Waut sajcht de Schreft äwa wiet vespreede Krankheiten?

AUFSPÄLEN

Waut de Schreft doatoo sajcht

De Schreft säd verut, daut et enne latste Tiet Pestilenz jäwen wudd. Daut sent wiet vebreede Krankheiten, daut sent uk soone, waut sikj oppe gaunze Welt vespreeden (Lukas 21:11). Soone Krankheiten komen nich von Gott. Em Jäajendeel, Gott woat derch sien Kjennichrikj boolt met aule Sorten Krankheiten een Enj moaken.

Säd de Schreft dise wiet vespreede Krankheiten verut?

De Schreft sajcht nich verut, waut vonne Sorten Krankheiten doa wudden oppkomen, soo aus biejlikj COVID-19, AIDS (SIDA) ooda de Spaunische Jripp. Oba dee säd verut, daut et wudd “Pestilenz” jäwen un “Ploagen, waut toom Doot fieren” (Lukas 21:11, PB; Openboarunk 6:8, NW). Dise Krankheiten sent een Poat von daut Tieekjen, daut wie en “de latste Doag” läwen un “daut dise Tiet aufschluten woat” (2. Timotäus 3:1, PB; Matäus 24:3, PB).

Haft Gott mol Menschen met Krankheiten jestroft?

Enne Schreft finj wie wietleftich Biespels, wua Gott Menschen met Krankheiten stroft. Biejlikj kjrieejen eenje de Leprakrankheit (4. Mose 12:1-16; 2. Kjennichs 5:20-27; 2. Chronik 26:16-21). Daut wieren mau eenselne Menschen, waut dise Strof kjrieejen, wiels dee sikj gaunz jäajen Gott stalden. Oba daut wieren nich äwaschlapende, wiet vespreede Krankheiten, un doa worden uk nich de Menschen krank, waut nuscht veschulcht hauden.

Sent de wiet vespreede Krankheiten, waut et nu jeft, eene Strof von Gott?

Nä. Eenje Menschen sajen, daut Gott de Menschen vondoag dän Dach met Krankheiten strofen deit. Oba de Schreft unjastett dise Iedee nich. Wuarom nich?

Na, biejlikj weet wie, daut eenje von Gott siene Deena met schlemme Krankheiten foadich woaren motten. Daut es nu soo un daut wia uk soo enne Vegonenheit. De trua Maun Timotäus wia biejlikj “foaken krank” (1. Timotäus 5:23, PB). Oba de Schreft sajcht noanich wua, daut dee krank worden, wiels Gott äwa an vestalt wia. Vondoag dän Dach es daut uk soo, daut eenje von Gott siene true Deena krank woaren ooda sikj Krankheiten äwaschlapen. Foaken es daut, wiels dee eefach to de orrajchte Tiet oppe orrajchte Städ wieren (Liera 9:11).

Un de Schreft lieet ons uk, daut de Tiet toom de Schlajchte strofen fa Gott noch nich jekomen es. Dee sajcht mau rajcht: “De Dach, junt to raden, es nu hia”. Daut meent, wie läwen nu en de Tiet, wua Gott haben well, daut aule Menschen sikj sellen oppmoaken, daut dee kjennen jerat woaren (2. Korinta 6:2, PB). Doawäajen lat Gott biejlikj derch een Prädichtwoakj äwa de gaunze Welt de goode Norecht “von Gott sien Rikj” bekauntmoaken (Matäus 24:14, PB).

Woaren wiet vespreede Krankheiten noch mol een Enj haben?

Jo. De Schreft sajcht, daut doa boolt kjeena mea woat krank sennen. Gott woat derch sien Kjennichrikj aule Krankheiten wajchnämen (Jesaja 33:24; 35:5-6). Daut woat kjeen Lieden ooda Weedoag mea jäwen un doa woat uk kjeena mea stoawen (Openboarunk 21:4). Un hee woat dee, waut jestorwen sent, wada toom Läwen brinjen. Dee woaren gaunz jesunt sennen un daut Läwen woat hia oppe Ieed dan wundascheen sennen (Psalm 37:29; Aposteljeschicht 24:15).

Bibelvarzhen äwa Krankheiten

Matäus 4:23 (PB): “Jesus jinkj derch gaunz Galiläa un lieed en äare Judenschoolen un prädijd daut Evangelium vom Rikj un heeld jieda Krankheit un Liedenschoft em Volkj.”

Waut daut bediet: Jesus siene Wunda wiesen, waut Gott sien Kjennichrikj boolt fa aule Menschen doonen woat.

Lukas 21:11 (PB): “Doa woat ... Pestilenz sennen”.

Waut daut bediet: Wiet vespreede Krankheiten sent Poat von daut Tieekjen, daut wie en de latste Tiet läwen.

Openboarunk 6:8 (PB): “Un ekj kjikjt, un sach een Pieet blaus aus een Dooden. Un dee doabowen saut, heet Doot, un daut Doodenrikj kjeem am hinjaraun. Un am wort Krauft jejäft ... doottomoaken [“met Ploagen, waut toom Doot fieren”, NW]”.

Waut daut bediet: De Profezeiunk von de vea Rittasch en de Openboarunk wiest, daut et en onse Tiet wudd schlemme Krankheiten jäwen.