrebibí e tribulashon grandi i disfrutá di e promesanan di Dios? E klave ta: Hasi kaso di spièrtamentu!

Nos no por bisa presis ki dia e fin di tur maldat i sufrimentu lo bini ya ku Hesus a bisa: “Pa loke ta e dia i ora ei, ningun hende no sa, ni e angelnan di shelu ni e Yu, sino e Tata so.” Apesar di esei, Hesus a animá nos pa “keda vigilá.” (Mateo 24:36; 25:13) Dikon? Beibel ta deskribí kon mundu lo ta promé ku Dios trese un fin. Meskos ku e kambio diripiente di nivel di laman a spièrta e habitantenan di Simeulue ku un tsunami tabata na  kaminda, e kambionan dramátiko di susesonan mundial ta spièrta nos ku e fin ta serka. E kuadro den artíkulo akí ta resaltá algun di e kambionan ku Beibel ta menshoná.

Ta bèrdat ku te na sierto grado algun di e susesonan akí ku e kuadro ta menshoná a yega di tuma lugá den pasado. Pero Hesus a bisa ku ta ora nos mira “tur e kosnan akí,” nos lo sa ku e fin ta serka. (Mateo 24:33) P’esei, puntra bo mes: ‘Na ki momento den historia tur e kosnan deskribí (1) a tuma lugá riba eskala mundial, (2)  na mes momento i (3) a bira mas pió ku nunka?’ Ta bisto ku nos ta bibando den e tempu ei.

Un eks presidente di Merka a yega di bisa: “Sistemanan ku ta spièrta hende adelantá . . . ta skapa bida.” Despues di e tsunami na 2004, outoridatnan a instalá un sistema di alarma den e área afektá pa evitá asina tantu morto den futuro. Di mes manera, Dios a perkurá pa hende haña spièrtamentu promé ku e fin bini. Beibel a profetisá: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.”—Mateo 24:14.

Aña pasá so, Testigunan di Yehova a prediká e bon notisia mas ku 1.9 mil mion ora den 240 pais i na mas ku 700 idioma. E predikashon ekstenso akí ta un prueba grandi ku e fin ta serka. Motivá pa amor pa nan próhimo, Testigunan di Yehova ta hasi tur esfuerso pa spièrta hende ku Dios su dia di huisio ta aserkando rápidamente. (Mateo 22:39) E echo ku bo por benefisiá di e informashon akí ta evidensia di Yehova su amor pa bo. Kòrda, “[Dios] no ta deseá pa ningun hende ser destruí, ma e ta deseá pa tur haña chèns di arepentí.”  (2 Pedro 3:9) Abo lo reakshoná faborabel riba Dios su amor i hasi kaso di spièrtamentu?

Kòrda ku ta asina ku e habitantenan di Simeulue ku tabata biba na kosta a mira ku e nivel di laman a kuminsá baha, nan a kore bai un lugá mas haltu ku tabata mas safe. Nan no a warda pa e nivel di laman normalisá. Pues, nan a skapa pasobra nan a hui mesora. Pa sobrebibí e tribulashon ku ta na kaminda, abo tambe mester, na moda di papia, hui bai un lugá mas haltu promé ku ta lat. Kon asina? Wèl, bou di inspirashon profeta Isaías a skirbi tokante un invitashon konmovedor ku ta ser ekstendé durante “e último dianan,” e tempu den kua nos ta bibando. E invitashon ta bisa: “Ban, laga nos subi bai na e seru di SEÑOR . . . pa e siña nos tokante di su kamindanan, i pa nos kana den su bereanan.”—Isaías 2:2, 3.

Ora bo ta riba un seru, bo tin un mihó bista i bo ta mas safe. Di mes manera, miónes di hende rònt mundu ku ta siña konosé Dios su kamindanan pa medio di Beibel ta hasi kambionan positivo den nan bida. (2 Timoteo 3:16, 17) Debí na esei, nan por “kana den [Dios] su bereanan” i disfrutá di su aprobashon i protekshon.

Abo tambe lo aseptá e invitashon pa disfrutá di Dios su protekshon amoroso durante e dianan difísil akí? Nos ta animá bo pa analisá e tekstonan ku tin den e kuadro di e artíkulo akí. Gustosamente, Testigunan di Yehova den bo área lo ke yuda bo haña un mihó komprondementu di e tekstonan akí i mira kon pa apliká nan. Òf bo por bai riba nos website, www.mt711.com/pap, pa bo por haña kontesta pa bo preguntanan. Bai na SIÑANSA DI BEIBEL > PREGUNTA KU BEIBEL TA KONTESTÁ.