¿Imamandata Jesusca ashtacacunata salvangapami huañurca nipanchi?

Cai idiomapi uyangapaj o ricungapaj

Bibliapica caitami yachachin

Jehová Diosca Jesuspa causaita cushpami ñucanchicunataca juchamanda, huañuimandapash salvarca. Bibliapica Jesuspa yahuarmi gentecunataca juchamanda salvarca ninmi (Efesios 1:7; 1 Pedro 1:18, 19). Jesusllatami “ashtacacunata ñuca huañushpa quishpichingapajmi shamurcani” nirca (Mateo 20:28).

¿Imamandata salvachun minishtircanchi?

Taita Diosca Adandaca perfectotami rurarca. Chaimandami paica na huañushpa para siempre causana oportunidadta charirca. Shinapash Taita Diosta na cazuimandami para siempre causana oportunidadtaca chingachirca (Génesis 3:17-19). Shinallata Adán juchayu cashcamandami paipa tucui huahuacunapash juchayucuna nacirirca (Romanos 5:12). Chaimandami Bibliapica Adán juchata rurashpaca paipa huahuacunataca juchaman, huañuimanbash jatushpa saquishcashna can nin (Romanos 7:14). Tucuicunallata juchayucuna caimandami Adán chingachishca causaitaca ñucanchimandallataca na cutin chari ushanchi (Salmo 49:7, 8).

Adanba tucui huahuacunallata juchayu cajpimi Taita Diosca ñucanchicunata ninanda juyaimanda perdonangapaj munarca (Juan 3:16). Shinapash Taita Diosca shuj justo Dios caimandami ñucanchi juchacunataca na yanga perdonana cashcamandalla perdonarca (Salmo 89:14; Romanos 3:23-26). Taita Diosca gentecunata juyaimandami juchata perdonashpa juchata tucuchitapacha tucuchingapaca paipa churipa causaita curca (Romanos 5:6-8). Shinami Jesuspa causaihuan ñucanchicunataca salvarca.

Salvana nishpaca ¿imatata ningapaj munan?

Salvana nishpaca Bibliapica cai quimsa yuyaicunamandami parlajun:

Bibliapica salvana nishpaca culquita o imatapash paganamandami parlajun (Números 3:46, 47).
Salvana nishpaca imamandapash libre quidanata, imatapash ña chingachishcata cutin recuperanatami nijun (Éxodo 21:30).
Imatapash salvagrijushpaca chai mashnapacha valishcataca igualtapacha pagana cashcatami nijun. a

Jesuspa causaihuan imacunapilla salvashcata ricupashun.

Culquita o imatapash pagana. Bibliapica Jesusta catijcunataca “ninan valishcapaj randi tucushcami canguichi” ninmi (1 Corintios 6:20; 7:23). Jesusca pai huañushpa jichashca yahuarhuanmi tucui laya gentecuna Taita Diospa causachun randirca (Apocalipsis 5:8, 9).
Libre quidana. Jesús huañushcamandami juchacunamandaca libre quidai ushanchi (1 Corintios 1:30; Colosenses 1:14; Hebreos 9:15).
Igualtapacha pagana. Adán na cazushpa jucha illaj causaita chingachishcamandaca Jesusmi paipa jucha illaj causaita cushpa ñucanchi juchacunamanda pagarca (1 Corintios 15:21, 22, 45, 46). Bibliapica: Adán ‘na cazujpimi, ashtacacuna juchayucuna tucushca. Shinallata [Jesucristo] cazushcamandami, ashtacacunaca [justocuna] canga’ ninmi (Romanos 5:19). Caipica Jesús huañushcamanda ashtaca gentecuna salvari ushashcatami ricuchin. Jesuspa huañushcahuanga alita rurangapaj munaj gentecunami salvarita ushan (1 Timoteo 2:5, 6).

a Hebreo y griego shimipi “salvana” nishpaca, Bibliapica imamandapash paganata o imatapash cutin chari ushangapaj imapash valishcatapacha cunatami nisha nijun. Por ejemplo hebreo shimipi kafár nishpaca ‘quilpana’ nisha ninmi (Génesis 6:14). Caita nishpaca juchacunata cungana o perdonana nisha nijunmi (Salmo 65:3). Shinallata kófer shimica imatapash cutin chari ushangapaj o pagangapaj imatapash cushcatami nisha nin (Éxodo 21:30). Shinallata griego shimipi lýtron nishpaca “salvana” nisha ninmi y chai shimitaca ‘quishpichina’ nishpapash traduci usharin (Mateo 20:28). Griego shimita escribijcunaca guerrapi japi tucushca shuj soldadota o shuj esclavota salvangapaj paganamanda parlashpami cai shimitaca utilizan carca.