Pa algun hende, no tin nada pió ku keda sin nada di hasi i niun kaminda pa bai pasobra áwaseru no ta laga nan sali for di kas. Un hóben ku yama Robert a bisa: “Den momentonan asina, mi ta djis sinta einan sin sa kiko pa hasi.”

 Abo a yega di sinti asina? Si esei ta e kaso, e artíkulo akí por yuda bo!

•  Loke bo mester sa

•  Loke bo por hasi

•  Loke otro hóben ta bisa

•   No ta semper teknologia ta yuda.

   Bo por pasa tur bo tempu riba Internet. Pero, esei por pone ku bo ta bira ménos kreativo i ta sinti bo mas laf ainda. Jeremy, di 21 aña, a bisa: “Bo por haña bo ta sinta wak pantaya sin ku bo ta ègt usa bo mente.”

   Elena un hóben di 23 aña ta pensa meskos. El a bisa: “Tin hopi kos ku bo por hasi ku teknologia, pero e ta distraí bo di e mundu rònt di bo. I ora bo pone bo aparatonan un banda, bo ta sinti bo mas laf ku promé.”

•   Bo aktitut por hasi un diferensia.

   Si bo tin hopi kos di hasi, esei lo pone ku bo no ta sinti bo laf mas? Wèl, esei ta dependé di kon interesá bo ta den loke bo ta hasi. Por ehèmpel, un hóben di 21 aña ku yama Karen a bisa: “Mi tabata haña skol masha laf mes, aunke mi tabatin kos di hasi henter dia. Bo mester ta interesá den loke bo ta hasi pa bo no sinti bo laf.”

 Bo Tabata Sa? “Si bo no tin nada di hasi,” esei no ta un opstákulo pero un oportunidat. E ta manera tera fértil unda bo kreatividat por krese.

 Purba di hasi algu otro. Buska mas amigu. Kuminsá ku un hòbi nobo. Buska informashon tokante un tópiko nobo. Hende ku ta interesá den diferente kos tin ménos chèns di sinti nan laf ora nan ta nan so. Ademas, otro hende lo no haña nan laf tampoko!

 Prinsipio di Beibel: “Tur loke bo man haña pa hasi, hasié ku tur bo forsa.”​—Eklesiástes 9:10.

 “Resientemente, mi a kuminsá siña chines, i awor ku mi ta praktiká tur dia, mi a realisá ku mi tabata ègt haña falta di usa mi mente den e manera ei. Mi gusta ku mi tin un proyekto pa traha riba dje. E ta yuda mi tene mi mente okupá i hasi bon uso di mi tempu.”​—Melinda.

 Enfoká riba bo meta. Si bo ta mira ku loke bo ta hasi tin un propósito, lo bo haña mas gana di hasié. Asta hùiswèrk por ta ménos laf si bo sa e motibu pakiko bo ta hasié.

 Prinsipio di Beibel: “No tin nada mihó pa hende, ku regosihá i . . . mira e bon ku tin den tur su trabou.”​—Eklesiástes 3:12, 13.

 “Ora mi tabata den kaba skol, mi mester a siña ocho ora pa dia pasobra mi no a kuminsá siña mas promé. Tabata laf? Nò, pasobra mi tabata determiná pa logra mi meta. Mi a keda enfoká riba e resultado final, pa gradua, i esei ta loke a motivá mi.”​—Hannah.

 Aseptá loke bo no por kambia. Asta e kosnan ku mas nos ta gusta hasi por tin su partinan laf tambe. I asta bo mihó amigunan por kanselá un plan, i bo ta keda sin nada di hasi. En bes di laga e situashon hasi bo tristu, purba di tin un punto di bista positivo.

 Prinsipio di Beibel: “Esun di kurason kontentu semper tin fiesta.”​—Proverbionan 15:15.

 “Un amigu a bisa mi pa siña disfrutá di e tempu ku mi ta mi so. El a bisa ku tur hende mester siña haña un balansa entre e tempu ku nan ta pasa nan so i e tempu ku nan ta pasa ku otro hende.”​—Ivy.