Pakiko kisas lo bo skohe e opshon akí: Bo ke impreshoná bo amigunan i mustra nan kon independiente bo ta. Bo ta haña ku bo sa mas ku bo mayornan, òf kisas bo no tin kunes mashá kiko nan ta pensa.—Proverbionan 14:18.

 E konsekuensianan: Por ta masha bon ku bo amigunan ta keda impreshoná, pero awor nan sa tambe ku bo no ta dje konfiabel ei. Nan lo por pensa ku si bo ta gaña bo mayornan, lo bo gaña nan tambe ora ta kumbiní bo. Anto si bo mayornan haña sa ku bo a bai sin pidi nan, esei sigur lo duel nan i nan lo sinti nan traishoná, i tin hopi chèns ku nan lo straf bo!—Proverbionan 12:15.

 Pakiko kisas lo bo skohe e opshon akí: Bo a pensa riba e invitashon i bo ta haña ku e aktividat ta bai kontra di bo prinsipionan òf ku algun di e hendenan invitá no ta bon kompania. (1 Korintionan 15:33; Filipensenan 4:8) Di otro banda, kisas bo tin gana di bai pero bo no tin e kurashi pa pidi bo mayornan.

 E konsekuensianan: Si bo no ta bai pasobra bo sa ku lo no ta bon pa bai, lo ta mas fásil pa bo bisa bo amigunan ku bo no ke bai. Pero si bo keda sin bai djis pasobra bo no tabatin e kurashi pa pidi bo mayornan, kisas lo bo sinta lamentá na kas ku bo ta e úniko hende ku no ta pasa bon.

 Pakiko kisas lo bo skohe e opshon akí: Bo sa ku bo tin ku skucha di bo mayornan, i bo ta respetá nan opinion. (Kolosensenan 3:20) Bo stima bo mayornan i no ke kibra nan konfiansa hasiendo kos tras di nan lomba. (Proverbionan 10:1) Ora bo pidi nan, bo ta haña un chèns tambe pa splika nan kiko bo ke hasi.

 E konsekuensianan: Bo mayornan lo sinti ku bo ta stima nan i respetá nan. I si nan ta haña ku loke bo a pidi ta rasonabel, nan por asta laga bo bai.

 Un di e motibunan nos por ilustrá asin’akí: Si bo ta bai landa, lo bo no preferá di landa kaminda tin hende sintá na haltu spesial pa tira bista riba e landadónan? Dikon? Pasobra ora bo ta gosa den awa, bo no ta konsiente di tur e peligernan rònt di bo. Pero e persona asigná pa tira bista riba e landadónan tin mas eksperensia i for di su pòst ta den mihó posishon pa kuida bo siguridat. Bo mayornan ta meskos. Debí ku nan tin hopi mas konosementu i eksperensia ku bo, nan ta mira peliger ku abo kisas no ta mira. Meskos ku e persona ku ta tira bista riba e landadónan, bo mayornan no ke stroba bo di dibertí, nan ke yuda bo evitá kualke peliger ku lo por stroba bo di ta felis.

 Ademas, bo mayornan stima bo i nan ta sinti ku ta nan mester protehá bo. P’esei ora por, nan ta bisa ‘sí,’ ma tin biaha nan mester bisa ‘nò.’ Nan sa ku si nan laga bo bai un kaminda i algu pasa ku bo, ta nan tin ku biba ku e konsekuensianan di nan desishon. Ta p’esei nan ta laga bo sali solamente ora nan ta sufisientemente konvensí ku nada malu lo no pasa ku bo.

Loke bo por hasi

 Sea franko: Puntra bo mes: ‘Dikon mi ke bai eigenlijk? Ta pasobra mi gusta e aktividat, òf ta pasobra mi no ke parse di ta diferente for di mi pareunan? Òf ta pasobra un hende ku mi gusta tambe lo t’ei?’ Bo mester ta franko ku bo mayornan tambe. Nan tambe tabata yòn un tempu, i nan konosé bo bon. Pues kisas nan sa kaba ta dikon realmente bo ke bai. Si bo ta franko ku nan, nan lo apresiá esei, i lo duna bo bon konseho. (Proverbionan 7:1, 2) Di otro banda, si bo no ta franko ku nan, nan lo no konfia bo i lo bo tin ménos chèns di haña un ‘sí.’

 Buska e momento korekto: No pidi bo mayornan pa bo sali ora ku nan a kaba di yega kas for di trabou òf ora nan ta okupá ku otro asuntu. Papia ku nan ora nan ta mas trankil. Pero no warda te na último momento pa pidi nan ni pone preshon pa nan duna bo un kontestá mesora. Mayornan no ta gusta ora nan tin ku tuma un desishon den purá. P’esei bo tin ku pidi nan na tempu ya asina nan ta haña chèns di pensa.

 Duna nan informashon: Splika nan presis kiko bo ke hasi. Bo mayornan lo hasi bo preguntanan manera: “Ken mas lo t’ei? Lo tin un hende grandi responsabel? Ki ora bo ta yega kas?” No bisa nan ku bo no sa; nan no gusta e tipo di kontesta ei.

 Bo aktitut: No mira bo mayornan komo bo enemigunan. Mira nan komo parti di bo tim, pasobra, al fin i al kabo, nan ta na bo banda. Si bo mira nan asina, lo bo no bai pusta boka ku nan i lo bo kooperá mas tantu ku nan.

 Mustra bo mayornan ku bo tin sufisiente madures pa aseptá i respetá nan desishon, i esei lo pone ku nan tambe lo respetá bo. Kisas e siguiente biaha ku bo pidi nan pa sali, lo tin mas chèns ku nan ta bisa bo ‘sí.’