Diospa Siminmanta yachachikuykuna

¿Imaynatan yachawaq mayqen religión cheqaq kasqanta?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Ch’ullallachu cheqaq religión?

Jesusqa qatikuqninkunamanmi yachachirqan ch’ullalla cheqaq religión kasqanta. Huk ñan hinan kawsayman apan, Jesuspa nisqan hina ‘pisillataqmi tariqkunaqa’ (Mateo 7:14). Biblia nisqanman hina yupaychayllatan Diosqa chaskin. Chhaynapin huk iñiyllapi llapa cristianokuna hukllachasqa kanku. (Leey Juan 4:23, 24; 14:6; Efesios 4:4, 5.)

2. ¿Imaraykun askha religionkuna kan, cristianon kayku niqkuna?

Cheqaq cristianokunatan pantasqa profetakuna pantachirqan, runamasinmanta imapas chaskinankuraykulla. Jesuspa nisqan hina: “Paykunan hamusunkichis ovejaman tukuspa, sonqonkupitaq ichaqa yarqasqa atoqkuna hina kanku”, nispa (Mateo 7:13-15, 21, 23). Apostolkunaq wañusqan qhepamanmi pantasqa cristianokuna rikhurimurqan (Leey Hechos 20:29, 30).

3. ¿Imakunapin hukniray kanku cheqaq cristianokuna?

Bibliatan respetanku. Kallpachakunkun Bibliaq nisqanman hina kawsanankupaq, manan runaq nisqanman hinachu (Mateo 15:7-9). Yachachisqankuman hinataq kawsankupas. (Leey Juan 17:17; 2 Timoteo 3:16, 17.)

Jehová Diospa sutintan respetanku. Jesusqa runakunamanmi Diospa sutinta sumaq kayninkunatapas yachachirqan. Diospa sutin yupaychana kananpaqmi mañakuypi yachachirqan (Mateo 6:9). ¿Pikunan Diospa sutinta reqsichinku llaqtaykipi? (Leey Juan 17:26; Romanos 10:13, 14.)

 4. ¿Imaynatan yachawaq pikuna cheqaq cristiano kasqankuta?

Cheqaq cristianokunaqa Diospa Gobiernonmantan predicanku. Jesusqa hamurqan kay hallp’aman Diospa Gobiernonta predicananpaqmi. Chaytan ruwarqan wañunankama. Chay Gobiernollan llapa runakunapaq suyakuynin (Lucas 4:43; 8:1; 23:42, 43). Qatikuqninkunatapas kamachirqanmi Diospa Gobiernonmanta predicanankupaq. Sichus tiyasqaykiman hamunku Diospa Gobiernonmanta willaspanku chayqa, ¿mayqen religionmantan kanku? (Leey Mateo 10:7; 24:14.)

Jesuspa qatikuqninkunaqa manan chaqrukunkuchu kay pachaq millay ruwayninkunaman. Manan chaqrukunkuchu politicapi nitaq millay ch’aqwaykunapipas (Juan 17:16). Manan qatichikunkuchu kay pachaq millay yuyaykusqanta millay ruwasqantapas. (Leey Santiago 1:27; 4:4.)

5. ¿Imapin astawan reqsichikunku cheqaq cristianokuna?

Cheqaq cristianokunaqa sonqomantan munanakunku. Biblian paykunataqa yachachirqan llapa runata respetanankupaq imaymana rikchayniyoq kaqtinpas. Pantasqa religionkunaqa guerrakunapin yanapakunku, cheqaq religionmi ichaqa mana chayta ruwanchu (Miqueas 4:1-4). Aswanmi tiemponkuta t’aqanku kaqninkutapas qonku, tukuy sonqowan runamasinkuta yanapanankupaq. (Leey Juan 13:34, 35; 1 Juan 4:20, 21.)

¿Mayqen religionmi yachachin Bibliaq nisqanman hina, Diospa sutintapas respetan, predicankutaq Diospa Gobiernonmanta?¿Pikunan cheqaqta munanakunku manataq yanapankuchu guerrakunata? Askha runakunan reparanku Jehová Diospa testigonkuna chay ruwasqankuta (1 Juan 3:10-12).

Astawan yachayta munanki chayqa ¿Imatapunin Biblia yachachin? nisqa librota qhaway 15 capitulota, chaytaqa Jehová Diospa testigonkunan ruwan.

[30 paginapi dibujo]

“‘Diosta reqsiyku’ ninkun, ichaqa ruwayninkuwanmi Diosta neganku.” (Tito 1:16)