De Schreft rät von Sachen, waut passieren wudden, un woo de Menschen wudden sennen, wan “dise Tiet aufschluten woat” (Matäus 24:3, PB). De Lutherbibel von 1912 rät en disen Varsch von daut Tieekjen “des Endes der Welt”. De Schreft nant dise Tiet “de latste Doag” un “de Tiet, dee fa daut Enj jeplont es” ooda “de bestemmte Tiet aum Enj” (2. Timotäus 3:1, PB; Daniel 8:19, PB, JHF).

 De Bibel rät von Sachen, waut aula tojlikj passieren wudden. Dit wudd daut “Tieekjen” sennen von de latste Doag (Lukas 21:7, PB). Unjasto die mol dise Biespels:

 Opp väl Städen woat Kjrich sennen. Jesus säd verut: “Een Volkj woat jäajen daut aundre oppstonen, un een Kjennichrikj jäajen daut aundre” (Matäus 24:7, PB). En Openboarunk 6:4 (PB) sajcht daut verut, daut een Ritta, waut Kjrich väastalt, dän “Fräd von de Ieed . . . [wajch] nämen” wudd.

 Doa woat Hungaschnoot sennen. Jesus säd verut: “Doa woaren opp veschiedne Städen . . . Hungaschnoot . . . sennen” (Matäus 24:7, PB). De Openboarunk rät von noch eenen aundren Ritta, waut uk een Jlikjnis es, un disa wudd Hungaschnoot brinjen opp väl Städen (Openboarunk 6:5-6).

 Daut woat groote Ieedbäbens jäwen. Jesus säd: “Doa woaren opp veschiedne Städen . . . Ieedbäben sennen” (Matäus 24:7, PB; Lukas 21:11). Dise groote Ieedbäben wudden mea Lieden un mea Doot brinjen aus jeemols ea.

 Doa woaren Krankheiten sennen. No Jesus no wudd doa “Pestilenz” sennen, ooda wiet vespreede Krankheiten (Lukas 21:11, PB).

 Doa woat väl Grausomkjeit sennen. Wan de Menschen uk aul fa hundade Joaren schlajchtet deeden, säd Jesus oba verut, daut enne latste Tiet “de Gottloosichkjeit woat äwahaunt nämen” (Matäus 24:12, PB).

 De Menschen woaren de Ieed vedoawen. En Openboarunk 11:18 (PB) woat verutjesajcht, doa wudden Menschen sennen, dee “de Ieed vedorwen haben.” Woo wudd daut soo wiet komen? Dee wudden biejlikj väl schlajchtet doonen un uk de Ieed schoden un krank moaken.

 Woo de Menschen sent, woat emma oaja woaren. En 2. Timotäus 3:1-4 (PB) sajcht daut verut, daut de Menschen wudden “ondankboa, onheilich sennen, . . . [sikj] nich veseenen loten, sikj unjarenaunda spotten un veachten, sikj nich beharschen un onbandich sennen, daut goode nich lieden kjennen, sikj unjarenaunda veroden, ruchloos un stolt sennen met daut, waut see sikj enbillen”. Daut wudd met de Menschen soo oajch woaren, daut eena werkjlich sajen kunn, daut daut “jreslich schwoare Tieden” sent.

 Famieljes woaren uteneenbräakjen. En 2. Timotäus 3:2-3 (PB) sajcht de Schreft verut, daut väl Menschen “sikj nich goot sennen” woaren en de Famielje, un de Kjinja woaren “de Elren nich jehorchen”.

 De Menschen äare Leew fa Gott woat emma weinja woaren. Jesus säd verut, daut “de Leew bie väle Menschen kolt woaren” wudd (Matäus 24:12, PB). Jesus meend, daut bie de mieeschte Menschen de Leew fa Gott wudd kolt woaren. Un 2. Timotäus 3:4 (PB) sajcht, daut en de latste Tiet wudden soone Menschen “daut Vejnieejen leewa haben aus Gott.”

 De Menschen woaren väajäwen, gottesferchtich to sennen. En 2. Timotäus 3:5 sajcht de Schreft verut, daut de Menschen bloos wudden väajäwen, daut dee Gott deenen, oba dee wudden nich werkjlich daut doonen, waut hee velangt.

 De biblische Profezeiungen woaren emma kloara to vestonen sennen. En daut Buak Daniel wort verutjesajcht, daut en “de Doag, dee nom Enj gonen” väle de Woarheit von de Schreft wudden bäta vestonen kjennen (Daniel 12:4, PB). Dee wudden uk kjennen dise Profezeiungen kloara vestonen.

 Doa woat äwa de gaunze Welt jeprädicht woaren. Jesus säd verut: “Daut Evangelium von Gott sien Rikj woat en de gaunze Welt jeprädicht woaren” (Matäus 24:14, PB).

 Väle woaren jlikjeltich sennen un spotten. Jesus säd verut, daut de mieeschte Menschen daut nich wudden jleewen, daut daut Enj dicht bie es, wan daut uk äwajenuach Bewies doafäa wudd jäwen (Matäus 24:37-39). Un 2. Petrus 3:3-4 sajcht verut, dee wudden mau rajcht äwa de Bewies spotten un doa nuscht om romjäwen.

 Aule Profezeiungen woaren sikj erfellen. Jesus säd, daut sikj aul dise Profezeiungen en de latste Tiet tojlikj erfellen wudden, nich bloos een poa ooda de mieeschte doavon (Matäus 24:33).

 Jo. Soo aus daut nu en de Welt dreit un no daut no, waut de Schreft sajcht, haben de latste Doag aune 1914 aunjefongen. Daut Joa funk de Ieeschta Weltkjrich aun. Aules, waut vondoag dän Dach passieet, wiest kloa, daut wie nu en de latste Tiet läwen. Toom mea doaräwa seenen, kjikj daut Video:

 Aune 1914 funk Gott sien Kjennichrikj aun, em Himmel to rejieren. Eent von daut ieeschte, waut doa passieed, wia, daut de beesa Fient un siene beese Jeista utem Himmel rutjeschmäten worden no de Ieed. Dee kjennen nu bloos oppe Ieed schlajchtet doonen (Openboarunk 12:7-12). De Soton haft daut bat doa jebrocht, daut väl Menschen am nodoonen, un daut es kloa doaraun to seenen, daut dee schlajcht enjestalt sent un väl schlajchtet doonen. Un doawäajen es daut uk soo, daut en de latste Doag “jreslich schwoare Tieden sennen woaren” (2. Timotäus 3:1, PB).

 Väle moaken sikj en dise schwoare Tieden groote Sorjen. Dee moaken sikj Sorjen doaräwa, daut de Menschen nich mea unjarenaunda foadich woaren. Eenje haben mau rajcht Angst, daut de Menschen sikj omzajcht gaunz venichten woaren.

 Aundre moaken sikj uk Sorjen, äwa woo daut en de Welt dreit, oba dee haben de Hopninj, daut daut woat bäta woaren. Dee sent sikj gaunz secha, daut Gott sien Kjennichrikj boolt met aule Trubbels oppe Welt een Enj moaken woat (Daniel 2:44; Openboarunk 21:3-4). Dee wachten jeduldich, bat Gott woat siene Vespräakjungen erfellen. Un Jesus siene Wieed jäwen an Moot, aus hee säd: “Wäa bat aum Enj uthelt, woat jerat woaren” (Matäus 24:13, PB; Micha 7:7).