¿Milagros kanpunichu? Imastachus runas nisqanku

1. WAKIN NINKU: Milagrosqa, Jallpʼamanta, janaj pachamanta leyes kasqanwan churanakusqanta. Chay leyesmanta yachanchej, yachayniyoj runas, kausayniyoj kaj imasta unaytaña ukhunchasqankurayku. Chaywanpis wakin kuti chay runas ukhunchasqankuta mana tukuynintapunichu yachanku. Janaj pachapi, Jallpʼapi kaj imas, imaynatachus purisqankuta mana tukuynintapunichu yachasunman (Job 38:4). Uj yachayniyoj runaqa, tukuy kausayninpi, imallatapis ukhuncharishaspa, waj jinata tarispa watejmanta ukhunchanan tiyan. Sutʼincharinapaj, uj yana pilita tarispa, manaña yuraj pilislla kasqanta ninmanchu.

Filósofo John Locke (1632-1704) uj willayta willarerqa, chaytaj mana tukuy imata yachajtinchej, pantasqata yuyanata rikuchin. Chay runaqa, Siam suyoj reyninmanta, Holanda suyoj embajadorninmanta ima parlarqa. Embajadorqa, Holandapi wakin kutis uj elefante yaku patata purisqanta nerqa. Siammanta reytaj, llullakushasqanta yuyarqa, embajadorqa, Siampi imachus mana rikukojchu chayllamanta parlasharqa. Imaraykuchus Holandapi qhasajtin yaku rakhuta chhullunkan, chayraykutaj elefanteqa yaku patata puriyta atin. Reytaj, chayta mana yachaspa uj elefante yaku patata purinanta mana creerqachu.

Ñaupaj wataspi, imastachus ruwayta mana atikojchu, kunan ruwayta atikun chaykunata qhawarina:

● Uj avión Nueva Yorkmanta, Singapurkama 800 kuraj pasajeroswan 900 kilometrosta uj horallapi phawayta atin.

● Iskay runas mana kikin suyupi tiyakuspapis, uj videoconferencianejta parlariyta, rikunakuyta ima atinku.

 ● Ashkha takiykunata, uj DVD nisqapi waqaychayta atikun.

● Doctoresqa, waj sonqota chayri imallatapis runaj cuerponman operashaspa churayta atinku.

Kaykunata qhawarispa, ¿ima yuyaymantaj chayanchej? Runasqa, ñaupaj wataspi imastachus mana ruwayta aterqankuchu, kunan ruwayta atinku. Tukuy imata Ruwaj Diosqa, tʼukunapaj imasta ruwayta atin chaykunata manaraj tukuy imata entiendejtinchejpis chayri mana Pay jina ruwayta atejtinchejpis (Génesis 18:14; Mateo 19:26). *

2. WAJKUNATAJ NINKU: Biblia parlan milagrosmanta, runa chaypi creenanpaj. Chaywanpis Bibliaqa, mana tukuy milagrospi creenatachu nin. Astawanqa, allin yuyaywan ima milagrospichus atienekusqanchejta qhawarikunanchejta nin. Chayraykutaj Biblia nin: “Sajra runaqa Satanaspa atiyninwan jamuspa, ruwanqa llulla milagrosta, tʼukuna ruwanasta ima. Chay imaymana sajra chʼawkiyaykunawan chinkayman rejkunata pantachenqa”, nispa (2 Tesalonicenses 2:9, 10).

Jesucristoqa, ashkha runas discipulosnin kasqankuta ninankuta nerqa, mana discipulosnin kajtinkupis. Wakin jinata ninkuman: “Señor, Señor. Manachu sutiykipi sutʼincharqayku, sutiykipitaj supaykunata qharqorqayku, sutillaykipitaj ashkha milagrostapis ruwarqayku?” nispa (Mateo 7:22). Jesustaj ni jaykʼaj rejsisqanta ninanta nerqa (Mateo 7:23). Nitaj yachacherqachu tukuy milagros Diosmanta jamusqanta.

 Chaywanpis Diosqa, mana suyanchu kamachisnin milagrosllapi creeyninkuta sayachinankuta. Manaqa, creeyninchej pruebaspi sayasqa kanan tiyan (Hebreos 11:1).

Corinto llajtamanta hermanoswan imachus kasqanta qhawarina. Chay llajtamanta ashkha cristianosqa, Jesucristo wañusqanmanta qhepaman, kausarimusqanmanta iskaychakorqanku. ¿Imaynatá apóstol Pablo chay hermanosta yanaparqa? ¿Astawan creeyniyoj kanankutachu nerqa? Mana. Astawanqa Jesús kausarimusqanmanta pruebas kasqanta nerqa. Pabloqa, Jesús “pʼampasqa karqa, kawsarimporqataj kinsa pʼunchayninman, Diosmanta Qhelqasqapi nisqanman jina” niytawan kayta nillarqataj: “Chantá rikhurerqa Pedroman, chaymantataj chunka iskayniyoj apostolesman. Chay qhepata waj hermanosmampis rikhurillarqataj, phishqa pachaj kuraj tantasqa kashajtinku. Chaykunamanta ashkhas kawsashankuraj”, nispa (1 Corintios 15:4-8).

Chay cristianos Jesús kausarimusqan milagropi, ¿creenankuchu karqa? Pablo sutʼincharqa: “Cristochus mana kawsarimporqa chayqa, qhasi manakaj willasqaykoqa, qhasi manakajllataj paypi creesqaykichejpis”, nispa (1 Corintios 15:14). Chantapis chayta mana jinallatachu saqerqa. Manaqa, Jesús kausarerqachus manachus chayta sutʼincharqapacha. Yacharqataj Jesús kausarisqantapuni. Chaywanpis Jesús kausarisqanta rikojkuna ashkhasraj kausasharqanku chayta ninankupaj, paykunaqa Jesús mana kausarerqachu ninankumantaqa wañuyta munankuman karqa (1 Corintios 15:17-19).

3. WAKINTAJ NINKU: Milagrosqa rikukoj ruwaykunalla, chaykunatataj pisi yachayniyojkunaqa ancha jatunpaj qhawasqankuta. Wakin yachayniyoj runasqa, Bibliapi parlaj milagros mana Diospa yanapayninwanchu kasqanta, manaqa rikukoj ruwaykunalla kasqanta sutʼinchayta munanku. Yuyankutaj chayta ruwaspa, Bibliaj nisqanpi astawan creenankupaj runasta yanapasqankuta. Wakin runasqa, jallpʼa ikhakuykunata, sinchi parata chayri chayman rijchʼakoj imasllata milagrosta sutichasqankuta ninku. Wakin milagrospi, chaykuna rikukojtinpunipis, maykʼajchus chaykuna kasqanpi mana tʼukurinkuchu.

Egiptopi Nilo mayu yawarman tukushajtin, imachus kasqanta qhawarina. Wakin runasqa, Nilo mayu puka jallpʼata apamusqanrayku, chayri puka khurus kasqanrayku yaku pukaman tukusqanta ninku. Bibliataj, mana puka tʼuruman tukusqantachu nin, manaqa yawarman. Éxodo 7:14-21 versiculosta leespa, Moisés nisqanman jina Aarón Nilo mayuta tojnunwan wajtajtinkama uj milagronejta yawarman tukorqa. Nilo mayu mana milagronejtachu yawarman tukunman karqa chay, ¿imajtintaj Aarón wajtajtinpuni mayu yawarman tukorqa?

Israelitas, Sumaj Jallpʼaman yaykunanku kashajtin imachus kasqanta qhawarinallataj. Jordán mayupi ashkha yaku kasqanrayku mana chimpayta atillarqankuchu, astawanraj para tiempo kasqanrayku. Biblia nin: “Mayuman sacerdotes chayaspa yaku kantuman saruykusqankutawan chakisninku joqʼochakojtinkama, pata mayumanta jamoj yakoqa kikimpi sayaykorqa qocha jina, Adán nisqa llajtamanta Saretán nisqa llajtakama”, nispa (Josué 3:15, 16). Jordán mayupi yaku iskayman tʼaqakusqan, ¿jallpʼa ikhakusqanraykuchu chayri jallpʼa suchurimusqanraykuchu karqa? Bibliaqa, chayta mana ninchu. Chaywanpis mana creenapaj jina Jehová Dios, Josueman imatachus ruwananta nisqantawankama Jordán mayoqa chʼakerqa (Josué 3:7, 8, 13).

Kaykunata qhawarispa, ¿milagros kasqanta nisunmanchu? Bibliaqa, milagros kasqanta rikuchin. Chaywanpis chay milagrosqa, mana rikuchiykunallachu kanku. Chaywanpis, ¿sapa pʼunchay mana kasqanraykuchu milagros mana kasqanta nisunman?

[Sutʼinchaynin]

[5 paginapi sutʼinchaynin]

Ashkha wata ñaupajta, avionpi uj horapi ashkha kilometrosta phawayqa mana creenapaj jina karqa