اِصطلا‌ح ”‏نواں یروشلیم“‏ پوری بائبل چ صرف دو وار استمال ہوئی اے۔ ایہہ کوئی حقیقی شہر نئیں اے سگوں ایہہ یسوع مسیح دے اوہناں پیروکاراں وَل اشارہ کردا اے جیہڑے اسمان تے جا کے یسوع مسیح نال حکمرانی کرن گے۔ (‏مکاشفہ 3:‏12؛‏ 21:‏2‏)‏ بائبل چ ایہناں پیروکاراں نُوں مسیح دی دُلہن وی کہیا گیا اے۔‏

1.   نواں یروشلیم اسمان تے وے۔‏ بائبل چ جدوں وی نویں یروشلیم دا ذکر ہویا اے تے ایہدے بارے دَسیا گیا اے کہ ایہہ اسمان توں اُتر رہیا اے۔ ایہدے بارے ایہہ وی دَسیا گیا اے کہ فرشتے ایہدے دروازیاں دی حفاظت کر رہے نیں۔ (‏مکاشفہ 3:‏12؛‏ 21:‏2،‏ 10،‏ 12‏)‏ ایہدے علاوہ ایہہ شہر بوہت ای وڈا اے۔ جے ایہدے آلے دوالے چکر لایا جائے تے ایہہ 12 ہزار ”‏فرلانگ“‏ (‏تقریباً 2220 کلومیڑ)‏ ہوئے گا۔‏ a مکاشفہ دی کتاب چ دَسیا گیا اے کہ ایس شہر دی لمبائی، چوڑائی تے اُونچائی برابر اے۔ (‏مکاشفہ 21:‏16‏)‏ ایس حساب نال ایس شہر دی اُونچائی تقریباً 560 کلومیڑ (‏350 میل)‏ بن دی اے۔ جے ایہہ شہر زمین تے ہوندا تے ایہہ خلا تک پونچ جاندا۔‏

2.   نواں یروشلیم اصل چ یسوع دے اوہ پیروکار نیں جنہاں نُوں مسیح دی دُلہن کہیا گیا اے۔‏ نویں یروشلیم نُوں دُلہن یعنی میمنے دی بیوی کہیا گیا اے۔ (‏مکاشفہ 21:‏9، 10‏)‏ بائبل دے مطابق میمنا یسوع مسیح وَل اشارہ کردا اے۔ (‏یوحنا 1:‏29؛‏ مکاشفہ 5:‏12‏)‏ میمنے دی بیوی یعنی دُلہن اوہناں مسیحیاں وَل اشارہ کردی اے جیہڑے یسوع نال مل کے اسمان توں حکمرانی کرن گے۔ بائبل چ یسوع تے ایہناں مسیحیاں دے رشتے نُوں شوہر تے بیوی دے رشتے وانگوں کہیا گیا اے۔ (‏2-‏کُرنتھیوں 11:‏2؛‏ اِفسیوں 5:‏23-‏25‏)‏ ایہدے علاوہ نویں یروشلیم دے بنیادی پتھراں اُتے میمنے دے 12 رسولاں دے ناں لکھے ہوئے نیں۔ (‏مکاشفہ 21:‏14‏)‏ ایس گل توں نویں یروشلیم دی پچھان کرن چ مدد مِلدی اے کیونکہ جنہاں مسیحیاں نُوں اسمان تے زندہ کرن لئی چُنیا گیا اے، اوہ اِک ایہو جہی عمارت نیں جیہڑی رسولاں تے نبیاں دی بنیاد تے بنائی جا رہی اے۔—‏اِفسیوں 2:‏20‏۔‏

3.   نواں یروشلیم اِک حکومت دا حصہ اے۔‏ پرانا شہر یروشلیم ملک اِسرائیل دا درالحکومت ہوندا سی جِتھے بادشاہ داؤد، اوہدا پُتر سلیمان تے اوہدی نسل توں آن والے ہور بادشاہ یہوواہ دے تخت اُتے بیٹھ کے حکومت کردے سن۔ (‏1-‏تواریخ 29:‏23‏)‏ ایہہ یروشلیم جنہوں مُقدس شہر وی کہیا گیا اے، خدا دی حکمرانی وَل اشارہ کردا سی۔ (‏نحمیاہ 11:‏1‏)‏ نویں یروشلیم نُوں وی مُقدس شہر کہیا گیا اے۔ ایہہ اوہناں لوکاں وَل اشارہ کردا اے جیہڑے بادشاہواں دے طور تے اسمان توں زمین اُتے حکمرانی کرن گے۔—‏مکاشفہ 5:‏9، 10؛‏ 21:‏2‏۔‏

4.   نواں یروشلیم زمین تے رہن والے لوکاں لئی برکتاں لیائے گا۔‏ بائبل چ جدوں نویں یروشلیم دا ذکر کیتا گیا تے ایہدے بارے کہیا گیا کہ ایہہ اسمان توں خدا وَلّوں تھلے آ رہیا اے۔ (‏مکاشفہ 21:‏2‏)‏ ایہدے توں ظاہر ہوندا اے کہ خدا ایہنوں زمین تے سارے معاملیاں نُوں سنبھالن لئی استمال کرے گا۔ ایس لئی نویں یروشلیم دا تعلق خدا دی بادشاہی نال اے جدے ذریعے خدا اسمان وانگوں زمین تے وی اپنی مرضی پوری کر ے گا۔ (‏متی 6:‏10‏)‏ جدوں زمین تے مکمل طور تے خدا دی مرضی ہوئے گی تے انساناں نُوں بوہت ساریاں برکتاں مِلن گیاں جیویں کہ:‏

   •   گُناہواں توں چھٹکارا ملے گا۔‏ نویں یروشلیم توں زندگی دے پانی دا دریا وَگدا اے جیہڑا اوہناں درختاں نُوں ہرا بھرا کردا اے جنہاں توں قوماں نُوں شفا مِلدی اے۔ (‏مکاشفہ 22:‏1، 2‏)‏ ایس بندوبست توں انساناں نُوں گُناہواں توں چھٹکارا ملے گا تے اوہ خدا دے مقصد دے مطابق بے‌عیب زندگی پا سکن گے۔—‏رومیوں 8:‏21‏۔‏

   •   انساناں دا خدا نال فیر توں رشتہ جُڑ جائے گا۔‏ گُناہ دی وجہ توں خدا تے انساناں چ دُوری پیدا ہو گئی سی۔ (‏یسعیاہ 59:‏2‏)‏ جدوں انساناں نُوں گُناہ توں چھٹکارا مل جائے گا تے ایہہ پیشین‌گوئی مکمل طور تے پوری ہوئے گی:‏ خدا دا خیمہ انساناں دے وچکار اے۔ اوہ اوہناں دے نال رہوے گا تے اوہ اوہدے بندے ہون گے۔ تے خدا آپ اوہناں دے نال ہووے گا۔—‏مکاشفہ 21:‏3‏۔‏

   •   مصیبتاں تے موت دا خاتمہ ہو جائے گا۔‏ اپنی بادشاہی دے ذریعے خدا انساناں دے سارے اتھرو پونجھ دَوے گا تے نہ موت رہوے گی، نہ ماتم، نہ رونا، نہ درد۔ جو کجھ پہلے ہوندا سی اوہ سب ختم ہو گیا۔—‏مکاشفہ 21:‏4‏۔‏