¿Pin wawakunata yachachinan?

“Yachachisqaqa manan yachachiqninmantaqa aswan yachayniyoqqa kanmanchu, chaywanpas astawan yachaspaqa yachachiqnin hinan kanqa.” (LUCAS 6:40)

WAKIN tayta-mamakunaqa manan wawankuta Diosmanta yachachinankupaq hinachu qhawarikunku. Yaqapas mana allin estudioyoq kasqankurayku otaq religionmanta pisita yachasqankuwan. Chaymi familianman otaq religionmanta umalliqmanpas saqenku yachachinankupaq.

Ichaqa, ¿pitaq allin preparasqari kashan wawakunata Diosmanta yachachinanpaq chayman hina kawsanankupaqpas? Qhawarisun Bibliaq nisqanta hinaspa tupanachisun yachayniyoq runakunaq nisqanwan.

Taytaq ruwaynin

Bibliaq yachachisqan: Taytakuna, “wawaykichista ama phiñachiychischu aswanpas kasuchikuspa uywaychis, Señormanta yachachispa” (Efesios 6:4).

Yachayniyoq runakunaq nisqan: ¿Imaynapin taytakunaq allinninkupaq kanman Diosmanta yachasqanku? 2009 watapi estudiakusqanmantan nirqanku: “Taytakunaq religionniyoq kasqankuqa allin tayta kananpaqmi yanapan.  Religionmi yanapanqa allinta kawsananpaq allinkunatataq yachachinqa” (Fathers’ Religious Involvement and Early Childhood Behavior).

Bibliaqa taytakunatan kamachin wawankuta allinta uywanankupaq yachachinankupaqpas (Proverbios 4:1; Colosenses 3:21; Hebreos 12:9). Ichaqa, ¿chay kamachikuy kay tiempopaqpas allinchu kanman? Arí. 2009 watapin Universidad Florida nisqa huk qelqapi willarqan taytakunaq ruwasqanmanta wawankunaq qatikusqankuta. Yachayniyoqkunan reparanku taytakuna wawankuta huch’uychamantapacha yachachiqtinkuqa, paykuna kikinkuta hukkunatapas ancha sumaqpaq qhawarinku. Qhari wawakunaqa aswan allinta comportakunku, warmi wawakunapas allinta sientekunku yuyaykunkupas. Chaymi Bibliaq nisqanqa kunankamapas allinninchispaqpuni.

Mamakunaq ruwaynin

Bibliaq yachachisqan: “Kasukullaypuni mamaykiq yachachisqasuykita” (Proverbios 1:8).

Yachayniyoq runakunaq nisqan: Wawakunaq comportakusqanta estudiaq qelqan 2006 watapi nirqan: “Taytakunamantaqa mamakunan wawakunawanqa sapa p’unchay kashanku, chhaynan llapa nacionkunapipas”, nispa (Handbook of Child Psychology). Chaymi mamaq rimasqan ruwasqan imayna comportakusqanpas wawankunapi allinpaq otaq mana allinpaq kanqa.

Tayta-mamakuna wawankuta Diosmanta allinta yachachispankuqa iskay allin regalotan qoshanku. Ñawpaqtaqa: Jehová Dioswan amigontin kanankupaq yanapasqanku, chayqa kawsayninkupin allinninkupaq kanqa. Iskaykaqtaq: qosapas esposapas sumaq kawsayninkuwanmi allin ejemplo kanku (Colosenses 3:18-20). Huk runakunawanña yanapachikunkuman wawankuta yachachinankupaq chaypas, tayta-mamakunan yachachinanku Diosmanta kamachikuyninkunamantapas, chhaynapi familiapi kusisqa kawsanapaq.

Chay hinaqa, ¿imaynatan wawakunata yachachina? ¿Imakunatan ruwawaq?