اوہ یہوواہ دے گواہ بس لوکاں نال ای پیار نال گل بات نئیں کر‌دے سن سگوں اوہ میرے کتیاں نال وی بڑے پیار نال پیش آندے سن۔ اِک دن ایلین ناں دی یہوواہ دی گواہ اپنی کتاباں والی ٹرالی کول کھلوتی ہوئی سی۔ اوہنے میرے دونواں کتیاں نُوں کجھ بسکٹ دِتے۔ایہدے بعد جدوں وی میں اوتھوں لنگھنا ساں میرے کتے دوڑ کے اوہناں کول چلے جاندے سن۔‏

اِنج ای کئی مہینے لنگھ گئے۔ گواہ میرے کتیاں نُوں بسکٹ دیندے سن تے ایس دوران ساڈی تھوڑی بوہت گل بات ہو جاندی سی۔میں اوہناں نال بوہتی دوستی نئیں ودھانا چاہنا ساں۔ میری عمر 70 سال توں زیادہ سی تے مینوں گواہواں دے عقیدیاں بارے وی کجھ پتہ نئیں سی۔ اُنج وی میرا بوہت سارے چرچاں توں دل اُٹھ گیا سی ایس لئی میں سوچنا ساں کہ میں آپ ای بائبل دا مطالعیا کر‌اں گا۔‏

ایسے دوران میں شہر دے دُوجے علاقیاں چ وی گواہواں نُوں ویکھیا جیہڑے اپنیاں کتاباں تے رسالیاں والی ٹرالی کول کھلوتے ہوندے سن۔ اوہ ہمیشاں دُوجیاں نال بڑے پیار نال پیش آندے سن۔اوہ میرے ہر سوال دا جواب بائبل چوں دیندے سن۔ایس طرحاں اوہناں تے میرا بھروسا ودھن لگ پیا۔‏

اِک دن ایلین نے مینوں پچھیا:‏ ”‏کیہہ تُسی من دے او کہ جانور خدا وَلّوں اِک تحفہ نیں؟“‏ میں اوہنوں جواب دِتا:‏ ”‏جی بالکل!‏“‏ فیر ایلین نے بائبل چوں مینوں یسعیاہ 11:‏6-‏9 ایتاں پڑھ کے سُنائیاں۔ اوہدوں توں میرے دل چ بائبل بارے سکھن دی خواہش ہور ودھ گئی۔پر میں حالے وی گواہواں دی کوئی کتاب یاں رسالہ نئیں لینا چاہندا ساں۔‏

ایہدے کجھ دن بعد ای میں ایلین تے اوہدے شوہر برینٹ دے نال بائبل دے کجھ دلچسپ موضوعاں بارے تھوڑی بوہت گل بات کر‌ن لگ پیا۔ اوہناں نے مینوں مشورہ دِتا کہ میں بائبل نُوں متی توں لے کے اعمال تک پڑھاں تاکہ میں ایہہ سمجھ سکاں کہ اِک سچا مسیحی ہون دا کیہہ مطلب اے۔ میں اِنج ای کیتا۔ فیر ایہدے تھوڑی ای دیر بعد میں برینٹ تے اوہدی بیوی ایلین کولوں بائبل کورس کر‌ن لگ پیا۔ ایہہ 2016 دی گل اے۔‏

مینوں ہر ہفتے بائبل کورس کر‌نا تے گواہواں دِیاں عبادتاں تے جانا بڑا چنگا لگدا سی۔ میں بائبل چوں جو کجھ سکھ رہیا ساں، اوہدے توں مینوں بوہت خوشی مِلدی سی۔ ایس لئی تقریباًاِک سال بعد میں یہوواہ دے گواہواں دے طور تے بپتسمہ لے لیا۔ ہُن میں 79 سال دا واں تے میں یہوواہ دا بڑا شکرگزار آں کہ اوہنے سچا مذہب لبھن چ میرے مدد کیتی۔ ایہہ اوہدی برکت اے کہ اوہنے مینوں اپنے بندیاں چ شامل ہون دا موقع دِتا اے۔“‏