یوحنا دا پہلا خط 4:1-21
4 میرے پیاریو، تُسی ہر اوس پیغام تے یقین نہ کرو جیہڑا لگدا اے کہ خدا وَلّوں آیا اے۔ ایہدی بجائے ہر پیغام نُوں پَرکھو کہ کیہہ اوہ واقعی خدا وَلّوں آیا اے کیونکہ دُنیا چ بوہت سارے جھوٹھے نبی آ گئے نیں۔
2 ایس گل توں توانوں پتہ لگے گا کہ کیہڑا پیغام واقعی خدا وَلّوں اے: جیس پیغام چ ایہہ اِقرار کیتا جاندا اے کہ یسوع مسیح انسان دے طور تے آیا، اوہ خدا وَلّوں اے۔
3 پر جیس پیغام چ یسوع دا اِقرار نئیں کیتا جاندا، اوہ خدا وَلّوں نئیں اے۔ اصل چ اوہ پیغام مسیح دے مخالف وَلّوں اے تے توانوں دَسیا گیا سی کہ اوہ پیغام سُنایا جائے گا۔ تے واقعی ہُن دُنیا چ اوہ سُنایا جا رہیا اے۔
4 پیارے بچیو، تُسی خدا دے او تے تُسی جھوٹھے نبیاں تے فتح پا لئی اے کیونکہ خدا جیہڑا تواڈے نال اے، اوس اِبلیس نالوں کِتے زیادہ طاقتور اے جیہڑا دُنیا نال اے۔
5 جھوٹھے نبی دُنیا دی سوچ رکھدے نیں۔ ایس لئی اوہناں دا پیغام وی دُنیا وَلّوں اے تے دُنیا اوہناں دی سُن دی اے۔
6 پر اَسی خدا دے آں۔ جیہڑا انسان خدا نُوں جان دا اے، اوہ ساڈی گل سُن دا اے۔ پر جیہڑا انسان خدا دا نئیں ہوندا اے، اوہ ساڈی گل نئیں سُن دا۔ ایس طرحاں اَسی ویکھ سکنے آں کہ کیہڑا پیغام سچا تے خدا وَلّوں اے تے کیہڑا پیغام جھوٹھا اے۔
7 میرے پیاریو، آؤ اَسی اِک دُوجے نال پیار کردے رہیے کیونکہ پیار خدا وَلّوں اے تے جیہڑے پیار کردے نیں، اوہ خدا دے بچے نیں تے اوہ خدا نُوں جان دے نیں۔
8 پر جیہڑے پیار نئیں کردے، اوہ خدا نُوں نئیں جان دے کیونکہ خدا محبت اے۔
9 خدا نے ساڈے لئی پیار ایس طرحاں ظاہر کیتا کہ اوہنے اپنا اکلوتا پُتر دُنیا چ گھلیا تاکہ اوہدے ذریعے سانوں زندگی ملے۔
10 ایس سلسلے چ پیار دا مطلب ایہہ نئیں کہ اَسی خدا نال پیار کیتا اے سگوں اوہنے ساڈے نال پیار کیتا اے تے ساڈے گُناہواں دی خاطر اپنے پُتر نُوں* گھلیا تاکہ ساڈی اوہدے نال صلح ہو جائے۔
11 میرے پیاریو، جے خدا نے ساڈے نال ایناں پیار کیتا اے تے ساڈا وی فرض اے کہ اَسی وی اِک دُوجے نال پیار کرئیے۔
12 خدا نُوں کسے نے کدی نئیں ویکھیا۔ جے اَسی اِک دُوجے نال پیار کردے رہواں گے تے خدا ساڈے نال ہوئے گا تے ساڈے چ اوہدا پیار پوری طرحاں نظر آئے گا۔
13 اَسی جاننے آں کہ اَسی اوہدے نال اِک مُٹھ آں تے اوہ ساڈے نال اِک مُٹھ اے کیونکہ اوہنے سانوں اپنی پاک روح دِتی اے۔
14 ایہدے علاوہ اَسی آپ ویکھیا اے تے ایس گل دی گواہی دینے آں کہ باپ نے اپنے پُتر نُوں دُنیا دا نجاتدہندہ بنا کے گھلیا۔
15 جیہڑا وی ایہہ من دا اے کہ یسوع خدا دا پُتر اے، خدا اوہدے نال اِک مُٹھ رہندا اے تے اوہ خدا نال اِک مُٹھ رہندا اے۔
16 نالے اَسی جان گئے آں کہ خدا ساڈے نال پیار کردا اے تے سانوں اوہدے پیار تے بھروسا اے۔
خدا محبت اے تے جیہڑا محبت کردا رہندا اے، اوہ خدا نال اِک مُٹھ رہندا اے تے خدا وی اوہدے نال اِک مُٹھ رہندا اے۔
17 ایس طرحاں ساڈی محبت چ کوئی کمی نئیں رہندی جدی وجہ توں اَسی عدالت دے دن بغیر جھجکے* گل کر سکاں گے کیونکہ ایس دُنیا چ اَسی مسیح ورگے آں۔
18 محبت وچ ڈر نئیں ہوندا سگوں کامل محبت ڈر نُوں دُور کر دیندی اے کیونکہ ڈر ساڈے لئی رکاوٹ بن دا اے۔ اصل چ جیہڑا انسان ڈردا اے اوہدی محبت مکمل نئیں ہوندی۔
19 اَسی ایس لئی محبت کرنے آں کیونکہ پہلاں خدا نے ساڈے نال محبت کیتی۔
20 جے کوئی کہندا اے کہ ”مَیں خدا نال پیار کرنا واں“ پر اوہ اپنے بھرا نال نفرت کردا اے تے اوہ جھوٹھا اے کیونکہ جیہڑا اپنے بھرا نال پیار نئیں کردا جنہوں اوہنے ویکھیا اے، اوہ خدا نال وی پیار نئیں کر سکدا جنہوں اوہنے نئیں ویکھیا۔
21 سانوں اوہدے وَلّوں ایہہ حکم ملیا اے کہ جیہڑا خدا نال پیار کردا اے، اوہ اپنے بھرا نال وی پیار کرے۔
