Jatun acapanacuna, mar yacupi jatari acapanacuna, shinallata ninanda huairahuan tamiacunami ninanda llaquichin. Por ejemplo, yacu jundashpa shinallata mar yacupa yacu mirashpami ninanda llaquichin. Yapata tamiashpami alpacunapash tunirin, shinallata rayohuan tamiashpami bosquecunapash rupan. Shinallata yapata indishpa na tamiashpami gentecunataca ninanda llaquichin. Millón gentecunaca acapanamanda, ninanda tamiaimanda, shuj shuj llaquicunamandapashmi ninanda llaqui apashca ¿quiquinbashchu cai llaquicunataca charipashcangui?

 Tiempo cambiashca caimandami ashtaca llactacunapica llaquicunaca mirashca. Federación Internacional de Sociedades de la Cruz Roja y de la Media Luna Roja nishca organizacionga cashnami nin: “Llaqui apashca gentecunaca ninandami miranajun, yapata tamiashpa yacu jundaimanda, shinallata yapata indimandami ashtaca gentecunapa causaitaca ninanda llaquichijushca. Shinallata paicunapa charishcacunatapash tucuchishca. Chaimandami cada huata ashtaca gentecunaca paicunapa causajushca llactacunamandaca shuj ladoman rina tucushca”.

 Chashna llaqui apashca gentecunaca ninandami sufrin. Paicunaca paicunapa huasita, paicunapa charishca cosascunatami chingachin, shinallata paicunapa familiapashmi huañun.

 ¿Imahorapash chashna llaquicunata charipashcanguichu? Chashna pasashca cajpica Bibliami ayudaita ushapanga. Ashtaca gentecunataca Bibliapa nishcacunami tranquilo sintirichun, shinallata shamuj punllapi ali causaigu tianata yachachunbash ayudashca (Romanos 15:4). Shinallata Bibliaca cai tapuicunatapashmi contestan: ¿Imamandata Taita Diosca llaquicunata charichunga saquin? ¿imatapash nalita rurashcamandachu castigajun?

 Gentecunapa llaquicunamandaca Taita Diosca na culpata charinllu. Bibliapica ninmi: “Taita Diosca nalita rurachunga nipita na tentanllu. Taita Diostapash nalicunata rurachunga nipipash na tentaita ushanllu” (Santiago 1:13, La Biblia. Traducción del Nuevo Mundo [TNM]). Tiempo cambiashpa llaquicuna tiashcamandaca Taita Diosca na culpata charinllu.

 Bibliapica ninmi punda tiempopica Taita Diosca nali gentecunata llaquichingapaca indita, tamiata utilizashcata. Cunan punllacunapica na yashcapimi terremotocuna, tamiacuna, shuj shuj llaquicunapash ali gentecunata, nali gentecunatapash llaquichin. Cutin punda tiempopica Taita Diosca imahuan castiganata, imamanda shina llaquichigrijushcatami ña villan carca. Shina rurashpami ali gentecuna imapash ama pasachun villan carca. Por ejemplo Noepa punllacunapica Jatun Manllanai Tamiata cachamunatami Taita Diosca Noemanga tiempohuan villarca. Shinallata Jatun Manllanai Tamiata imamanda cachamugrijushcatami Noemanga intindichirca, shina rurashpami Noeta, paipa familiatapash Taita Diosca Jatun Manllanai Tamiamandaca salvarca (Génesis 6:13; 2 Pedro 2:5).

 Cai temamanda ashtahuan informacionda taringapaj munashpaca “¿Qué dice la Biblia sobre los desastres naturales?” nishca tematami ricuita ushapangui.

 Bibliapica Taita Diosca a ñucanchita juyajta shinallata llaquicunahuan sufrinajujta ricushpaca paipash ninandami llaquirin ninmi. Bibliapa ishcai textocunata ricupai:

•   Isaías 63:9: “Paicunata ninan llaqui japijpica, tucuipimi paipash ninanda llaquirijurca”.

   ¿Imatata ningapaj munan?: Taita Diosca ñucanchi llaquicunahuan cajta ricushpaca paipash ninandami llaquirin.

•   1 Pedro 5:7: “Diosmi cangunataca cuidajun”.

   ¿Imatata ningapaj munan?: Jehová Diosca ñucanchicuna alilla cachunmi munan.

 Jehová Diosca gentecunata ninanda juyaimandami paipa shimi Bibliata cushpa ayudan. Bibliapimi ali consejocunata, shinallata llaquicuna illaj jipa punllacunapi ali causaigu tianatapashmi yachachin (2 Corintios 1:3, 4).

 Bibliapica Jehová Diosca “canguna shuyanajushcatami caragrini” ninmi (Jeremías 29:11). Taita Diosca terremotocunamanda, yapata tamiamanda, shuj llaquicunahuan sufrishpa causachunga na munanllu, Taita Diosca cai alpapi tranquilo, cushilla causachunmi munan (Génesis 1:28; 2:15; Isaías 32:18).

 Taita Diospa Gobiernomi chaitaca pactachinga. Taita Diospa Gobiernoca ¿imata can? Jahua cielomanda Gobiernomi can, chai Gobiernopica Jesusmi mandanga (Mateo 6:10). Jesusca huairata, tamiata, trancana podertami charin. Jesús cai alpapi cashpa huairata trancashpami poderta charishcataca ricuchirca (Marcos 4:37-41). Jesús cai alpata mandajujpimi cai alpata imashina cuidanata, animalcunata, plantacunatapash imashina cuidanataca yachachinga. Chashna rurashpami ali yachaj cashcataca ricuchinga (Isaías 11:2). Shinallata yapata tamiajpi, yapata indijpi gentecuna sufrishpa causachunga na saquingachu.

 Cai llaquicunaca imahorachari tucuringa yashpachari pensaripangui. Caimanda ashtahuan yachangapaj munashpaca “Taita Diospa Gobiernoca ¿imahorata cai alpataca mandanga?” nishca temata ricupai.

 Bibliapa consejocunaca llaquicuna nara japijpi, llaquicunahuan caj horas, llaquicuna jipapashmi ayudaita ushan.

•   Llaquicuna nara japijpi: Llaquicuna shamujpi imata ruranata prepararishcalla capai.

   Bibliapica ninmi: “Ali yuyaita charij runaca, ima llaqui japinata ricushpaca pacajunmi. Ashtahuangarin na yachajushca runacunaca, yangata rishpa llaquichi tucunllami” (Proverbios 22:3).

   ¿Imatata ningapaj munan?: Quiquin causajuj pushtupi imapash llaquicuna tianapi pensaripai. Chashna rurashpami llaquicuna shamujpica imatapash ñapash ruraita ushapangui, shinallata quiquinba familiatapashmi cuidaita ushapangui.

   Estados Unidosmanda Tamara huarmiguca cashnami nin: “Ñucanchi causajuj pushtupi rupajpimi chaimandaca llujshilla rina tucurca. Chaimi gentecunaca ninanda manllarishpa imata ruranatapash na atinanajurca, pero ñucanchicunaca mochila de emergenciapi medicinacunata, ropacunata, ima minishtirishcatami churashcalla charircanchi. Antsicarin llaquicuna tiajpi llujshingapaca ña preparado carcanchi”.

•   Llaquicunahuan caj horas: Ima más importante cashcapi pensaripai.

   Bibliapica cashnami nin: “Imata ninanda maijan runa charishpapash, chaihuan unaita causajuitaca, na ushangachu nircami” (Lucas 12:15).

   ¿Imatata ningapaj munan?: Ñucanchi causaimi cosascunatapash yali más importante can.

   Filipinas llactamanda Leslie huarmiguca cashnami nin: “Tifón Lawin b nishca ñucanchi huasita tucuchijpica imata ruranatapash na atinarcanichu. Chaimi Jehová Diosta mañashpa, ñuca imashina sintirijushcataca villarcani. Aunque ñucanchi huasi tucurishca cajpipash ñucanchi causashpa catijushcata ricushpami ninanda cushijurcani”.

•   Llaqui japishca jipa: Caya punlla ima pasanamandaca ama yapata preocuparipaichu.

   Bibliapica cashnami nin: “Shina cashcamanda cangunaca, na cayandi punllamanda yarishpa musparinachu canguichi. Punllandimi llaquicunaca tian” (Mateo 6:34).

   ¿Imatata ningapaj munan?: Caya punlla ima pasanamandaca ama yapata preocuparipaichu.

   Estados Unidosmanda Sally huarmiguca cashnami nin: “Huairahuan tamiashpa ñuca huasi yacu jundajpica ninandami llaquirircani. Imata ruranataca na atinarcanichu. Chaimi Bibliapi nishcashna cayandi punllamanda na yapata preocuparina cashcata yarircani. Ama yapata preocuparichun, tranquila sintirichunga Jehová Diosca ninandami ayudahuarca”.

 Llaqui apajpi imata ruranata ashtahuan yachangapaca “Cuando golpea un desastre. Qué hacer para sobrevivir” nishca tematami ashtahuan ricuita ushapangui.